1. විභඞ්ගවාරො

හෙතුපච්චයො

1. පරාමාසං ධම්මං පටිච්ච නොපරාමාසො ධම්මො උප්පජ්ජති හෙතුපච්චයා – පරාමාසං පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං. (1)

2. නොපරාමාසං ධම්මං පටිච්ච නොපරාමාසො ධම්මො උප්පජ්ජති හෙතුපච්චයා – නොපරාමාසං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… (යාව අසඤ්ඤසත්තා මහාභූතා). (1)

නොපරාමාසං ධම්මං පටිච්ච පරාමාසො ධම්මො උප්පජ්ජති හෙතුපච්චයා – නොපරාමාසෙ ඛන්ධෙ පටිච්ච පරාමාසො. (2)

නොපරාමාසං ධම්මං පටිච්ච පරාමාසො ච නොපරාමාසො ච ධම්මා උප්පජ්ජන්ති හෙතුපච්චයා – නොපරාමාසං එකං ඛන්ධං පටිච්ච තයො ඛන්ධා පරාමාසො ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

3. පරාමාසඤ්ච නොපරාමාසඤ්ච ධම්මං පටිච්ච නොපරාමාසො ධම්මො උප්පජ්ජති හෙතුපච්චයා – නොපරාමාසං එකං ඛන්ධඤ්ච පරාමාසඤ්ච පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… පරාමාසෙ ච මහාභූතෙ ච පටිච්ච චිත්තසමුට්ඨානං රූපං. (1)