1. විභඞ්ගවාරො

හෙතුපච්චයො

87. පරාමට්ඨො චෙව නො ච පරාමාසො ධම්මො පරාමට්ඨස්ස චෙව නො ච පරාමාසස්ස ධම්මස්ස හෙතුපච්චයෙන පච්චයො – පරාමට්ඨා චෙව නො ච පරාමාසා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

පරාමට්ඨො චෙව නො ච පරාමාසො ධම්මො පරාමාසස්ස චෙව පරාමට්ඨස්ස ච ධම්මස්ස හෙතුපච්චයෙන පච්චයො – පරාමට්ඨා චෙව නො ච පරාමාසා හෙතූ පරාමාසස්ස හෙතුපච්චයෙන පච්චයො. (2)

පරාමට්ඨො චෙව නො ච පරාමාසො ධම්මො පරාමාසස්ස චෙව පරාමට්ඨස්ස ච පරාමට්ඨස්ස චෙව නො ච පරාමාසස්ස ච ධම්මස්ස හෙතුපච්චයෙන පච්චයො – පරාමට්ඨා චෙව නො ච පරාමාසා හෙතූ සම්පයුත්තකානං ඛන්ධානං පරාමාසස්ස ච චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

ආරම්මණපච්චයො

88. පරාමාසො චෙව පරාමට්ඨො ච ධම්මො පරාමාසස්ස චෙව පරාමට්ඨස්ස ච ධම්මස්ස ආරම්මණපච්චයෙන පච්චයො… තීණි (ආරබ්භ කාතබ්බානි පරාමාසදුකසදිසං).

89. පරාමට්ඨො චෙව නො ච පරාමාසො ධම්මො පරාමට්ඨස්ස චෙව නො ච පරාමාසස්ස ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං කත්වා තං පච්චවෙක්ඛති, අස්සාදෙති අභිනන්දති, තං ආරබ්භ රාගො…පෙ… විචිකිච්ඡා, උද්ධච්චං, දොමනස්සං උප්පජ්ජති, පුබ්බෙ…පෙ… ඣානා…පෙ… අරියා ගොත්‍රභුං පච්චවෙක්ඛන්ති, වොදානං පච්චවෙක්ඛන්ති, පහීනෙ කිලෙසෙ…පෙ… වික්ඛම්භිතෙ කිලෙසෙ…පෙ… පුබ්බෙ…පෙ… චක්ඛුං…පෙ… වත්ථුං පරාමට්ඨෙ චෙව නො ච පරාමාසෙ ඛන්ධෙ අනිච්චතො…පෙ… දොමනස්සං උප්පජ්ජති. දිබ්බෙන චක්ඛුනා රූපං පස්සති (යාව ආවජ්ජනා සබ්බං කාතබ්බං). (1)

පරාමට්ඨො චෙව නො ච පරාමාසො ධම්මො පරාමාසස්ස චෙව පරාමට්ඨස්ස ච ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං…පෙ… පුබ්බෙ…පෙ… ඣානා…පෙ… චක්ඛුං…පෙ… වත්ථුං පරාමට්ඨෙ චෙව නො ච පරාමාසෙ ඛන්ධෙ අස්සාදෙති අභිනන්දති, තං ආරබ්භ දිට්ඨි උප්පජ්ජති. (2)

පරාමට්ඨො චෙව නො ච පරාමාසො ධම්මො පරාමාසස්ස චෙව පරාමට්ඨස්ස ච පරාමට්ඨස්ස චෙව නො ච පරාමාසස්ස ච ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං…පෙ… පුබ්බෙ…පෙ… ඣානා…පෙ… චක්ඛුං…පෙ… වත්ථුං පරාමට්ඨෙ චෙව නො ච පරාමාසෙ ඛන්ධෙ අස්සාදෙති අභිනන්දති, තං ආරබ්භ පරාමාසො ච සම්පයුත්තකා ච ඛන්ධා උප්පජ්ජන්ති. (3)

(එවං ඉතරෙපි තීණි ආරබ්භ කාතබ්බානි. ඉමං දුකං පරාමාසදුකසදිසං. ලොකුත්තරං යහිං න ලබ්භති තහිං න කාතබ්බං.)

පරාමාසපරාමට්ඨදුකං නිට්ඨිතං.