1. විභඞ්ගවාරො

හෙතුපච්චයො

13. නීවරණං ධම්මං පච්චයා නීවරණො ධම්මො උප්පජ්ජති හෙතුපච්චයා… තීණි.

නොනීවරණං ධම්මං පච්චයා නොනීවරණො ධම්මො උප්පජ්ජති හෙතුපච්චයා – නොනීවරණං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… (යාව අජ්ඣත්තිකා මහාභූතා), වත්ථුං පච්චයා නොනීවරණා ඛන්ධා. (1)

නොනීවරණං ධම්මං පච්චයා නීවරණො ධම්මො උප්පජ්ජති හෙතුපච්චයා – නොනීවරණෙ ඛන්ධෙ පච්චයා නීවරණා, වත්ථුං පච්චයා නීවරණා. (2)

නොනීවරණං ධම්මං පච්චයා නීවරණො ච නොනීවරණො ච ධම්මා උප්පජ්ජන්ති හෙතුපච්චයා – නොනීවරණං එකං ඛන්ධං පච්චයා තයො ඛන්ධා නීවරණා ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… වත්ථුං පච්චයා නීවරණා, මහාභූතෙ පච්චයා චිත්තසමුට්ඨානං රූපං, වත්ථුං පච්චයා නීවරණා ච සම්පයුත්තකා ච ඛන්ධා. (3)

14. නීවරණඤ්ච නොනීවරණඤ්ච ධම්මං පච්චයා නීවරණො ධම්මො උප්පජ්ජති හෙතුපච්චයා – කාමච්ඡන්දනීවරණඤ්ච සම්පයුත්තකෙ ච ඛන්ධෙ පච්චයා ථිනමිද්ධනීවරණං උද්ධච්චනීවරණං අවිජ්ජානීවරණං (චක්කං). කාමච්ඡන්දනීවරණඤ්ච වත්ථුඤ්ච පච්චයා ථිනමිද්ධනීවරණං උද්ධච්චනීවරණං අවිජ්ජානීවරණං (චක්කං). (1)

නීවරණඤ්ච නොනීවරණඤ්ච ධම්මං පච්චයා නොනීවරණො ධම්මො උප්පජ්ජති හෙතුපච්චයා – නොනීවරණං එකං ඛන්ධඤ්ච නීවරණඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… නීවරණඤ්ච වත්ථුඤ්ච පච්චයා සම්පයුත්තකා ඛන්ධා, නීවරණඤ්ච සම්පයුත්තකෙ ච ඛන්ධෙ පච්චයා චිත්තසමුට්ඨානං රූපං, නීවරණෙ ච මහාභූතෙ ච පච්චයා චිත්තසමුට්ඨානං රූපං. (2)

නීවරණඤ්ච නොනීවරණඤ්ච ධම්මං පච්චයා නීවරණො ච නොනීවරණො ච ධම්මා උප්පජ්ජන්ති හෙතුපච්චයා – නොනීවරණං එකං ඛන්ධඤ්ච කාමච්ඡන්දනීවරණඤ්ච පච්චයා තයො ඛන්ධා ථිනමිද්ධනීවරණං උද්ධච්චනීවරණං අවිජ්ජානීවරණං…පෙ… ද්වෙ ඛන්ධෙ …පෙ… (චක්කං). කාමච්ඡන්දනීවරණඤ්ච වත්ථුඤ්ච පච්චයා ථිනමිද්ධනීවරණං උද්ධච්චනීවරණං අවිජ්ජානීවරණං සම්පයුත්තකා ච ඛන්ධා (චක්කං. සංඛිත්තං). (3)