7. පඤ්හාවාරො

පච්චයචතුක්කං

හෙතුපච්චයාදි

205. උප්පන්නො හෙතු ධම්මො උප්පන්නස්ස හෙතුස්ස ධම්මස්ස හෙතුපච්චයෙන පච්චයො – උප්පන්නා හෙතූ සම්පයුත්තකානං හෙතූනං හෙතුපච්චයෙන පච්චයො; පටිසන්ධික්ඛණෙ…පෙ…. (1)

අනුප්පන්නො හෙතු ධම්මො උප්පන්නස්ස හෙතුස්ස ධම්මස්ස ආරම්මණපච්චයෙන පච්චයො – අනුප්පන්නා හෙතූ චෙතොපරියඤාණස්ස අනාගතංසඤාණස්ස ආරම්මණපච්චයෙන පච්චයො. උප්පාදී හෙතු ධම්මො උප්පන්නස්ස හෙතුස්ස ධම්මස්ස ආරම්මණපච්චයෙන පච්චයො – උප්පාදී හෙතූ චෙතොපරියඤාණස්ස අනාගතංසඤාණස්ස ආරම්මණපච්චයෙන පච්චයො. (2)

උප්පන්නො හෙතු ධම්මො උප්පන්නස්ස හෙතුස්ස ධම්මස්ස අධිපතිපච්චයෙන පච්චයො… තීණි.

සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො… උපනිස්සයපච්චයෙන පච්චයො… විපාකපච්චයෙන පච්චයො… ඉන්ද්‍රියපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චයො… අත්ථිපච්චයෙන පච්චයො…පෙ… අවිගතපච්චයෙන පච්චයො.

206. හෙතුයා එකං, ආරම්මණෙ ද්වෙ, අධිපතියා තීණි, සහජාතෙ එකං, අඤ්ඤමඤ්ඤෙ එකං, නිස්සයෙ එකං, උපනිස්සයෙ ද්වෙ…පෙ… අවිගතෙ එකං (සංඛිත්තං).

නහෙතුයා ද්වෙ, නආරම්මණෙ ද්වෙ (සංඛිත්තං).

හෙතුපච්චයා නආරම්මණෙ එකං (සංඛිත්තං).

නහෙතුපච්චයා ආරම්මණෙ ද්වෙ (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)

නහෙතුපදං

ආරම්මණපච්චයාදි

207. උප්පන්නො නහෙතු ධම්මො උප්පන්නස්ස නහෙතුස්ස ධම්මස්ස ආරම්මණපච්චයෙන පච්චයො. (1)

අනුප්පන්නො නහෙතු ධම්මො උප්පන්නස්ස නහෙතුස්ස ධම්මස්ස ආරම්මණපච්චයෙන පච්චයො. (1)

උප්පාදී නහෙතු ධම්මො උප්පන්නස්ස නහෙතුස්ස ධම්මස්ස ආරම්මණපච්චයෙන පච්චයො. (1)

208. උප්පන්නො නහෙතු ධම්මො උප්පන්නස්ස නහෙතුස්ස ධම්මස්ස අධිපතිපච්චයෙන පච්චයො. (1)

අනුප්පන්නො නහෙතු ධම්මො උප්පන්නස්ස නහෙතුස්ස ධම්මස්ස අධිපතිපච්චයෙන පච්චයො. (1)

උප්පාදී නහෙතු ධම්මො උප්පන්නස්ස නහෙතුස්ස ධම්මස්ස අධිපතිපච්චයෙන පච්චයො. (1)

උප්පන්නො නහෙතු ධම්මො උප්පන්නස්ස නහෙතුස්ස ධම්මස්ස සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො… උපනිස්සයපච්චයෙන පච්චයො.

අනුප්පන්නො නහෙතු ධම්මො උප්පන්නස්ස නහෙතුස්ස ධම්මස්ස උපනිස්සයපච්චයෙන පච්චයො.

උප්පාදී නහෙතු ධම්මො උප්පන්නස්ස නහෙතුස්ස ධම්මස්ස උපනිස්සයපච්චයෙන පච්චයො (සංඛිත්තං).

209. ආරම්මණෙ තීණි, අධිපතියා තීණි, සහජාතෙ එකං, අඤ්ඤමඤ්ඤෙ එකං, නිස්සයෙ එකං, උපනිස්සයෙ තීණි…පෙ… අවිගතෙ එකං (සංඛිත්තං).

නහෙතුයා තීණි, නආරම්මණෙ තීණි (සංඛිත්තං).

ආරම්මණපච්චයා නහෙතුයා තීණි (සංඛිත්තං).

නහෙතුපච්චයා ආරම්මණෙ තීණි (සංඛිත්තං).