1. විභඞ්ගවාරො

නහෙතුපච්චයො

5. නොපරාමාසං ධම්මං පටිච්ච නොපරාමාසො ධම්මො උප්පජ්ජති නහෙතුපච්චයා – අහෙතුකං නොපරාමාසං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා) විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයො

6. පරාමාසං ධම්මං පටිච්ච නොපරාමාසො ධම්මො උප්පජ්ජති නආරම්මණපච්චයා – පරාමාසං පටිච්ච චිත්තසමුට්ඨානං රූපං. (1)

නොපරාමාසං ධම්මං පටිච්ච නොපරාමාසො ධම්මො උප්පජ්ජති නආරම්මණපච්චයා – නොපරාමාසෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (යාව අසඤ්ඤසත්තා). (1)

පරාමාසඤ්ච නොපරාමාසඤ්ච ධම්මං පටිච්ච නොපරාමාසො ධම්මො උප්පජ්ජති නආරම්මණපච්චයා – පරාමාසඤ්ච සම්පයුත්තකෙ ච ඛන්ධෙ පටිච්ච චිත්තසමුට්ඨානං රූපං. (1)