7. පඤ්හාවාරො

පච්චයචතුක්කං

ආරම්මණපච්චයො

94. සවිතක්කසවිචාරො නහෙතු ධම්මො සවිතක්කසවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. සවිතක්කසවිචාරො නහෙතු ධම්මො අවිතක්කවිචාරමත්තස්ස නහෙතුස්ස ධම්මස්ස ආරම්මණපච්චයෙන පච්චයො. සවිතක්කසවිචාරො නහෙතු ධම්මො අවිතක්කඅවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. සවිතක්කසවිචාරො නහෙතු ධම්මො සවිතක්කසවිචාරස්ස නහෙතුස්ස ච අවිතක්කවිචාරමත්තස්ස නහෙතුස්ස ච ධම්මස්ස ආරම්මණපච්චයෙන පච්චයො… චත්තාරි.

95. අවිතක්කවිචාරමත්තො නහෙතු ධම්මො අවිතක්කවිචාරමත්තස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කවිචාරමත්තො නහෙතු ධම්මො සවිතක්කසවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කවිචාරමත්තො නහෙතු ධම්මො අවිතක්කඅවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කවිචාරමත්තො නහෙතු ධම්මො සවිතක්කසවිචාරස්ස නහෙතුස්ස ච අවිතක්කවිචාරමත්තස්ස නහෙතුස්ස ච ධම්මස්ස ආරම්මණපච්චයෙන පච්චයො… චත්තාරි.

96. අවිතක්කඅවිචාරො නහෙතු ධම්මො අවිතක්කඅවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කඅවිචාරො නහෙතු ධම්මො සවිතක්කසවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කඅවිචාරො නහෙතු ධම්මො අවිතක්කවිචාරමත්තස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කඅවිචාරො නහෙතු ධම්මො අවිතක්කවිචාරමත්තස්ස නහෙතුස්ස ච අවිතක්කඅවිචාරස්ස නහෙතුස්ස ච ධම්මස්ස ආරම්මණපච්චයෙන පච්චයො. අවිතක්කඅවිචාරො නහෙතු ධම්මො සවිතක්කසවිචාරස්ස නහෙතුස්ස ච අවිතක්කවිචාරමත්තස්ස නහෙතුස්ස ච ධම්මස්ස ආරම්මණපච්චයෙන පච්චයො… පඤ්ච.

97. අවිතක්කවිචාරමත්තො නහෙතු ච අවිතක්කඅවිචාරො නහෙතු ච ධම්මා සවිතක්කසවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කවිචාරමත්තො නහෙතු ච අවිතක්කඅවිචාරො නහෙතු ච ධම්මා අවිතක්කවිචාරමත්තස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කවිචාරමත්තො නහෙතු ච අවිතක්කඅවිචාරො නහෙතු ච ධම්මා අවිතක්කඅවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. අවිතක්කවිචාරමත්තො නහෙතු ච අවිතක්කඅවිචාරො නහෙතු ච ධම්මා සවිතක්කසවිචාරස්ස නහෙතුස්ස ච අවිතක්කවිචාරමත්තස්ස නහෙතුස්ස ච ධම්මස්ස ආරම්මණපච්චයෙන පච්චයො… චත්තාරි.

98. සවිතක්කසවිචාරො නහෙතු ච අවිතක්කවිචාරමත්තො නහෙතු ච ධම්මා සවිතක්කසවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. සවිතක්කසවිචාරො නහෙතු ච අවිතක්කවිචාරමත්තො නහෙතු ච ධම්මා අවිතක්කවිචාරමත්තස්ස නහෙතුස්ස ධම්මස්ස ආරම්මණපච්චයෙන පච්චයො. සවිතක්කසවිචාරො නහෙතු ච අවිතක්කවිචාරමත්තො නහෙතු ච ධම්මා අවිතක්කඅවිචාරස්ස නහෙතුස්ස ධම්මස්ස ආරම්මණපච්චයෙන පච්චයො. සවිතක්කසවිචාරො නහෙතු ච අවිතක්කවිචාරමත්තො නහෙතු ච ධම්මා සවිතක්කසවිචාරස්ස නහෙතුස්ස ච අවිතක්කවිචාරමත්තස්ස නහෙතුස්ස ච ධම්මස්ස ආරම්මණපච්චයෙන පච්චයො… චත්තාරි.

අධිපතිපච්චයො

99. සවිතක්කසවිචාරො නහෙතු ධම්මො සවිතක්කසවිචාරස්ස නහෙතුස්ස ධම්මස්ස අධිපතිපච්චයෙන පච්චයො… සත්ත.

අවිතක්කවිචාරමත්තො නහෙතු ධම්මො අවිතක්කවිචාරමත්තස්ස නහෙතුස්ස ධම්මස්ස අධිපතිපච්චයෙන පච්චයො… පඤ්ච.

අවිතක්කඅවිචාරො නහෙතු ධම්මො අවිතක්කඅවිචාරස්ස නහෙතුස්ස ධම්මස්ස අධිපතිපච්චයෙන පච්චයො… පඤ්ච.

අවිතක්කවිචාරමත්තො නහෙතු ච අවිතක්කඅවිචාරො නහෙතු ච ධම්මා සවිතක්කසවිචාරස්ස නහෙතුස්ස ධම්මස්ස අධිපතිපච්චයෙන පච්චයො… තීණි.

සවිතක්කසවිචාරො නහෙතු ච අවිතක්කවිචාරමත්තො නහෙතු ච ධම්මා සවිතක්කසවිචාරස්ස නහෙතුස්ස ධම්මස්ස අධිපතිපච්චයෙන පච්චයො… තීණි.

අනන්තරපච්චයාදි

100. සවිතක්කසවිචාරො නහෙතු ධම්මො සවිතක්කසවිචාරස්ස නහෙතුස්ස ධම්මස්ස අනන්තරපච්චයෙන පච්චයො…පෙ… සමනන්තරපච්චයෙන පච්චයො.

සවිතක්කසවිචාරො නහෙතු ධම්මො සවිතක්කසවිචාරස්ස නහෙතුස්ස ධම්මස්ස උපනිස්සයපච්චයෙන පච්චයො (සංඛිත්තං).

101. ආරම්මණෙ එකවීස, අධිපතියා තෙවීස, අනන්තරෙ පඤ්චවීස, සමනන්තරෙ පඤ්චවීස, සහජාතෙ තිංස, අඤ්ඤමඤ්ඤෙ අට්ඨවීස, නිස්සයෙ තිංස, උපනිස්සයෙ පඤ්චවීස, පුරෙජාතෙ පඤ්ච, පච්ඡාජාතෙ පඤ්ච, ආසෙවනෙ එකවීස, කම්මෙ එකාදස, විපාකෙ එකවීස, ආහාරෙ එකාදස…පෙ… අවිගතෙ තිංස (සංඛිත්තං).

නහෙතුයා පඤ්චතිංස, නආරම්මණෙ පඤ්චතිංස, නඅධිපතියා පඤ්චතිංස (සංඛිත්තං).

ආරම්මණපච්චයා නහෙතුයා එකවීස (සංඛිත්තං).

නහෙතුපච්චයා ආරම්මණෙ එකවීස (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)