1. විභඞ්ගවාරො

හෙතුපච්චයො

13. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස හෙතුපච්චයෙන පච්චයො… තීණි.

නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස හෙතුපච්චයෙන පච්චයො – නදස්සනෙන පහාතබ්බා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

ආරම්මණපච්චයො

14. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස ආරම්මණපච්චයෙන පච්චයො – දස්සනෙන පහාතබ්බං රාගං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි…පෙ… විචිකිච්ඡා උප්පජ්ජති, දස්සනෙන පහාතබ්බං දොමනස්සං උප්පජ්ජති; දස්සනෙන පහාතබ්බං දිට්ඨිං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි…පෙ… විචිකිච්ඡා…පෙ… දොමනස්සං උප්පජ්ජති; විචිකිච්ඡං ආරබ්භ විචිකිච්ඡා උප්පජ්ජති, දිට්ඨි…පෙ… දොමනස්සං උප්පජ්ජති; දස්සනෙන පහාතබ්බං දොමනස්සං ආරබ්භ දස්සනෙන පහාතබ්බං දොමනස්සං උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති. (1)

දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස ආරම්මණපච්චයෙන පච්චයො – අරියා දස්සනෙන පහාතබ්බෙ පහීනෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ…පෙ… දස්සනෙන පහාතබ්බෙ ඛන්ධෙ අනිච්චතො…පෙ… විපස්සති, චෙතොපරියඤාණෙන දස්සනෙන පහාතබ්බචිත්තසමඞ්ගිස්ස චිත්තං ජානාති, දස්සනෙන පහාතබ්බා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

15. නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං කත්වා තං පච්චවෙක්ඛති අස්සාදෙති අභිනන්දති, තං ආරබ්භ නදස්සනෙන පහාතබ්බො රාගො උප්පජ්ජති; උද්ධච්චං…පෙ… නදස්සනෙන පහාතබ්බං දොමනස්සං උප්පජ්ජති, පුබ්බෙ සුචිණ්ණානි…පෙ… ඣානා …පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති…පෙ… ඵලස්ස ආවජ්ජනාය ආරම්මණපච්චයෙන පච්චයො; අරියා නදස්සනෙන පහාතබ්බෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ…පෙ… පුබ්බෙ…පෙ… චක්ඛුං…පෙ… වත්ථුං නදස්සනෙන පහාතබ්බෙ ඛන්ධෙ අනිච්චතො…පෙ… විපස්සති අස්සාදෙති අභිනන්දති, තං ආරබ්භ නදස්සනෙන පහාතබ්බො රාගො උප්පජ්ජති, උද්ධච්චං…පෙ… නදස්සනෙන පහාතබ්බං දොමනස්සං උප්පජ්ජති; දිබ්බෙන චක්ඛුනා රූපං පස්සති…පෙ… අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

නදස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං…පෙ… පුබ්බෙ…පෙ… ඣානා…පෙ… චක්ඛුං …පෙ… වත්ථුං නදස්සනෙන පහාතබ්බෙ ඛන්ධෙ අස්සාදෙති අභිනන්දති, තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි…පෙ… විචිකිච්ඡා…පෙ… දස්සනෙන පහාතබ්බං දොමනස්සං උප්පජ්ජති. (2)

අධිපතිපච්චයො

16. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දස්සනෙන පහාතබ්බං රාගං ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, දිට්ඨිං ගරුං කත්වා…පෙ…. සහජාතාධිපති – දස්සනෙන පහාතබ්බාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස අධිපතිපච්චයෙන පච්චයො. සහජාතාධිපති – දස්සනෙන පහාතබ්බාධිපති චිත්තසමුට්ඨානානං රූපානං අධිපතිපච්චයෙන පච්චයො. (2)

දස්සනෙන පහාතබ්බො ධම්මො දස්සනෙන පහාතබ්බස්ස ච නදස්සනෙන පහාතබ්බස්ස ච ධම්මස්ස අධිපතිපච්චයෙන පච්චයො. සහජාතාධිපති – දස්සනෙන පහාතබ්බාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

17. නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං…පෙ… පුබ්බෙ…පෙ… ඣානා වුට්ඨහිත්වා ඣානං ගරුං කත්වා පච්චවෙක්ඛති, අස්සාදෙති අභිනන්දති, තං ගරුං කත්වා නදස්සනෙන පහාතබ්බො රාගො උප්පජ්ජති, අරියා මග්ගා වුට්ඨහිත්වා මග්ගං ගරුං කත්වා…පෙ… ඵලස්ස අධිපතිපච්චයෙන පච්චයො; චක්ඛුං…පෙ… වත්ථුං නදස්සනෙන පහාතබ්බෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා නදස්සනෙන පහාතබ්බො රාගො උප්පජ්ජති. සහජාතාධිපති – නදස්සනෙන පහාතබ්බාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

නදස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අධිපතිපච්චයෙන පච්චයො. ආරම්මණාධිපති – දානං දත්වා…පෙ… ඣානං…පෙ… චක්ඛුං…පෙ… වත්ථුං නදස්සනෙන පහාතබ්බෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති. (2)

අනන්තරපච්චයො

18. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අනන්තරපච්චයෙන පච්චයො – පුරිමා පුරිමා දස්සනෙන පහාතබ්බා ඛන්ධා පච්ඡිමානං පච්ඡිමානං දස්සනෙන පහාතබ්බානං ඛන්ධානං අනන්තරපච්චයෙන පච්චයො. (1)

දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස අනන්තරපච්චයෙන පච්චයො – දස්සනෙන පහාතබ්බා ඛන්ධා වුට්ඨානස්ස අනන්තරපච්චයෙන පච්චයො. (මූලං කාතබ්බං.) පුරිමා පුරිමා නදස්සනෙන පහාතබ්බා ඛන්ධා…පෙ… ඵලසමාපත්තියා අනන්තරපච්චයෙන පච්චයො. (මූලං කාතබ්බං.) ආවජ්ජනා දස්සනෙන පහාතබ්බානං ඛන්ධානං අනන්තරපච්චයෙන පච්චයො. (2)

සමනන්තරපච්චයෙන පච්චයො… සහජාතපච්චයෙන පච්චයො… පඤ්ච… අඤ්ඤමඤ්ඤපච්චයෙන පච්චයො… ද්වෙ… නිස්සයපච්චයෙන පච්චයො… සත්ත.

උපනිස්සයපච්චයො

19. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – දස්සනෙන පහාතබ්බං රාගං උපනිස්සාය පාණං හනති…පෙ… සඞ්ඝං භින්දති; දස්සනෙන පහාතබ්බං දොසං… මොහං… දිට්ඨිං… පත්ථනං උපනිස්සාය පාණං හනති…පෙ… සඞ්ඝං භින්දති; දස්සනෙන පහාතබ්බො රාගො…පෙ… පත්ථනා දස්සනෙන පහාතබ්බස්ස රාගස්ස…පෙ… පත්ථනාය උපනිස්සයපච්චයෙන පච්චයො. (2)

දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – දස්සනෙන පහාතබ්බං රාගං උපනිස්සාය දානං දෙති…පෙ… සමාපත්තිං උප්පාදෙති දස්සනෙන පහාතබ්බං දොසං… මොහං… දිට්ඨිං… පත්ථනං උපනිස්සාය දානං දෙති…පෙ… සමාපත්තිං උප්පාදෙති; දස්සනෙන පහාතබ්බො රාගො…පෙ… පත්ථනා සද්ධාය…පෙ… පඤ්ඤාය නදස්සනෙන පහාතබ්බස්ස රාගස්ස… දොසස්ස… මොහස්ස… මානස්ස … පත්ථනාය… කායිකස්ස සුඛස්ස…පෙ… ඵලසමාපත්තියා උපනිස්සයපච්චයෙන පච්චයො. (2)

20. නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දානං දෙති…පෙ… සමාපත්තිං උප්පාදෙති, මානං ජප්පෙති; සීලං…පෙ… පඤ්ඤං, නදස්සනෙන පහාතබ්බං රාගං… දොසං… මොහං… මානං… පත්ථනං… කායිකං සුඛං…පෙ… සෙනාසනං උපනිස්සාය දානං දෙති…පෙ… සමාපත්තිං උප්පාදෙති, මානං ජප්පෙති; සද්ධා…පෙ… පඤ්ඤා, නදස්සනෙන පහාතබ්බො රාගො…පෙ… පත්ථනා… කායිකං සුඛං…පෙ… සෙනාසනං සද්ධාය…පෙ… පඤ්ඤාය නදස්සනෙන පහාතබ්බස්ස රාගස්ස…පෙ… පත්ථනාය… කායිකස්ස සුඛස්ස… කායිකස්ස දුක්ඛස්ස… මග්ගස්ස, ඵලසමාපත්තියා උපනිස්සයපච්චයෙන පච්චයො. (2)

නදස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දිට්ඨිං ගණ්හාති; සීලං…පෙ… පඤ්ඤං උපනිස්සාය දිට්ඨිං ගණ්හාති, නදස්සනෙන පහාතබ්බං රාගං… දොසං… මොහං… මානං… පත්ථනං… කායිකං සුඛං…පෙ… සෙනාසනං උපනිස්සාය පාණං හනති…පෙ… සඞ්ඝං භින්දති; සද්ධා…පෙ… සෙනාසනං දස්සනෙන පහාතබ්බස්ස රාගස්ස… දොසස්ස… මොහස්ස… දිට්ඨියා… පත්ථනාය උපනිස්සයපච්චයෙන පච්චයො. (2)

පුරෙජාතපච්චයො

21. නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… විපස්සති අස්සාදෙති අභිනන්දති, තං ආරබ්භ නදස්සනෙන පහාතබ්බො රාගො …පෙ… උද්ධච්චං…පෙ… නදස්සනෙන පහාතබ්බං දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස …පෙ… කායායතනං කායවිඤ්ඤාණස්ස…පෙ… වත්ථු නදස්සනෙන පහාතබ්බානං ඛන්ධානං පුරෙජාතපච්චයෙන පච්චයො. (1)

නදස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො…පෙ… දිට්ඨි…පෙ… විචිකිච්ඡා…පෙ… දස්සනෙන පහාතබ්බං දොමනස්සං උප්පජ්ජති. වත්ථුපුරෙජාතං – වත්ථු දස්සනෙන පහාතබ්බානං ඛන්ධානං පුරෙජාතපච්චයෙන පච්චයො. (2)

පච්ඡාජාතාසෙවනපච්චයා

22. දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස පච්ඡාජාතපච්චයෙන පච්චයො (සංඛිත්තං). (1)

නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස පච්ඡාජාතපච්චයෙන පච්චයො (සංඛිත්තං)… ආසෙවනපච්චයෙන පච්චයො… ද්වෙ.

කම්මපච්චයො

23. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස කම්මපච්චයෙන පච්චයො – දස්සනෙන පහාතබ්බා චෙතනා සම්පයුත්තකානං ඛන්ධානං කම්මපච්චයෙන පච්චයො. (1)

දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – දස්සනෙන පහාතබ්බා චෙතනා චිත්තසමුට්ඨානානං රූපානං කම්මපච්චයෙන පච්චයො. නානාක්ඛණිකා – දස්සනෙන පහාතබ්බා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (2)

දස්සනෙන පහාතබ්බො ධම්මො දස්සනෙන පහාතබ්බස්ස ච නදස්සනෙන පහාතබ්බස්ස ච ධම්මස්ස කම්මපච්චයෙන පච්චයො – දස්සනෙන පහාතබ්බා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. (3)

24. නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නදස්සනෙන පහාතබ්බා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – නදස්සනෙන පහාතබ්බා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො.

විපාකපච්චයාදි

25. නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස විපාකපච්චයෙන පච්චයො… එකං… ආහාරපච්චයෙන පච්චයො… චත්තාරි… ඉන්ද්‍රියපච්චයෙන පච්චයො… චත්තාරි… ඣානපච්චයෙන පච්චයො… චත්තාරි… මග්ගපච්චයෙන පච්චයො… චත්තාරි… සම්පයුත්තපච්චයෙන පච්චයො… ද්වෙ.

විප්පයුත්තපච්චයො

26. දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (1)

නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං).

නදස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස විප්පයුත්තපච්චයෙන පච්චයො. පුරෙජාතං – වත්ථු දස්සනෙන පහාතබ්බානං ඛන්ධානං විප්පයුත්තපච්චයෙන පච්චයො. (2)

අත්ථිපච්චයාදි

27. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අත්ථිපච්චයෙන පච්චයො (පටිච්චසදිසං). දස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං (සංඛිත්තං). දස්සනෙන පහාතබ්බො ධම්මො දස්සනෙන පහාතබ්බස්ස ච නදස්සනෙන පහාතබ්බස්ස ච ධම්මස්ස අත්ථිපච්චයෙන පච්චයො (පටිච්චවාරසදිසා). (3)

නදස්සනෙන පහාතබ්බො ධම්මො නදස්සනෙන පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). නදස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අත්ථිපච්චයෙන පච්චයො. පුරෙජාතං – චක්ඛුං…පෙ… (සංඛිත්තං, පුරෙජාතසදිසං). (2)

28. දස්සනෙන පහාතබ්බො ච නදස්සනෙන පහාතබ්බො ච ධම්මා දස්සනෙන පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – දස්සනෙන පහාතබ්බො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. (1)

දස්සනෙන පහාතබ්බො ච නදස්සනෙන පහාතබ්බො ච ධම්මා නදස්සනෙන පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතා – දස්සනෙන පහාතබ්බා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. පච්ඡාජාතා – දස්සනෙන පහාතබ්බා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – දස්සනෙන පහාතබ්බා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

නත්ථිපච්චයෙන පච්චයො, විගතපච්චයෙන පච්චයො, අවිගතපච්චයෙන පච්චයො.