1. විභඞ්ගවාරො

හෙතුපච්චයො

92. නීවරණඤ්චෙව නීවරණසම්පයුත්තඤ්ච ධම්මං පටිච්ච නීවරණො චෙව නීවරණසම්පයුත්තො ච ධම්මො උප්පජ්ජති හෙතුපච්චයා – කාමච්ඡන්දනීවරණං පටිච්ච ථිනමිද්ධනීවරණං උද්ධච්චනීවරණං අවිජ්ජානීවරණං (චක්කං. සබ්බෙපි නීවරණා කාතබ්බා). (1)

නීවරණඤ්චෙව නීවරණසම්පයුත්තඤ්ච ධම්මං පටිච්ච නීවරණසම්පයුත්තො චෙව නො ච නීවරණො ධම්මො උප්පජ්ජති හෙතුපච්චයා – නීවරණෙ පටිච්ච සම්පයුත්තකා ඛන්ධා. (2)

නීවරණඤ්චෙව නීවරණසම්පයුත්තඤ්ච ධම්මං පටිච්ච නීවරණො චෙව නීවරණසම්පයුත්තො ච නීවරණසම්පයුත්තො චෙව නො ච නීවරණො ච ධම්මා උප්පජ්ජන්ති හෙතුපච්චයා – කාමච්ඡන්දනීවරණං පටිච්ච ථිනමිද්ධනීවරණං උද්ධච්චනීවරණං අවිජ්ජානීවරණං සම්පයුත්තකා ච ඛන්ධා (චක්කං). (3)

93. නීවරණසම්පයුත්තඤ්චෙව නො ච නීවරණං ධම්මං පටිච්ච නීවරණසම්පයුත්තො චෙව නො ච නීවරණො ධම්මො උප්පජ්ජති හෙතුපච්චයා – නීවරණසම්පයුත්තඤ්චෙව නො ච නීවරණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

නීවරණසම්පයුත්තඤ්චෙව නො ච නීවරණං ධම්මං පටිච්ච නීවරණො චෙව නීවරණසම්පයුත්තො ච ධම්මො උප්පජ්ජති හෙතුපච්චයා – නීවරණසම්පයුත්තෙ චෙව නො ච නීවරණෙ ඛන්ධෙ පටිච්ච නීවරණා. (2)

නීවරණසම්පයුත්තඤ්චෙව නො ච නීවරණං ධම්මං පටිච්ච නීවරණො චෙව නීවරණසම්පයුත්තො ච නීවරණසම්පයුත්තො චෙව නො ච නීවරණො ච ධම්මා උප්පජ්ජන්ති හෙතුපච්චයා – නීවරණසම්පයුත්තඤ්චෙව නො ච නීවරණං එකං ඛන්ධං පටිච්ච තයො ඛන්ධා නීවරණා ච…පෙ… ද්වෙ ඛන්ධෙ…පෙ…. (3)

94. නීවරණඤ්චෙව නීවරණසම්පයුත්තඤ්ච නීවරණසම්පයුත්තඤ්චෙව නො ච නීවරණඤ්ච ධම්මං පටිච්ච නීවරණො චෙව නීවරණසම්පයුත්තො ච ධම්මො උප්පජ්ජති හෙතුපච්චයා – කාමච්ඡන්දනීවරණඤ්ච සම්පයුත්තකෙ ච ඛන්ධෙ පටිච්ච ථිනමිද්ධනීවරණං උද්ධච්චනීවරණං අවිජ්ජානීවරණං (චක්කං). (1)

නීවරණඤ්චෙව නීවරණසම්පයුත්තඤ්ච නීවරණසම්පයුත්තඤ්චෙව නො ච නීවරණඤ්ච ධම්මං පටිච්ච නීවරණසම්පයුත්තො චෙව නො ච නීවරණො ධම්මො උප්පජ්ජති හෙතුපච්චයා – නීවරණසම්පයුත්තඤ්චෙව නො ච නීවරණං එකං ඛන්ධඤ්ච නීවරණඤ්ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ…. (2)

නීවරණඤ්චෙව නීවරණසම්පයුත්තඤ්ච නීවරණසම්පයුත්තඤ්චෙව නො ච නීවරණඤ්ච ධම්මං පටිච්ච නීවරණො චෙව නීවරණසම්පයුත්තො ච නීවරණසම්පයුත්තො චෙව නො ච නීවරණො ච ධම්මා උප්පජ්ජන්ති හෙතුපච්චයා – නීවරණසම්පයුත්තඤ්චෙව නො ච නීවරණං එකං ඛන්ධඤ්ච කාමච්ඡන්දනීවරණඤ්ච පටිච්ච තයො ඛන්ධා ථිනමිද්ධනීවරණං උද්ධච්චනීවරණං අවිජ්ජානීවරණං…පෙ… ද්වෙ ඛන්ධෙ ච…පෙ… (චක්කං. සංඛිත්තං.). (3)