1. විභඞ්ගවාරො

හෙතුපච්චයො

10. පරාමාසං ධම්මං පච්චයා නොපරාමාසො ධම්මො උප්පජ්ජති හෙතුපච්චයා – පරාමාසං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං. (1)

නොපරාමාසං ධම්මං පච්චයා නොපරාමාසො ධම්මො උප්පජ්ජති හෙතුපච්චයා – නොපරාමාසං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… (යාව අජ්ඣත්තිකා මහාභූතා), වත්ථුං පච්චයා නොපරාමාසා ඛන්ධා. (1)

නොපරාමාසං ධම්මං පච්චයා පරාමාසො ධම්මො උප්පජ්ජති හෙතුපච්චයා – නොපරාමාසෙ ඛන්ධෙ පච්චයා පරාමාසො, වත්ථුං පච්චයා පරාමාසො. (2)

නොපරාමාසං ධම්මං පච්චයා පරාමාසො ච නොපරාමාසො ච ධම්මා උප්පජ්ජන්ති හෙතුපච්චයා – නොපරාමාසං එකං ඛන්ධං පච්චයා තයො ඛන්ධා පරාමාසො ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… වත්ථුං පච්චයා පරාමාසො, මහාභූතෙ පච්චයා චිත්තසමුට්ඨානං රූපං, වත්ථුං පච්චයා පරාමාසො ච සම්පයුත්තකා ච ඛන්ධා. (3)

11. පරාමාසඤ්ච නොපරාමාසඤ්ච ධම්මං පච්චයා නොපරාමාසො ධම්මො උප්පජ්ජති හෙතුපච්චයා – නොපරාමාසං එකං ඛන්ධඤ්ච පරාමාසඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… පරාමාසඤ්ච සම්පයුත්තකෙ ච ඛන්ධෙ පච්චයා චිත්තසමුට්ඨානං රූපං, පරාමාසඤ්ච මහාභූතෙ ච පච්චයා චිත්තසමුට්ඨානං රූපං, පරාමාසඤ්ච වත්ථුඤ්ච පච්චයා නොපරාමාසා ඛන්ධා (සංඛිත්තං). (1)