1. විභඞ්ගවාරො

නහෙතුපච්චයො

53. දස්සනෙන පහාතබ්බහෙතුකං ධම්මං පටිච්ච නදස්සනෙන පහාතබ්බහෙතුකො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ පටිච්ච විචිකිච්ඡාසහගතො මොහො. (1)

නදස්සනෙන පහාතබ්බහෙතුකං ධම්මං පටිච්ච නදස්සනෙන පහාතබ්බහෙතුකො ධම්මො උප්පජ්ජති නහෙතුපච්චයා අහෙතුකං නදස්සනෙන පහාතබ්බහෙතුකං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… (යාව අසඤ්ඤසත්තා) උද්ධච්චසහගතෙ ඛන්ධෙ පටිච්ච උද්ධච්චසහගතො මොහො. (1)