1. විභඞ්ගවාරො

නහෙතුපච්චයො

5. නොගන්ථං ධම්මං පටිච්ච නොගන්ථො ධම්මො උප්පජ්ජති නහෙතුපච්චයා – අහෙතුකං නොගන්ථං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ (යාව අසඤ්ඤසත්තා), විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයාදි

6. ගන්ථං ධම්මං පටිච්ච නොගන්ථො ධම්මො උප්පජ්ජති නආරම්මණපච්චයා – ගන්ථෙ පටිච්ච චිත්තසමුට්ඨානං රූපං. (1)

නොගන්ථං ධම්මං පටිච්ච නොගන්ථො ධම්මො උප්පජ්ජති නආරම්මණපච්චයා – නොගන්ථෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (යාව අසඤ්ඤසත්තා). (1)

ගන්ථඤ්ච නොගන්ථඤ්ච ධම්මං පටිච්ච නොගන්ථො ධම්මො උප්පජ්ජති නආරම්මණපච්චයා – ගන්ථෙ ච සම්පයුත්තකෙ ච ඛන්ධෙ පටිච්ච චිත්තසමුට්ඨානං රූපං (සංඛිත්තං).

නඅධිපතිපච්චයා… නව, නඅනන්තරපච්චයා… තීණි, නසමනන්තරපච්චයා… තීණි, නඅඤ්ඤමඤ්ඤපච්චයා… තීණි, නඋපනිස්සයපච්චයා… තීණි.

නපුරෙජාතපච්චයාදි

7. ගන්ථං ධම්මං පටිච්ච ගන්ථො ධම්මො උප්පජ්ජති නපුරෙජාතපච්චයා – අරූපෙ ඉදංසච්චාභිනිවෙසං කායගන්ථං පටිච්ච අභිජ්ඣාකායගන්ථො, අභිජ්ඣාකායගන්ථං පටිච්ච ඉදංසච්චාභිනිවෙසො කායගන්ථො (අරූපෙ සීලබ්බතපරාමාසො නත්ථි, එවං නව පඤ්හා කාතබ්බා), නපච්ඡාජාතෙ නව, නආසෙවනෙ නව, නකම්මෙ තීණි, නවිපාකෙ නව, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ එකං, නසම්පයුත්තෙ තීණි, නවිප්පයුත්තෙ නව, නොනත්ථියා තීණි, නොවිගතෙ තීණි.