7. පඤ්හාවාරො
හෙතු-ආරම්මණපච්චයා
25. සවිතක්කො කුසලො ධම්මො සවිතක්කස්ස කුසලස්ස ධම්මස්ස හෙතුපච්චයෙන පච්චයො. සවිතක්කො කුසලො ධම්මො අවිතක්කස්ස කුසලස්ස ධම්මස්ස හෙතුපච්චයෙන පච්චයො. සවිතක්කො කුසලො ධම්මො සවිතක්කස්ස කුසලස්ස ච අවිතක්කස්ස කුසලස්ස ච ධම්මස්ස හෙතුපච්චයෙන පච්චයො. (3)
අවිතක්කො කුසලො ධම්මො අවිතක්කස්ස කුසලස්ස ධම්මස්ස හෙතුපච්චයෙන පච්චයො. (1)
සවිතක්කො කුසලො ධම්මො සවිතක්කස්ස කුසලස්ස ධම්මස්ස ආරම්මණපච්චයෙන පච්චයො… තීණි.
අවිතක්කො කුසලො ධම්මො අවිතක්කස්ස කුසලස්ස ධම්මස්ස ආරම්මණපච්චයෙන පච්චයො… තීණි.
සවිතක්කො කුසලො ච අවිතක්කො කුසලො ච ධම්මා සවිතක්කස්ස කුසලස්ස ධම්මස්ස ආරම්මණපච්චයෙන පච්චයො… තීණි (සංඛිත්තං).
26. හෙතුයා චත්තාරි, ආරම්මණෙ නව, අධිපතියා නව (හෙට්ඨා තීසු සහජාතාධිපති, අවිතක්කෙ එකං, සහජාතාධිපති), අනන්තරෙ නව, සමනන්තරෙ නව, සහජාතෙ ඡ…පෙ… උපනිස්සයෙ නව, ආසෙවනෙ නව, කම්මෙ චත්තාරි, ආහාරෙ චත්තාරි, ඉන්ද්‍රියෙ චත්තාරි, ඣානෙ ඡ, මග්ගෙ ඡ, සම්පයුත්තෙ ඡ, අත්ථියා ඡ, නත්ථියා නව, විගතෙ නව, අවිගතෙ ඡ (සංඛිත්තං).
නහෙතුයා නව, නආරම්මණෙ නව (සංඛිත්තං).
හෙතුපච්චයා නආරම්මණෙ චත්තාරි (සංඛිත්තං).
නහෙතුපච්චයා ආරම්මණෙ නව (සංඛිත්තං).
(යථා කුසලත්තිකෙ පඤ්හාවාරං, එවං විත්ථාරෙතබ්බං.)
අකුසලපදං
27. සවිතක්කං අකුසලං ධම්මං පටිච්ච සවිතක්කො අකුසලො ධම්මො උප්පජ්ජති හෙතුපච්චයා. සවිතක්කං අකුසලං ධම්මං පටිච්ච අවිතක්කො අකුසලො ධම්මො උප්පජ්ජති හෙතුපච්චයා. සවිතක්කං අකුසලං ධම්මං පටිච්ච සවිතක්කො අකුසලො ච අවිතක්කො අකුසලො ච ධම්මා උප්පජ්ජන්ති හෙතුපච්චයා. (3)
අවිතක්කං අකුසලං ධම්මං පටිච්ච සවිතක්කො අකුසලො ධම්මො උප්පජ්ජති හෙතුපච්චයා. (1)
සවිතක්කං අකුසලඤ්ච අවිතක්කං අකුසලඤ්ච ධම්මං පටිච්ච සවිතක්කො අකුසලො ධම්මො උප්පජ්ජති හෙතුපච්චයා. (1) (සංඛිත්තං.)
28. හෙතුයා පඤ්ච, ආරම්මණෙ පඤ්ච (සබ්බත්ථ පඤ්ච)…පෙ… අවිගතෙ පඤ්ච (සංඛිත්තං).
29. සවිතක්කං අකුසලං ධම්මං පටිච්ච සවිතක්කො අකුසලො ධම්මො උප්පජ්ජති නහෙතුපච්චයා. (1)
අවිතක්කං අකුසලං ධම්මං පටිච්ච සවිතක්කො අකුසලො ධම්මො උප්පජ්ජති නහෙතුපච්චයා. (1)
සවිතක්කං අකුසලඤ්ච අවිතක්කං අකුසලඤ්ච ධම්මං පටිච්ච සවිතක්කො අකුසලො ධම්මො උප්පජ්ජති නහෙතුපච්චයා. (1) (සංඛිත්තං.)
30. නහෙතුයා තීණි, නඅධිපතියා පඤ්ච, නකම්මෙ තීණි…පෙ… නවිප්පයුත්තෙ පඤ්ච. (සංඛිත්තං. සහජාතවාරාදි විත්ථාරෙතබ්බො.)
31. සවිතක්කො අකුසලො ධම්මො සවිතක්කස්ස අකුසලස්ස ධම්මස්ස හෙතුපච්චයෙන පච්චයො (සංඛිත්තං).
32. හෙතුයා තීණි, ආරම්මණෙ නව, අධිපතියා නව, අනන්තරෙ නව…පෙ… සහජාතෙ පඤ්ච…පෙ… උපනිස්සයෙ නව, ආසෙවනෙ නව, කම්මෙ තීණි, ආහාරෙ තීණි…පෙ… ඣානෙ පඤ්ච, මග්ගෙ පඤ්ච, සම්පයුත්තෙ පඤ්ච, අත්ථියා පඤ්ච, නත්ථියා නව…පෙ… අවිගතෙ පඤ්ච (සංඛිත්තං).
අබ්‍යාකතපදං
33. සවිතක්කං අබ්‍යාකතං ධම්මං පටිච්ච සවිතක්කො අබ්‍යාකතො ධම්මො උප්පජ්ජති හෙතුපච්චයා… තීණි.
අවිතක්කං අබ්‍යාකතං ධම්මං පටිච්ච අවිතක්කො අබ්‍යාකතො ධම්මො උප්පජ්ජති හෙතුපච්චයා… තීණි.
සවිතක්කං අබ්‍යාකතඤ්ච අවිතක්කං අබ්‍යාකතඤ්ච ධම්මං පටිච්ච සවිතක්කො අබ්‍යාකතො ධම්මො උප්පජ්ජති හෙතුපච්චයා… තීණි (සංඛිත්තං).
34. හෙතුයා නව, ආරම්මණෙ නව…පෙ… පුරෙජාතෙ ආසෙවනෙ ඡ…පෙ… අවිගතෙ නව (සංඛිත්තං).
නහෙතුයා නව, නආරම්මණෙ තීණි, නඅධිපතියා නව…පෙ… නපුරෙජාතෙ නව…පෙ… නකම්මෙ චත්තාරි, නවිපාකෙ නව, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ නව, නසම්පයුත්තෙ තීණි, නවිප්පයුත්තෙ ඡ…පෙ… නොවිගතෙ තීණි (සංඛිත්තං. සහජාතවාරම්පි…පෙ… සම්පයුත්තවාරම්පි විත්ථාරෙතබ්බං).
35. සවිතක්කො අබ්‍යාකතො ධම්මො සවිතක්කස්ස අබ්‍යාකතස්ස ධම්මස්ස හෙතුපච්චයෙන පච්චයො… තීණි.
අවිතක්කො අබ්‍යාකතො ධම්මො අවිතක්කස්ස අබ්‍යාකතස්ස ධම්මස්ස හෙතුපච්චයෙන පච්චයො. (1)
සවිතක්කො අබ්‍යාකතො ධම්මො සවිතක්කස්ස අබ්‍යාකතස්ස ධම්මස්ස ආරම්මණපච්චයෙන පච්චයො (සංඛිත්තං).
36. හෙතුයා චත්තාරි, ආරම්මණෙ නව, අධිපතියා නව (සබ්බත්ථ නව), උපනිස්සයෙ නව, පුරෙජාතෙ තීණි, පච්ඡාජාතෙ තීණි, ආසෙවනෙ නව, කම්මෙ චත්තාරි, විපාකෙ නව, ආහාරෙ චත්තාරි…පෙ… ඣානෙ නව, මග්ගෙ නව, සම්පයුත්තෙ ඡ, විප්පයුත්තෙ පඤ්ච, අත්ථියා නව, නත්ථියා නව, විගතෙ නව, අවිගතෙ නව (සංඛිත්තං).
නහෙතුයා නව, නආරම්මණෙ නව (සංඛිත්තං).
හෙතුපච්චයා නආරම්මණෙ චත්තාරි (සංඛිත්තං).
නහෙතුපච්චයා ආරම්මණෙ නව (සංඛිත්තං).
(යථා කුසලත්තිකෙ පඤ්හාවාරං එවං විත්ථාරෙතබ්බං.)