1. විභඞ්ගවාරො

නහෙතුපච්චයො

62. දස්සනෙන පහාතබ්බහෙතුකං ධම්මං පච්චයා නදස්සනෙන පහාතබ්බහෙතුකො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ පච්චයා විචිකිච්ඡාසහගතො මොහො. (1)

නදස්සනෙන පහාතබ්බහෙතුකං ධම්මං පච්චයා නදස්සනෙන පහාතබ්බහෙතුකො ධම්මො උප්පජ්ජති නහෙතුපච්චයා – අහෙතුකං නදස්සනෙන පහාතබ්බහෙතුකං…පෙ… (යාව අසඤ්ඤසත්තා) චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා නදස්සනෙන පහාතබ්බහෙතුකා ඛන්ධා, උද්ධච්චසහගතෙ ඛන්ධෙ ච වත්ථුඤ්ච පච්චයා උද්ධච්චසහගතො මොහො. (1)

දස්සනෙන පහාතබ්බහෙතුකඤ්ච නදස්සනෙන පහාතබ්බහෙතුකඤ්ච ධම්මං පච්චයා නදස්සනෙන පහාතබ්බහෙතුකො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො මොහො (සංඛිත්තං). (1)