7. පඤ්හාවාරො

පච්චයචතුක්කං

ආරම්මණපච්චයාදි

32. සුඛාය වෙදනාය සම්පයුත්තො නහෙතු ධම්මො සුඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. සුඛාය වෙදනාය සම්පයුත්තො නහෙතු ධම්මො දුක්ඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. සුඛාය වෙදනාය සම්පයුත්තො නහෙතු ධම්මො අදුක්ඛමසුඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. (3)

දුක්ඛාය වෙදනාය සම්පයුත්තො නහෙතු ධම්මො දුක්ඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. දුක්ඛාය වෙදනාය සම්පයුත්තො නහෙතු ධම්මො සුඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. දුක්ඛාය වෙදනාය සම්පයුත්තො නහෙතු ධම්මො අදුක්ඛමසුඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. (3)

අදුක්ඛමසුඛාය වෙදනාය සම්පයුත්තො නහෙතු ධම්මො අදුක්ඛමසුඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. අදුක්ඛමසුඛාය වෙදනාය සම්පයුත්තො නහෙතු ධම්මො සුඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. අදුක්ඛමසුඛාය වෙදනාය සම්පයුත්තො නහෙතු ධම්මො දුක්ඛාය වෙදනාය සම්පයුත්තස්ස නහෙතුස්ස ධම්මස්ස ආරම්මණපච්චයෙන පච්චයො. (3)

33. සුඛාය වෙදනාය සම්පයුත්තො නහෙතු ධම්මො සුඛාය වෙදනාය සම්පයුත්තස්ස නහෙතුස්ස ධම්මස්ස අධිපතිපච්චයෙන පච්චයො. සුඛාය වෙදනාය සම්පයුත්තො නහෙතු ධම්මො අදුක්ඛමසුඛාය වෙදනාය සම්පයුත්තස්ස නහෙතුස්ස ධම්මස්ස අධිපතිපච්චයෙන පච්චයො. (2)

දුක්ඛාය වෙදනාය සම්පයුත්තො නහෙතු ධම්මො දුක්ඛාය වෙදනාය සම්පයුත්තස්ස නහෙතුස්ස ධම්මස්ස අධිපතිපච්චයෙන පච්චයො. (1)

අදුක්ඛමසුඛාය වෙදනාය සම්පයුත්තො නහෙතු ධම්මො අදුක්ඛමසුඛාය වෙදනාය සම්පයුත්තස්ස නහෙතුස්ස ධම්මස්ස අධිපතිපච්චයෙන පච්චයො. අදුක්ඛමසුඛාය වෙදනාය සම්පයුත්තො නහෙතු ධම්මො සුඛාය වෙදනාය සම්පයුත්තස්ස නහෙතුස්ස ධම්මස්ස අධිපතිපච්චයෙන පච්චයො. (2)

අනන්තර-උපනිස්සයපච්චයා

34. සුඛාය වෙදනාය සම්පයුත්තො නහෙතු ධම්මො සුඛාය වෙදනාය සම්පයුත්තස්ස නහෙතුස්ස ධම්මස්ස අනන්තරපච්චයෙන පච්චයො… ද්වෙ.

දුක්ඛාය වෙදනාය සම්පයුත්තො නහෙතු ධම්මො දුක්ඛාය වෙදනාය සම්පයුත්තස්ස නහෙතුස්ස ධම්මස්ස අනන්තරපච්චයෙන පච්චයො… ද්වෙ.

අදුක්ඛමසුඛාය වෙදනාය සම්පයුත්තො නහෙතු ධම්මො අදුක්ඛමසුඛාය වෙදනාය සම්පයුත්තස්ස නහෙතුස්ස ධම්මස්ස අනන්තරපච්චයෙන පච්චයො… තීණි…පෙ….

35. සුඛාය වෙදනාය සම්පයුත්තො නහෙතු ධම්මො සුඛාය වෙදනාය සම්පයුත්තස්ස නහෙතුස්ස ධම්මස්ස උපනිස්සයපච්චයෙන පච්චයො… තීණි.

දුක්ඛාය වෙදනාය සම්පයුත්තො නහෙතු ධම්මො දුක්ඛාය වෙදනාය සම්පයුත්තස්ස නහෙතුස්ස ධම්මස්ස උපනිස්සයපච්චයෙන පච්චයො… තීණි.

අදුක්ඛමසුඛාය වෙදනාය සම්පයුත්තො නහෙතු ධම්මො අදුක්ඛමසුඛාය වෙදනාය සම්පයුත්තස්ස නහෙතුස්ස ධම්මස්ස උපනිස්සයපච්චයෙන පච්චයො… තීණි (සංඛිත්තං).

36. ආරම්මණෙ නව, අධිපතියා පඤ්ච, අනන්තරෙ සත්ත, සමනන්තරෙ සත්ත, සහජාතෙ තීණි, අඤ්ඤමඤ්ඤෙ තීණි, නිස්සයෙ තීණි, උපනිස්සයෙ නව, ආසෙවනෙ තීණි, කම්මෙ අට්ඨ, විපාකෙ තීණි, ආහාරෙ තීණි, ඉන්ද්‍රියෙ තීණි, ඣානෙ තීණි, මග්ගෙ තීණි, සම්පයුත්තෙ තීණි, අත්ථියා තීණි, නත්ථියා සත්ත, විගතෙ සත්ත, අවිගතෙ තීණි (සංඛිත්තං).

නහෙතුයා නව, නආරම්මණෙ නව (සංඛිත්තං).

ආරම්මණපච්චයා නහෙතුයා නව (සංඛිත්තං).

නහෙතුපච්චයා ආරම්මණෙ නව (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)