1-7. පටිච්චවාරාදි
පච්චයචතුක්කං
හෙතුපච්චයො
267. කුසලං සහෙතුකඤ්චෙව න ච හෙතුං ධම්මං පටිච්ච කුසලො සහෙතුකො චෙව න ච හෙතු ධම්මො උප්පජ්ජති හෙතුපච්චයා. (1)
අකුසලං සහෙතුකඤ්චෙව න ච හෙතුං ධම්මං පටිච්ච අකුසලො සහෙතුකො චෙව න ච හෙතු ධම්මො උප්පජ්ජති හෙතුපච්චයා. (1)
අබ්‍යාකතං සහෙතුකඤ්චෙව න ච හෙතුං ධම්මං පටිච්ච අබ්‍යාකතො සහෙතුකො චෙව න ච හෙතු ධම්මො උප්පජ්ජති හෙතුපච්චයා (සංඛිත්තං).
268. හෙතුයා තීණි, ආරම්මණෙ තීණි…පෙ… අවිගතෙ තීණි (සංඛිත්තං).
නඅධිපතියා තීණි…පෙ… නවිප්පයුත්තෙ තීණි (සංඛිත්තං).
(සහජාතවාරම්පි…පෙ… සම්පයුත්තවාරම්පි පටිච්චවාරසදිසං.)
ආරම්මණපච්චයො
269. කුසලො සහෙතුකො චෙව න ච හෙතු ධම්මො කුසලස්ස සහෙතුකස්ස චෙව න ච හෙතුස්ස ධම්මස්ස ආරම්මණපච්චයෙන පච්චයො… තීණි.
අකුසලො සහෙතුකො චෙව න ච හෙතු ධම්මො අකුසලස්ස සහෙතුකස්ස චෙව න ච හෙතුස්ස ධම්මස්ස ආරම්මණපච්චයෙන පච්චයො… තීණි.
අබ්‍යාකතො සහෙතුකො චෙව න ච හෙතු ධම්මො අබ්‍යාකතස්ස සහෙතුකස්ස චෙව න ච හෙතුස්ස ධම්මස්ස ආරම්මණපච්චයෙන පච්චයො… තීණි (සංඛිත්තං).
270. ආරම්මණෙ නව, අධිපතියා සත්ත, අනන්තරෙ පඤ්ච…පෙ… සහජාතෙ තීණි…පෙ… උපනිස්සයෙ නව…පෙ… අවිගතෙ තීණි (සංඛිත්තං).
නහෙතුයා නව, නආරම්මණෙ නව (සංඛිත්තං).
ආරම්මණපච්චයා නහෙතුයා නව (සංඛිත්තං).
නහෙතුපච්චයා ආරම්මණෙ නව (සංඛිත්තං).
(යථා කුසලත්තිකෙ පඤ්හාවාරං, එවං විත්ථාරෙතබ්බං.)