1. විභඞ්ගවාරො

නහෙතුපච්චයො

49. පරාමාසවිප්පයුත්තං ධම්මං පටිච්ච පරාමාසවිප්පයුත්තො ධම්මො උප්පජ්ජති නහෙතුපච්චයා – අහෙතුකං පරාමාසවිප්පයුත්තං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං …පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා) විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයො

50. පරාමාසසම්පයුත්තං ධම්මං පටිච්ච පරාමාසවිප්පයුත්තො ධම්මො උප්පජ්ජති නආරම්මණපච්චයා – පරාමාසසම්පයුත්තෙ ඛන්ධෙ පටිච්ච චිත්තසමුට්ඨානං රූපං (සංඛිත්තං). (1)

පරාමාසවිප්පයුත්තං ධම්මං පටිච්ච පරාමාසවිප්පයුත්තො ධම්මො උප්පජ්ජති නආරම්මණපච්චයා – පරාමාසවිප්පයුත්තෙ ඛන්ධෙ පටිච්ච චිත්තසමුට්ඨානං රූපං (යාව අසඤ්ඤසත්තා). (1)

පරාමාසසම්පයුත්තඤ්ච පරාමාසවිප්පයුත්තඤ්ච ධම්මං පටිච්ච පරාමාසවිප්පයුත්තො ධම්මො උප්පජ්ජති නආරම්මණපච්චයා – පරාමාසසම්පයුත්තෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං (සංඛිත්තං). (1)