1-7. පටිච්චවාරාදි

පච්චයචතුක්කං

හෙතුපච්චයො

186. මිච්ඡත්තනියතං නහෙතුං ධම්මං පටිච්ච මිච්ඡත්තනියතො නහෙතු ධම්මො උප්පජ්ජති හෙතුපච්චයා… තීණි.

සම්මත්තනියතං නහෙතුං ධම්මං පටිච්ච සම්මත්තනියතො නහෙතු ධම්මො උප්පජ්ජති හෙතුපච්චයා. සම්මත්තනියතං නහෙතුං ධම්මං පටිච්ච අනියතො නහෙතු ධම්මො උප්පජ්ජති හෙතුපච්චයා. සම්මත්තනියතං නහෙතුං ධම්මං පටිච්ච සම්මත්තනියතො නහෙතු ච අනියතො නහෙතු ච ධම්මා උප්පජ්ජන්ති හෙතුපච්චයා. (3)

අනියතං නහෙතුං ධම්මං පටිච්ච අනියතො නහෙතු ධම්මො උප්පජ්ජති හෙතුපච්චයා. (1)

මිච්ඡත්තනියතං නහෙතුඤ්ච අනියතං නහෙතුඤ්ච ධම්මං පටිච්ච අනියතො නහෙතු ධම්මො උප්පජ්ජති හෙතුපච්චයා. (1)

සම්මත්තනියතං නහෙතුඤ්ච අනියතං නහෙතුඤ්ච ධම්මං පටිච්ච අනියතො නහෙතු ධම්මො උප්පජ්ජති හෙතුපච්චයා. (1) (සංඛිත්තං.)

187. හෙතුයා නව, ආරම්මණෙ තීණි, අධිපතියා නව…පෙ… විපාකෙ එකං…පෙ… අවිගතෙ නව (සංඛිත්තං).

පච්චනීයං

නහෙතුපච්චයො

188. අනියතං නහෙතුං ධම්මං පටිච්ච අනියතො නහෙතු ධම්මො උප්පජ්ජති නහෙතුපච්චයා (සංඛිත්තං).

නහෙතුයා එකං, නආරම්මණෙ පඤ්ච, නඅධිපතියා තීණි…පෙ… නොවිගතෙ පඤ්ච (සංඛිත්තං).

හෙතුපච්චයා නආරම්මණෙ පඤ්ච (සංඛිත්තං).

නහෙතුපච්චයා ආරම්මණෙ එකං (සංඛිත්තං).

(සහජාතවාරම්පි…පෙ… සම්පයුත්තවාරම්පි පටිච්චවාරසදිසං විත්ථාරෙතබ්බං.)

ආරම්මණ-අධිපති-අනන්තරපච්චයා

189. මිච්ඡත්තනියතො නහෙතු ධම්මො අනියතස්ස නහෙතුස්ස ධම්මස්ස ආරම්මණපච්චයෙන පච්චයො. (1)

සම්මත්තනියතො නහෙතු ධම්මො අනියතස්ස නහෙතුස්ස ධම්මස්ස ආරම්මණපච්චයෙන පච්චයො. (1)

අනියතො නහෙතු ධම්මො අනියතස්ස නහෙතුස්ස ධම්මස්ස ආරම්මණපච්චයෙන පච්චයො. අනියතො නහෙතු ධම්මො මිච්ඡත්තනියතස්ස නහෙතුස්ස ධම්මස්ස ආරම්මණපච්චයෙන පච්චයො. අනියතො නහෙතු ධම්මො සම්මත්තනියතස්ස නහෙතුස්ස ධම්මස්ස ආරම්මණපච්චයෙන පච්චයො. (3)

190. මිච්ඡත්තනියතො නහෙතු ධම්මො මිච්ඡත්තනියතස්ස නහෙතුස්ස ධම්මස්ස අධිපතිපච්චයෙන පච්චයො… තීණි.

සම්මත්තනියතො නහෙතු ධම්මො සම්මත්තනියතස්ස නහෙතුස්ස ධම්මස්ස අධිපතිපච්චයෙන පච්චයො. සම්මත්තනියතො නහෙතු ධම්මො අනියතස්ස නහෙතුස්ස ධම්මස්ස අධිපතිපච්චයෙන පච්චයො. සම්මත්තනියතො නහෙතු ධම්මො සම්මත්තනියතස්ස නහෙතුස්ස ච අනියතස්ස නහෙතුස්ස ච ධම්මස්ස අධිපතිපච්චයෙන පච්චයො. (3)

අනියතො නහෙතු ධම්මො අනියතස්ස නහෙතුස්ස ධම්මස්ස අධිපතිපච්චයෙන පච්චයො. අනියතො නහෙතු ධම්මො සම්මත්තනියතස්ස නහෙතුස්ස ධම්මස්ස අධිපතිපච්චයෙන පච්චයො. (2)

මිච්ඡත්තනියතො නහෙතු ධම්මො අනියතස්ස නහෙතුස්ස ධම්මස්ස අනන්තරපච්චයෙන පච්චයො. (1)

සම්මත්තනියතො නහෙතු ධම්මො අනියතස්ස නහෙතුස්ස ධම්මස්ස අනන්තරපච්චයෙන පච්චයො. (1)

අනියතො නහෙතු ධම්මො අනියතස්ස නහෙතුස්ස ධම්මස්ස අනන්තරපච්චයෙන පච්චයො. අනියතො නහෙතු ධම්මො මිච්ඡත්තනියතස්ස නහෙතුස්ස ධම්මස්ස අනන්තරපච්චයෙන පච්චයො. අනියතො නහෙතු ධම්මො සම්මත්තනියතස්ස නහෙතුස්ස ධම්මස්ස අනන්තරපච්චයෙන පච්චයො. (3) (සංඛිත්තං.)

191. ආරම්මණෙ පඤ්ච, අධිපතියා අට්ඨ, අනන්තරෙ පඤ්ච, සමනන්තරෙ පඤ්ච, සහජාතෙ නව, අඤ්ඤමඤ්ඤෙ තීණි, නිස්සයෙ තෙරස, උපනිස්සයෙ සත්ත…පෙ… අවිගතෙ තෙරස (සංඛිත්තං).

නහෙතුයා තෙරස, නආරම්මණෙ තෙරස, නඅධිපතියා තෙරස (සංඛිත්තං).

ආරම්මණපච්චයා නහෙතුයා පඤ්ච (සංඛිත්තං).

නහෙතුපච්චයා ආරම්මණෙ පඤ්ච (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)