1. විභඞ්ගවාරො

හෙතුපච්චයො

10. කිලෙසං ධම්මං පච්චයා කිලෙසො ධම්මො උප්පජ්ජති හෙතුපච්චයා… තීණි (පටිච්චසදිසා).

නොකිලෙසං ධම්මං පච්චයා නොකිලෙසො ධම්මො උප්පජ්ජති හෙතුපච්චයා – නොකිලෙසං එකං ඛන්ධං පච්චයා තයො ඛන්ධා…පෙ… (යාව අජ්ඣත්තිකා මහාභූතා) වත්ථුං පච්චයා නොකිලෙසා ඛන්ධා. (1)

නොකිලෙසං ධම්මං පච්චයා කිලෙසො ධම්මො උප්පජ්ජති හෙතුපච්චයා – නොකිලෙසෙ ඛන්ධෙ පච්චයා කිලෙසා, වත්ථුං පච්චයා කිලෙසා. (2)

නොකිලෙසං ධම්මං පච්චයා කිලෙසො ච නොකිලෙසො ච ධම්මා උප්පජ්ජන්ති හෙතුපච්චයා – නොකිලෙසං එකං ඛන්ධං පච්චයා තයො ඛන්ධා කිලෙසා ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… වත්ථුං පච්චයා කිලෙසා, මහාභූතෙ පච්චයා චිත්තසමුට්ඨානං රූපං, වත්ථුං පච්චයා කිලෙසා ච සම්පයුත්තකා ච ඛන්ධා. (3)

11. කිලෙසඤ්ච නොකිලෙසඤ්ච ධම්මං පච්චයා කිලෙසො ධම්මො උප්පජ්ජති හෙතුපච්චයා – ලොභඤ්ච සම්පයුත්තකෙ ච ඛන්ධෙ පච්චයා මොහො දිට්ඨි ථිනං උද්ධච්චං අහිරිකං අනොත්තප්පං (චක්කං). ලොභඤ්ච වත්ථුඤ්ච පච්චයා කිලෙසා. (1)

කිලෙසඤ්ච නොකිලෙසඤ්ච ධම්මං පච්චයා නොකිලෙසො ධම්මො උප්පජ්ජති හෙතුපච්චයා – නොකිලෙසං එකං ඛන්ධඤ්ච කිලෙසඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… කිලෙසෙ ච මහාභූතෙ ච පච්චයා චිත්තසමුට්ඨානං රූපං, කිලෙසෙ ච වත්ථුඤ්ච පච්චයා නොකිලෙසා ඛන්ධා. (2)

කිලෙසඤ්ච නොකිලෙසඤ්ච ධම්මං පච්චයා කිලෙසො ච නොකිලෙසො ච ධම්මා උප්පජ්ජන්ති හෙතුපච්චයා – නොකිලෙසං එකං ඛන්ධඤ්ච ලොභඤ්ච පච්චයා තයො ඛන්ධා මොහො දිට්ඨි ථිනං උද්ධච්චං අහිරිකං අනොත්තප්පං චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… (චක්කං). ලොභඤ්ච වත්ථුඤ්ච පච්චයා මොහො දිට්ඨි ථිනං උද්ධච්චං අහිරිකං අනොත්තප්පං සම්පයුත්තකා ච ඛන්ධා (චක්කං). (3)

(ආරම්මණපච්චයෙ නොකිලෙසමූලෙ පඤ්ච විඤ්ඤාණා කාතබ්බා.)