1-4. පච්චයචතුක්කං
හෙතුපච්චයො
107. ගන්ථඤ්චෙව ගන්ථසම්පයුත්තඤ්ච ධම්මං පටිච්ච ගන්ථො චෙව ගන්ථසම්පයුත්තො ච ධම්මො උප්පජ්ජති හෙතුපච්චයා – සීලබ්බතපරාමාසං කායගන්ථං පටිච්ච අභිජ්ඣාකායගන්ථො, අභිජ්ඣාකායගන්ථං පටිච්ච සීලබ්බතපරාමාසො කායගන්ථො, ඉදංසච්චාභිනිවෙසකායගන්ථං පටිච්ච අභිජ්ඣාකායගන්ථො, අභිජ්ඣාකායගන්ථං පටිච්ච ඉදංසච්චාභිනිවෙසො කායගන්ථො. (1)
ගන්ථඤ්චෙව ගන්ථසම්පයුත්තඤ්ච ධම්මං පටිච්ච ගන්ථසම්පයුත්තො චෙව නො ච ගන්ථො ධම්මො උප්පජ්ජති හෙතුපච්චයා – ගන්ථෙ පටිච්ච සම්පයුත්තකා ඛන්ධා. (2)
ගන්ථඤ්චෙව ගන්ථසම්පයුත්තඤ්ච ධම්මං පටිච්ච ගන්ථො චෙව ගන්ථසම්පයුත්තො ච ගන්ථසම්පයුත්තො චෙව නො ච ගන්ථො ච ධම්මා උප්පජ්ජන්ති හෙතුපච්චයා – සීලබ්බතපරාමාසං කායගන්ථං පටිච්ච අභිජ්ඣාකායගන්ථො සම්පයුත්තකා ච ඛන්ධා (චක්කං). (3)
108. ගන්ථසම්පයුත්තඤ්චෙව නො ච ගන්ථං ධම්මං පටිච්ච ගන්ථසම්පයුත්තො චෙව නො ච ගන්ථො ධම්මො උප්පජ්ජති හෙතුපච්චයා – ගන්ථසම්පයුත්තඤ්චෙව නො ච ගන්ථං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)
ගන්ථසම්පයුත්තඤ්චෙව නො ච ගන්ථං ධම්මං පටිච්ච ගන්ථො චෙව ගන්ථසම්පයුත්තො ච ධම්මො උප්පජ්ජති හෙතුපච්චයා – ගන්ථසම්පයුත්තෙ චෙව නො ච ගන්ථෙ ඛන්ධෙ පටිච්ච ගන්ථා. (2)
ගන්ථසම්පයුත්තඤ්චෙව නො ච ගන්ථං ධම්මං පටිච්ච ගන්ථො චෙව ගන්ථසම්පයුත්තො ච ගන්ථසම්පයුත්තො චෙව නො ච ගන්ථො ච ධම්මා උප්පජ්ජන්ති හෙතුපච්චයා – ගන්ථසම්පයුත්තඤ්චෙව නො ච ගන්ථං එකං ඛන්ධං පටිච්ච තයො ඛන්ධා ගන්ථා ච…පෙ… ද්වෙ ඛන්ධෙ…පෙ…. (3)
109. ගන්ථඤ්චෙව ගන්ථසම්පයුත්තඤ්ච ගන්ථසම්පයුත්තඤ්චෙව නො ච ගන්ථඤ්ච ධම්මං පටිච්ච ගන්ථො චෙව ගන්ථසම්පයුත්තො ච ධම්මො උප්පජ්ජති හෙතුපච්චයා – ගන්ථෙ ච සම්පයුත්තකෙ ච ඛන්ධෙ පටිච්ච ගන්ථා. (1)
ගන්ථඤ්චෙව ගන්ථසම්පයුත්තඤ්ච ගන්ථසම්පයුත්තඤ්චෙව නො ච ගන්ථඤ්ච ධම්මං පටිච්ච ගන්ථසම්පයුත්තො චෙව නො ච ගන්ථො ධම්මො උප්පජ්ජති හෙතුපච්චයා – ගන්ථසම්පයුත්තඤ්චෙව නො ච ගන්ථං එකං ඛන්ධඤ්ච ගන්ථෙ ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ…. (2)
ගන්ථඤ්චෙව ගන්ථසම්පයුත්තඤ්ච ගන්ථසම්පයුත්තඤ්චෙව නො ච ගන්ථඤ්ච ධම්මං පටිච්ච ගන්ථො චෙව ගන්ථසම්පයුත්තො ච ගන්ථසම්පයුත්තො චෙව නො ච ගන්ථො ච ධම්මා උප්පජ්ජන්ති හෙතුපච්චයා – ගන්ථසම්පයුත්තඤ්චෙව නො ච ගන්ථං එකං ඛන්ධඤ්ච සීලබ්බතපරාමාසං කායගන්ථඤ්ච පටිච්ච තයො ඛන්ධා අභිජ්ඣාකායගන්ථො ච…පෙ… ද්වෙ ඛන්ධෙ ච…පෙ… (චක්කං බන්ධිතබ්බං. සංඛිත්තං). (3)
110. හෙතුයා නව, ආරම්මණෙ නව (සබ්බත්ථ නව), කම්මෙ නව, ආහාරෙ නව…පෙ… අවිගතෙ නව.
අනුලොමං.