1-7. පටිච්චවාරාදි

පච්චයචතුක්කං

හෙතුපච්චයො

227. අජ්ඣත්තං නහෙතුං ධම්මං පටිච්ච අජ්ඣත්තො නහෙතු ධම්මො උප්පජ්ජති හෙතුපච්චයා. (1)

බහිද්ධා නහෙතුං ධම්මං පටිච්ච බහිද්ධා නහෙතු ධම්මො උප්පජ්ජති හෙතුපච්චයා. (1) (සංඛිත්තං.)

228. හෙතුයා ද්වෙ, ආරම්මණෙ ද්වෙ…පෙ… අවිගතෙ ද්වෙ (සංඛිත්තං).

නහෙතුයා ද්වෙ, නඅධිපතියා ද්වෙ…පෙ… නවිප්පයුත්තෙ ද්වෙ (සංඛිත්තං).

(සහජාතවාරම්පි…පෙ… සම්පයුත්තවාරම්පි පටිච්චවාරසදිසං විත්ථාරෙතබ්බං.)

ආරම්මණපච්චයො

229. අජ්ඣත්තො නහෙතු ධම්මො අජ්ඣත්තස්ස නහෙතුස්ස ධම්මස්ස ආරම්මණපච්චයෙන පච්චයො. අජ්ඣත්තො නහෙතු ධම්මො බහිද්ධා නහෙතුස්ස ධම්මස්ස ආරම්මණපච්චයෙන පච්චයො. (2)

බහිද්ධා නහෙතු ධම්මො බහිද්ධා නහෙතුස්ස ධම්මස්ස ආරම්මණපච්චයෙන පච්චයො. බහිද්ධා නහෙතු ධම්මො අජ්ඣත්තස්ස නහෙතුස්ස ධම්මස්ස ආරම්මණපච්චයෙන පච්චයො. (2) (සංඛිත්තං.)

230. ආරම්මණෙ චත්තාරි, අධිපතියා චත්තාරි, අනන්තරෙ ද්වෙ …පෙ… උපනිස්සයෙ චත්තාරි…පෙ… අවිගතෙ ඡ (සංඛිත්තං).

නහෙතුයා ඡ, නආරම්මණෙ ඡ (සංඛිත්තං).

ආරම්මණපච්චයා නහෙතුයා චත්තාරි (සංඛිත්තං).

නහෙතුපච්චයා ආරම්මණෙ චත්තාරි (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)