1. විභඞ්ගවාරො

හෙතුපච්චයො

52. නීවරණසම්පයුත්තං ධම්මං පටිච්ච නීවරණසම්පයුත්තො ධම්මො උප්පජ්ජති හෙතුපච්චයා – නීවරණසම්පයුත්තං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

නීවරණසම්පයුත්තං ධම්මං පටිච්ච නීවරණවිප්පයුත්තො ධම්මො උප්පජ්ජති හෙතුපච්චයා – නීවරණසම්පයුත්තෙ ඛන්ධෙ පටිච්ච චිත්තසමුට්ඨානං රූපං. (2)

නීවරණසම්පයුත්තං ධම්මං පටිච්ච නීවරණසම්පයුත්තො ච නීවරණවිප්පයුත්තො ච ධම්මා උප්පජ්ජන්ති හෙතුපච්චයා – නීවරණසම්පයුත්තං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

53. නීවරණවිප්පයුත්තං ධම්මං පටිච්ච නීවරණවිප්පයුත්තො ධම්මො උප්පජ්ජති හෙතුපච්චයා – නීවරණවිප්පයුත්තං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… (යාව අජ්ඣත්තිකා මහාභූතා). (1)

නීවරණසම්පයුත්තඤ්ච නීවරණවිප්පයුත්තඤ්ච ධම්මං පටිච්ච නීවරණවිප්පයුත්තො ධම්මො උප්පජ්ජති හෙතුපච්චයා – නීවරණසම්පයුත්තෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං (සංඛිත්තං).