1-7. පටිච්චවාරාදි
පච්චයචතුක්කං
හෙතුපච්චයො
1. සාරම්මණං කුසලං ධම්මං පටිච්ච සාරම්මණො කුසලො ධම්මො උප්පජ්ජති හෙතුපච්චයා (යථා සප්පච්චයං කුසලං, එවං විත්ථාරෙතබ්බං.)
2. සාරම්මණං අකුසලං ධම්මං පටිච්ච සාරම්මණො අකුසලො ධම්මො උප්පජ්ජති හෙතුපච්චයා (යථා සප්පච්චයං අකුසලං, එවං කාතබ්බං.)
3. සාරම්මණං අබ්‍යාකතං ධම්මං පටිච්ච සාරම්මණො අබ්‍යාකතො ධම්මො උප්පජ්ජති හෙතුපච්චයා… තීණි.
අනාරම්මණං අබ්‍යාකතං ධම්මං පටිච්ච අනාරම්මණො අබ්‍යාකතො ධම්මො උප්පජ්ජති හෙතුපච්චයා… තීණි.
සාරම්මණං අබ්‍යාකතඤ්ච අනාරම්මණං අබ්‍යාකතඤ්ච ධම්මං පටිච්ච සාරම්මණො අබ්‍යාකතො ධම්මො උප්පජ්ජති හෙතුපච්චයා… තීණි (සංඛිත්තං).
4. හෙතුයා නව, ආරම්මණෙ තීණි, අධිපතියා පඤ්ච…පෙ… අඤ්ඤමඤ්ඤෙ ඡ…පෙ… පුරෙජාතෙ එකං, ආසෙවනෙ එකං (සංඛිත්තං).
නහෙතුයා නව, නආරම්මණෙ තීණි, නඅධිපතියා නව…පෙ… නකම්මෙ ද්වෙ, නවිපාකෙ පඤ්ච, නආහාරෙ එකං, නඉන්ද්‍රියෙ එකං, නඣානෙ ද්වෙ, නමග්ගෙ නව, නසම්පයුත්තෙ තීණි, නවිප්පයුත්තෙ ද්වෙ, නොනත්ථියා තීණි, නොවිගතෙ තීණි (සංඛිත්තං).
හෙතු-ආරම්මණ-අධිපතිපච්චයා
5. සාරම්මණො අබ්‍යාකතො ධම්මො සාරම්මණස්ස අබ්‍යාකතස්ස ධම්මස්ස හෙතුපච්චයෙන පච්චයො… තීණි.
6. සාරම්මණො අබ්‍යාකතො ධම්මො සාරම්මණස්ස අබ්‍යාකතස්ස ධම්මස්ස ආරම්මණපච්චයෙන පච්චයො. (1)
අනාරම්මණො අබ්‍යාකතො ධම්මො සාරම්මණස්ස අබ්‍යාකතස්ස ධම්මස්ස ආරම්මණපච්චයෙන පච්චයො.
7. සාරම්මණො අබ්‍යාකතො ධම්මො සාරම්මණස්ස අබ්‍යාකතස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි. අනාරම්මණො අබ්‍යාකතො ධම්මො සාරම්මණස්ස අබ්‍යාකතස්ස ධම්මස්ස අධිපතිපච්චයෙන පච්චයො – ආරම්මණාධිපති (සංඛිත්තං).
8. හෙතුයා තීණි, ආරම්මණෙ ද්වෙ, අධිපතියා චත්තාරි, අනන්තරෙ එකං…පෙ… සහජාතෙ සත්ත, අඤ්ඤමඤ්ඤෙ ඡ, නිස්සයෙ සත්ත, උපනිස්සයෙ ද්වෙ, පුරෙජාතෙ එකං, පච්ඡාජාතෙ එකං, ආසෙවනෙ එකං, කම්මෙ තීණි, විපාකෙ තීණි, සම්පයුත්තෙ එකං, විප්පයුත්තෙ ද්වෙ (සංඛිත්තං).