1. විභඞ්ගවාරො

නහෙතුපච්චයො

96. නීවරණඤ්චෙව නීවරණසම්පයුත්තඤ්ච ධම්මං පටිච්ච නීවරණො චෙව නීවරණසම්පයුත්තො ච ධම්මො උප්පජ්ජති නහෙතුපච්චයා – විචිකිච්ඡානීවරණං පටිච්ච අවිජ්ජානීවරණං, උද්ධච්චනීවරණං පටිච්ච අවිජ්ජානීවරණං. (1)

නීවරණසම්පයුත්තඤ්චෙව නො ච නීවරණං ධම්මං පටිච්ච නීවරණො චෙව නීවරණසම්පයුත්තො ච ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච අවිජ්ජානීවරණං. (1)

නීවරණඤ්චෙව නීවරණසම්පයුත්තඤ්ච නීවරණසම්පයුත්තඤ්චෙව නො ච නීවරණඤ්ච ධම්මං පටිච්ච නීවරණො චෙව නීවරණසම්පයුත්තො ච ධම්මො උප්පජ්ජති නහෙතුපච්චයා – විචිකිච්ඡානීවරණඤ්ච සම්පයුත්තකෙ ච ඛන්ධෙ පටිච්ච අවිජ්ජානීවරණං, උද්ධච්චනීවරණඤ්ච සම්පයුත්තකෙ ච ඛන්ධෙ පටිච්ච අවිජ්ජානීවරණං (සංඛිත්තං). (1)