1. විභඞ්ගවාරො

නහෙතුපච්චයො

9. දස්සනෙන පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ පච්චයා විචිකිච්ඡාසහගතො මොහො. (1)

නදස්සනෙන පහාතබ්බං ධම්මං පච්චයා නදස්සනෙන පහාතබ්බො ධම්මො උප්පජ්ජති නහෙතුපච්චයා – අහෙතුකං නදස්සනෙන පහාතබ්බං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං …පෙ… ද්වෙ ඛන්ධෙ…පෙ… (යාව අසඤ්ඤසත්තා) චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං; වත්ථුං පච්චයා අහෙතුකා නදස්සනෙන පහාතබ්බා ඛන්ධා, උද්ධච්චසහගතෙ ඛන්ධෙ පච්චයා උද්ධච්චසහගතො මොහො, වත්ථුං පච්චයා උද්ධච්චසහගතො මොහො. (1)

නදස්සනෙන පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති නහෙතුපච්චයා – වත්ථුං පච්චයා විචිකිච්ඡාසහගතො මොහො. (2)

දස්සනෙන පහාතබ්බඤ්ච නදස්සනෙන පහාතබ්බඤ්ච ධම්මං පච්චයා දස්සනෙන පහාතබ්බො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො මොහො. (1)