1-4. පච්චයචතුක්කං

හෙතුපච්චයො

64. දස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති හෙතුපච්චයා – දස්සනෙන පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ…. (1)

නදස්සනෙන පහාතබ්බහෙතුකං ධම්මං සංසට්ඨො නදස්සනෙන පහාතබ්බහෙතුකො ධම්මො උප්පජ්ජති හෙතුපච්චයා – නදස්සනෙන පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

නදස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති හෙතුපච්චයා – විචිකිච්ඡාසහගතං මොහං සංසට්ඨා සම්පයුත්තකා ඛන්ධා. (2)

දස්සනෙන පහාතබ්බහෙතුකඤ්ච නදස්සනෙන පහාතබ්බහෙතුකඤ්ච ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති හෙතුපච්චයා – විචිකිච්ඡාසහගතං එකං ඛන්ධඤ්ච මොහඤ්ච සංසට්ඨා තයො ඛන්ධා…පෙ… ද්වෙ ඛන්ධෙ ච…පෙ…. (1)

ආරම්මණපච්චයො

65. දස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති ආරම්මණපච්චයා… තීණි (පටිච්චසදිසා).

නදස්සනෙන පහාතබ්බහෙතුකං ධම්මං සංසට්ඨො නදස්සනෙන පහාතබ්බහෙතුකො ධම්මො උප්පජ්ජති ආරම්මණපච්චයා – නදස්සනෙන පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

නදස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති ආරම්මණපච්චයා (පටිච්චසදිසං). (2)

දස්සනෙන පහාතබ්බහෙතුකඤ්ච නදස්සනෙන පහාතබ්බහෙතුකඤ්ච ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති ආරම්මණපච්චයා (පටිච්චසදිසං, සංඛිත්තං). (1)

66. හෙතුයා චත්තාරි, ආරම්මණෙ ඡ, අධිපතියා ද්වෙ, අනන්තරෙ ඡ (සබ්බත්ථ ඡ), විපාකෙ එකං…පෙ… අවිගතෙ ඡ.

අනුලොමං.

නහෙතුපච්චයො

67. දස්සනෙන පහාතබ්බහෙතුකං ධම්මං සංසට්ඨො නදස්සනෙන පහාතබ්බහෙතුකො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ සංසට්ඨො විචිකිච්ඡාසහගතො මොහො. (1)

නදස්සනෙන පහාතබ්බහෙතුකං ධම්මං සංසට්ඨො නදස්සනෙන පහාතබ්බහෙතුකො ධම්මො උප්පජ්ජති නහෙතුපච්චයා – අහෙතුකං නදස්සනෙන පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… උද්ධච්චසහගතෙ ඛන්ධෙ සංසට්ඨො උද්ධච්චසහගතො මොහො. (1)

නහෙතුයා ද්වෙ, නඅධිපතියා ඡ, නපුරෙජාතෙ ඡ, නපච්ඡාජාතෙ ඡ, නආසෙවනෙ ඡ, නකම්මෙ චත්තාරි, නවිපාකෙ ඡ, නඣානෙ එකං, නමග්ගෙ එකං, නවිප්පයුත්තෙ ඡ.

පච්චනීයං.

හෙතුදුකං

හෙතුපච්චයා නඅධිපතියා චත්තාරි, නපුරෙජාතෙ චත්තාරි…පෙ… නවිප්පයුත්තෙ චත්තාරි.

නහෙතුදුකං

නහෙතුපච්චයා ආරම්මණෙ ද්වෙ, අනන්තරෙ ද්වෙ…පෙ… විපාකෙ එකං…පෙ… අවිගතෙ ද්වෙ.