1-7. පටිච්චවාරාදි

පච්චයචතුක්කං

හෙතුපච්චයො

15. උපාදානවිප්පයුත්තං කුසලං ධම්මං පටිච්ච උපාදානවිප්පයුත්තො කුසලො ධම්මො උප්පජ්ජති හෙතුපච්චයා (සංඛිත්තං).

හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ එකං.)

16. උපාදානසම්පයුත්තං අකුසලං ධම්මං පටිච්ච උපාදානසම්පයුත්තො අකුසලො ධම්මො උප්පජ්ජති හෙතුපච්චයා… තීණි.

උපාදානවිප්පයුත්තං අකුසලං ධම්මං පටිච්ච උපාදානවිප්පයුත්තො අකුසලො ධම්මො උප්පජ්ජති හෙතුපච්චයා… ද්වෙ.

උපාදානසම්පයුත්තං අකුසලඤ්ච උපාදානවිප්පයුත්තං අකුසලඤ්ච ධම්මං පටිච්ච උපාදානසම්පයුත්තො අකුසලො ධම්මො උප්පජ්ජති හෙතුපච්චයා (සංඛිත්තං).

17. හෙතුයා ඡ, ආරම්මණෙ ඡ (සබ්බත්ථ ඡ), අවිගතෙ ඡ (සංඛිත්තං).

නහෙතුයා එකං, නඅධිපතියා ඡ…පෙ… නකම්මෙ චත්තාරි, නවිපාකෙ ඡ, නවිප්පයුත්තෙ ඡ (සංඛිත්තං. සහජාතවාරාදි විත්ථාරෙතබ්බො).

18. උපාදානසම්පයුත්තො අකුසලො ධම්මො උපාදානසම්පයුත්තස්ස අකුසලස්ස ධම්මස්ස හෙතුපච්චයෙන පච්චයො… තීණි.

උපාදානවිප්පයුත්තො අකුසලො ධම්මො උපාදානවිප්පයුත්තස්ස අකුසලස්ස ධම්මස්ස හෙතුපච්චයෙන පච්චයො… ද්වෙ.

උපාදානසම්පයුත්තො අකුසලො ච උපාදානවිප්පයුත්තො අකුසලො ච ධම්මා උපාදානසම්පයුත්තස්ස අකුසලස්ස ධම්මස්ස හෙතුපච්චයෙන පච්චයො (සංඛිත්තං).

19. හෙතුයා ඡ, ආරම්මණෙ නව, අධිපතියා නව (උපාදානසම්පයුත්තමූලකෙ තීණි, සහජාතාධිපති, උපාදානවිප්පයුත්තෙ එකං), අනන්තරෙ නව, සමනන්තරෙ නව, සහජාතෙ ඡ, අඤ්ඤමඤ්ඤෙ ඡ, නිස්සයෙ ඡ, උපනිස්සයෙ නව, ආසෙවනෙ නව, කම්මෙ චත්තාරි, ආහාරෙ චත්තාරි, ඉන්ද්‍රියෙ චත්තාරි, ඣානෙ චත්තාරි, මග්ගෙ චත්තාරි, සම්පයුත්තෙ ඡ, අත්ථියා ඡ, නත්ථියා නව, විගතෙ නව, අවිගතෙ ඡ (සංඛිත්තං).

20. උපාදානවිප්පයුත්තං අබ්‍යාකතං ධම්මං පටිච්ච උපාදානවිප්පයුත්තො අබ්‍යාකතො ධම්මො උප්පජ්ජති හෙතුපච්චයා (සංඛිත්තං).

හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ එකං).