1-7. පටිච්චවාරාදි
පච්චයචතුක්කං
හෙතුපච්චයො
9. චිත්තං කුසලං ධම්මං පටිච්ච නොචිත්තො කුසලො ධම්මො උප්පජ්ජති හෙතුපච්චයා. (1)
නොචිත්තං කුසලං ධම්මං පටිච්ච නොචිත්තො කුසලො ධම්මො උප්පජ්ජති හෙතුපච්චයා. නොචිත්තං කුසලං ධම්මං පටිච්ච චිත්තො කුසලො ධම්මො උප්පජ්ජති හෙතුපච්චයා. නොචිත්තං කුසලං ධම්මං පටිච්ච චිත්තො කුසලො ච නොචිත්තො කුසලො ච ධම්මා උප්පජ්ජන්ති හෙතුපච්චයා. (3)
චිත්තං කුසලඤ්ච නොචිත්තං කුසලඤ්ච ධම්මං පටිච්ච නොචිත්තො කුසලො ධම්මො උප්පජ්ජති හෙතුපච්චයා. (1) (සංඛිත්තං.)
10. හෙතුයා පඤ්ච, ආරම්මණෙ පඤ්ච (සබ්බත්ථ පඤ්ච), අවිගතෙ පඤ්ච (සංඛිත්තං).
නඅධිපතියා පඤ්ච, නපුරෙජාතෙ පඤ්ච, නපච්ඡාජාතෙ පඤ්ච, නආසෙවනෙ පඤ්ච, නකම්මෙ තීණි, නවිපාකෙ පඤ්ච, නවිප්පයුත්තෙ පඤ්ච (සංඛිත්තං).
(සහජාතවාරම්පි…පෙ… සම්පයුත්තවාරම්පි විත්ථාරෙතබ්බං.)
11. නොචිත්තො කුසලො ධම්මො නොචිත්තස්ස කුසලස්ස ධම්මස්ස හෙතුපච්චයෙන පච්චයො. නොචිත්තො කුසලො ධම්මො චිත්තස්ස කුසලස්ස ධම්මස්ස හෙතුපච්චයෙන පච්චයො. නොචිත්තො කුසලො ධම්මො චිත්තස්ස කුසලස්ස ච නොචිත්තස්ස කුසලස්ස ච ධම්මස්ස හෙතුපච්චයෙන පච්චයො. (3) (සංඛිත්තං.)
12. හෙතුයා තීණි, ආරම්මණෙ නව, අධිපතියා නව, අනන්තරෙ නව…පෙ… සහජාතෙ අඤ්ඤමඤ්ඤෙ නිස්සයෙ පඤ්ච, උපනිස්සයෙ ආසෙවනෙ නව, කම්මෙ තීණි, ආහාරෙ ඉන්ද්‍රියෙ පඤ්ච, ඣානෙ මග්ගෙ තීණි, සම්පයුත්තෙ පඤ්ච…පෙ… අවිගතෙ පඤ්ච (සංඛිත්තං).
නහෙතුයා නව, නආරම්මණෙ නව (සංඛිත්තං).
හෙතුපච්චයා නආරම්මණෙ තීණි (සංඛිත්තං).
නහෙතුපච්චයා ආරම්මණෙ නව (සංඛිත්තං).
(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)
13. චිත්තං අකුසලං ධම්මං පටිච්ච නොචිත්තො අකුසලො ධම්මො උප්පජ්ජති හෙතුපච්චයා. (1)
නොචිත්තං අකුසලං ධම්මං පටිච්ච නොචිත්තො අකුසලො ධම්මො උප්පජ්ජති හෙතුපච්චයා. නොචිත්තං අකුසලං ධම්මං පටිච්ච චිත්තො අකුසලො ධම්මො උප්පජ්ජති හෙතුපච්චයා. නොචිත්තං අකුසලං ධම්මං පටිච්ච චිත්තො අකුසලො ච නොචිත්තො අකුසලො ච ධම්මා උප්පජ්ජන්ති හෙතුපච්චයා. (3)
චිත්තං අකුසලඤ්ච නොචිත්තං අකුසලඤ්ච ධම්මං පටිච්ච නොචිත්තො අකුසලො ධම්මො උප්පජ්ජති හෙතුපච්චයා. (1) (සංඛිත්තං.)
14. හෙතුයා පඤ්ච, ආරම්මණෙ පඤ්ච…පෙ… අවිගතෙ පඤ්ච. (සංඛිත්තං. චිත්තදුකකුසලසදිසං, නහෙතුයාපි කත්තබ්බං. සහජාතවාරම්පි…පෙ… පඤ්හාවාරම්පි කාතබ්බං).
15. චිත්තං අබ්‍යාකතං ධම්මං පටිච්ච නොචිත්තො අබ්‍යාකතො ධම්මො උප්පජ්ජති හෙතුපච්චයා. (1)
නොචිත්තං අබ්‍යාකතං ධම්මං පටිච්ච නොචිත්තො අබ්‍යාකතො ධම්මො උප්පජ්ජති හෙතුපච්චයා. නොචිත්තං අබ්‍යාකතං ධම්මං පටිච්ච චිත්තො අබ්‍යාකතො ධම්මො උප්පජ්ජති හෙතුපච්චයා. නොචිත්තං අබ්‍යාකතං ධම්මං පටිච්ච චිත්තො අබ්‍යාකතො ච නොචිත්තො අබ්‍යාකතො ච ධම්මා උප්පජ්ජන්ති හෙතුපච්චයා. (3)
චිත්තං අබ්‍යාකතඤ්ච නොචිත්තං අබ්‍යාකතඤ්ච ධම්මං පටිච්ච නොචිත්තො අබ්‍යාකතො ධම්මො උප්පජ්ජති හෙතුපච්චයා. (1) (සංඛිත්තං.)
16. හෙතුයා පඤ්ච, ආරම්මණෙ පඤ්ච…පෙ… විපාකෙ පඤ්ච…පෙ… අවිගතෙ පඤ්ච (සංඛිත්තං).
නහෙතුයා පඤ්ච, නආරම්මණෙ තීණි, නඅධිපතියා පඤ්ච…පෙ… නපුරෙජාතෙ නපච්ඡාජාතෙ නආසෙවනෙ පඤ්ච, නකම්මෙ තීණි, නවිපාකෙ පඤ්ච, නආහාරෙ එකං, නඉන්ද්‍රියෙ එකං, නඣානෙ පඤ්ච, නමග්ගෙ පඤ්ච, නසම්පයුත්තෙ තීණි, නවිප්පයුත්තෙ පඤ්ච…පෙ… නොවිගතෙ තීණි (සංඛිත්තං).
(සහජාතවාරම්පි…පෙ… සම්පයුත්තවාරම්පි විත්ථාරෙතබ්බං.)
17. නොචිත්තො අබ්‍යාකතො ධම්මො නොචිත්තස්ස අබ්‍යාකතස්ස ධම්මස්ස හෙතුපච්චයෙන පච්චයො… තීණි (චිත්තදුකකුසලසදිසං විත්ථාරෙතබ්බං).
18. හෙතුයා තීණි, ආරම්මණෙ නව, අධිපතියා නව, අනන්තරෙ නව…පෙ… සහජාතෙ පඤ්ච, පුරෙජාතෙ තීණි, ආසෙවනෙ නව, කම්මෙ තීණි, විපාකෙ පඤ්ච, විප්පයුත්තෙ පඤ්ච, අත්ථියා පඤ්ච, නත්ථියා නව…පෙ… අවිගතෙ පඤ්ච (සංඛිත්තං).