1. විභඞ්ගවාරො

හෙතුපච්චයො

1. නීවරණං ධම්මං පටිච්ච නීවරණො ධම්මො උප්පජ්ජති හෙතුපච්චයා – කාමච්ඡන්දනීවරණං පටිච්ච ථිනමිද්ධනීවරණං [ථීනමිද්ධනීවරණං (ස්‍යා.)] උද්ධච්චනීවරණං අවිජ්ජානීවරණං, කාමච්ඡන්දනීවරණං පටිච්ච උද්ධච්චනීවරණං අවිජ්ජානීවරණං, බ්‍යාපාදනීවරණං පටිච්ච ථිනමිද්ධනීවරණං උද්ධච්චනීවරණං අවිජ්ජානීවරණං, බ්‍යාපාදනීවරණං පටිච්ච උද්ධච්චනීවරණං අවිජ්ජානීවරණං, බ්‍යාපාදනීවරණං පටිච්ච ථිනමිද්ධනීවරණං උද්ධච්චනීවරණං කුක්කුච්චනීවරණං අවිජ්ජානීවරණං, බ්‍යාපාදනීවරණං පටිච්ච උද්ධච්චනීවරණං කුක්කුච්චනීවරණං අවිජ්ජානීවරණං, විචිකිච්ඡානීවරණං පටිච්ච උද්ධච්චනීවරණං, උද්ධච්චනීවරණං පටිච්ච අවිජ්ජානීවරණං. (1)

නීවරණං ධම්මං පටිච්ච නොනීවරණො ධම්මො උප්පජ්ජති හෙතුපච්චයා – නීවරණෙ පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං. (2)

නීවරණං ධම්මං පටිච්ච නීවරණො ච නොනීවරණො ච ධම්මා උප්පජ්ජන්ති හෙතුපච්චයා – කාමච්ඡන්දනීවරණං පටිච්ච ථිනමිද්ධනීවරණං උද්ධච්චනීවරණං අවිජ්ජානීවරණං සම්පයුත්තකා ච ඛන්ධා චිත්තසමුට්ඨානඤ්ච රූපං (චක්කං). (3)

2. නොනීවරණං ධම්මං පටිච්ච නොනීවරණො ධම්මො උප්පජ්ජති හෙතුපච්චයා – නොනීවරණං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

නොනීවරණං ධම්මං පටිච්ච නීවරණො ධම්මො උප්පජ්ජති හෙතුපච්චයා – නොනීවරණෙ ඛන්ධෙ පටිච්ච නීවරණා. (2)

නොනීවරණං ධම්මං පටිච්ච නීවරණො ච නොනීවරණො ච ධම්මා උප්පජ්ජන්ති හෙතුපච්චයා – නොනීවරණං එකං ඛන්ධං පටිච්ච තයො ඛන්ධා නීවරණා ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

3. නීවරණඤ්ච නොනීවරණඤ්ච ධම්මං පටිච්ච නීවරණො ධම්මො උප්පජ්ජති හෙතුපච්චයා – කාමච්ඡන්දනීවරණඤ්ච සම්පයුත්තකෙ ච ඛන්ධෙ පටිච්ච ථිනමිද්ධනීවරණං උද්ධච්චනීවරණං අවිජ්ජානීවරණං (චක්කං). (1)

නීවරණඤ්ච නොනීවරණඤ්ච ධම්මං පටිච්ච නොනීවරණො ධම්මො උප්පජ්ජති හෙතුපච්චයා – නොනීවරණං එකං ඛන්ධඤ්ච නීවරණඤ්ච පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ ච…පෙ… නීවරණෙ ච මහාභූතෙ ච පටිච්ච චිත්තසමුට්ඨානං රූපං. (2)

නීවරණඤ්ච නොනීවරණඤ්ච ධම්මං පටිච්ච නීවරණො ච නොනීවරණො ච ධම්මා උප්පජ්ජන්ති හෙතුපච්චයා – නොනීවරණං එකං ඛන්ධඤ්ච කාමච්ඡන්දනීවරණඤ්ච පටිච්ච තයො ඛන්ධා ථිනමිද්ධනීවරණං උද්ධච්චනීවරණං අවිජ්ජානීවරණං…පෙ… ද්වෙ ඛන්ධෙ ච…පෙ… (චක්කං. සංඛිත්තං). (3)