1. විභඞ්ගවාරො

හෙතුපච්චයො

69. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස හෙතුපච්චයෙන පච්චයො – ගන්ථසම්පයුත්තා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

ගන්ථසම්පයුත්තො ධම්මො ගන්ථවිප්පයුත්තස්ස ධම්මස්ස හෙතුපච්චයෙන පච්චයො – ගන්ථසම්පයුත්තා හෙතූ චිත්තසමුට්ඨානානං රූපානං හෙතුපච්චයෙන පච්චයො; දිට්ඨිගතවිප්පයුත්තලොභසහගතො හෙතු ලොභස්ස චිත්තසමුට්ඨානානඤ්ච රූපානං හෙතුපච්චයෙන පච්චයො; දොමනස්සසහගතො හෙතු පටිඝස්ස චිත්තසමුට්ඨානානඤ්ච රූපානං හෙතුපච්චයෙන පච්චයො. (2)

ගන්ථසම්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස හෙතුපච්චයෙන පච්චයො – ගන්ථසම්පයුත්තා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; දිට්ඨිගතවිප්පයුත්තලොභසහගතො හෙතු සම්පයුත්තකානං ඛන්ධානං ලොභස්ස ච චිත්තසමුට්ඨානානඤ්ච රූපානං හෙතුපච්චයෙන පච්චයො; දොමනස්සසහගතො හෙතු සම්පයුත්තකානං ඛන්ධානං පටිඝස්ස ච චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

70. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස හෙතුපච්චයෙන පච්චයො – ගන්ථවිප්පයුත්තා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; දිට්ඨිගතවිප්පයුත්තො ලොභො චිත්තසමුට්ඨානානං රූපානං හෙතුපච්චයෙන පච්චයො; පටිඝං චිත්තසමුට්ඨානානං රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස හෙතුපච්චයෙන පච්චයො – දිට්ඨිගතවිප්පයුත්තො ලොභො සම්පයුත්තකානං ඛන්ධානං හෙතුපච්චයෙන පච්චයො; පටිඝං සම්පයුත්තකානං ඛන්ධානං හෙතුපච්චයෙන පච්චයො. (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස හෙතුපච්චයෙන පච්චයො – දිට්ඨිගතවිප්පයුත්තො ලොභො සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිඝං සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

71. ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ධම්මස්ස හෙතුපච්චයෙන පච්චයො – දිට්ඨිගතවිප්පයුත්තලොභසහගතො හෙතු ච ලොභො ච සම්පයුත්තකානං ඛන්ධානං හෙතුපච්චයෙන පච්චයො; දොමනස්සසහගතො හෙතු ච පටිඝඤ්ච සම්පයුත්තකානං ඛන්ධානං හෙතුපච්චයෙන පච්චයො. (1)

ගන්ථසම්පයුත්තො ච ගන්ථවිප්පයුත්තො ච ධම්මා ගන්ථවිප්පයුත්තස්ස ධම්මස්ස හෙතුපච්චයෙන පච්චයො – දිට්ඨිගතවිප්පයුත්තලොභසහගතො හෙතු ච ලොභො ච චිත්තසමුට්ඨානානං රූපානං හෙතුපච්චයෙන පච්චයො; දොමනස්සසහගතො හෙතු ච පටිඝඤ්ච චිත්තසමුට්ඨානානං රූපානං හෙතුපච්චයෙන පච්චයො. (2)

ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස හෙතුපච්චයෙන පච්චයො – දිට්ඨිගතවිප්පයුත්තලොභසහගතො හෙතු ච ලොභො ච සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; දොමනස්සසහගතො හෙතු ච පටිඝඤ්ච සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

ආරම්මණපච්චයො

72. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස ආරම්මණපච්චයෙන පච්චයො – ගන්ථසම්පයුත්තෙ ඛන්ධෙ ආරබ්භ ගන්ථසම්පයුත්තකා ඛන්ධා උප්පජ්ජන්ති. (තීසුපි මූලා පුච්ඡිතබ්බා) ගන්ථසම්පයුත්තෙ ඛන්ධෙ ආරබ්භ ගන්ථවිප්පයුත්තා ඛන්ධා උප්පජ්ජන්ති, ගන්ථසම්පයුත්තෙ ඛන්ධෙ ආරබ්භ දිට්ඨිගතවිප්පයුත්තලොභසහගතා ඛන්ධා ච ලොභො ච උප්පජ්ජන්ති, දොමනස්සසහගතා ඛන්ධා ච පටිඝඤ්ච උප්පජ්ජන්ති. (3)

73. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති, ඣානා වුට්ඨහිත්වා ඣානං පච්චවෙක්ඛති, අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති, නිබ්බානං පච්චවෙක්ඛන්ති, නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො; අරියා ගන්ථවිප්පයුත්තෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති, චක්ඛුං…පෙ… වත්ථුං ගන්ථවිප්පයුත්තෙ ඛන්ධෙ ච ලොභඤ්ච පටිඝඤ්ච අනිච්චතො…පෙ… විපස්සති, අස්සාදෙති අභිනන්දති, තං ආරබ්භ ගන්ථවිප්පයුත්තො රාගො උප්පජ්ජති, විචිකිච්ඡා…පෙ… උද්ධච්චං…පෙ… දොමනස්සං උප්පජ්ජති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන ගන්ථවිප්පයුත්තචිත්තසමඞ්ගිස්ස චිත්තං ජානාති, ආකාසානඤ්චායතනං විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ… ගන්ථවිප්පයුත්තා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං…පෙ… පුබ්බෙ…පෙ… ඣානා…පෙ… තං අස්සාදෙති අභිනන්දති, තං ආරබ්භ ගන්ථසම්පයුත්තො රාගො උප්පජ්ජති… දිට්ඨි උප්පජ්ජති… දොමනස්සං උප්පජ්ජති (සංඛිත්තං). (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස ආරම්මණපච්චයෙන පච්චයො – චක්ඛුං…පෙ… වත්ථුං ගන්ථවිප්පයුත්තෙ ඛන්ධෙ ච ලොභඤ්ච පටිඝඤ්ච ආරබ්භ දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච උප්පජ්ජන්ති. (3)

74. ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ධම්මස්ස ආරම්මණපච්චයෙන පච්චයො – දිට්ඨිගතවිප්පයුත්තලොභසහගතෙ ඛන්ධෙ ච ලොභඤ්ච දොමනස්සසහගතෙ ඛන්ධෙ ච පටිඝඤ්ච ආරබ්භ ගන්ථසම්පයුත්තකා ඛන්ධා උප්පජ්ජන්ති. (මූලං පුච්ඡිතබ්බං) දිට්ඨිගතවිප්පයුත්තලොභසහගතෙ ඛන්ධෙ ච ලොභඤ්ච දොමනස්සසහගතෙ ඛන්ධෙ ච පටිඝඤ්ච ආරබ්භ ගන්ථවිප්පයුත්තා ඛන්ධා උප්පජ්ජන්ති, දිට්ඨිගතවිප්පයුත්තලොභසහගතෙ ඛන්ධෙ ච ලොභඤ්ච දොමනස්සසහගතෙ ඛන්ධෙ ච පටිඝඤ්ච ආරබ්භ දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච උප්පජ්ජන්ති. (3)

අධිපතිපච්චයො

75. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – ගන්ථසම්පයුත්තෙ ඛන්ධෙ ගරුං කත්වා ගන්ථසම්පයුත්තකා ඛන්ධා උප්පජ්ජන්ති. සහජාතාධිපති – ගන්ථසම්පයුත්තාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

ගන්ථසම්පයුත්තො ධම්මො ගන්ථවිප්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – ගන්ථසම්පයුත්තෙ ඛන්ධෙ ගරුං කත්වා දිට්ඨිගතවිප්පයුත්තො ලොභො උප්පජ්ජති. සහජාතාධිපති – ගන්ථසම්පයුත්තාධිපති චිත්තසමුට්ඨානානං රූපානං අධිපතිපච්චයෙන පච්චයො; දිට්ඨිගතවිප්පයුත්තලොභසහගතාධිපති ලොභස්ස ච චිත්තසමුට්ඨානානඤ්ච රූපානං අධිපතිපච්චයෙන පච්චයො; දොමනස්සසහගතාධිපති පටිඝස්ස ච චිත්තසමුට්ඨානානඤ්ච රූපානං අධිපතිපච්චයෙන පච්චයො. (2)

ගන්ථසම්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – ගන්ථසම්පයුත්තෙ ඛන්ධෙ ගරුං කත්වා දිට්ඨිගතවිප්පයුත්තලොභසහගතා ඛන්ධා ච ලොභො ච උප්පජ්ජන්ති. සහජාතාධිපති – දිට්ඨිගතවිප්පයුත්තලොභසහගතාධිපති සම්පයුත්තකානං ඛන්ධානං ලොභස්ස ච චිත්තසමුට්ඨානානඤ්ච රූපානං අධිපතිපච්චයෙන පච්චයො; දොමනස්සසහගතාධිපති සම්පයුත්තකානං ඛන්ධානං පටිඝස්ස ච චිත්තසමුට්ඨානානඤ්ච රූපානං අධිපතිපච්චයෙන පච්චයො.(3)

76. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං කත්වා තං ගරුං කත්වා පච්චවෙක්ඛති, පුබ්බෙ සුචිණ්ණානි ගරුං කත්වා පච්චවෙක්ඛති, ඣානා වුට්ඨහිත්වා ඣානං ගරුං කත්වා පච්චවෙක්ඛති, අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති, ඵලා වුට්ඨහිත්වා ඵලං ගරුං කත්වා පච්චවෙක්ඛන්ති, නිබ්බානං ගරුං කත්වා පච්චවෙක්ඛන්ති, නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස අධිපතිපච්චයෙන පච්චයො; චක්ඛුං…පෙ… වත්ථුං ගන්ථවිප්පයුත්තෙ ඛන්ධෙ ච ලොභඤ්ච ගරුං කත්වා අස්සාදෙති අභිනන්දති, තං ගරුං කත්වා ගන්ථවිප්පයුත්තො රාගො උප්පජ්ජති. සහජාතාධිපති – ගන්ථවිප්පයුත්තාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස අධිපතිපච්චයෙන පච්චයො. ආරම්මණාධිපති – දානං…පෙ… සීලං…පෙ… උපොසථකම්මං…පෙ… පුබ්බෙ සුචිණ්ණානි…පෙ… ඣානා වුට්ඨහිත්වා ඣානං…පෙ… චක්ඛුං…පෙ… වත්ථුං ගන්ථවිප්පයුත්තෙ ඛන්ධෙ ච ලොභඤ්ච ගරුං කත්වා අස්සාදෙති අභිනන්දති, තං ගරුං කත්වා ගන්ථසම්පයුත්තො රාගො උප්පජ්ජති… දිට්ඨි උප්පජ්ජති. (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස අධිපතිපච්චයෙන පච්චයො. ආරම්මණාධිපති – චක්ඛුං…පෙ… වත්ථුං ගන්ථවිප්පයුත්තෙ ඛන්ධෙ ච ලොභඤ්ච ගරුං කත්වා දිට්ඨිගතවිප්පයුත්තලොභසහගතා ඛන්ධා ච ලොභො ච උප්පජ්ජන්ති. (3)

77. ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ධම්මස්ස අධිපතිපච්චයෙන පච්චයො. ආරම්මණාධිපති – දිට්ඨිගතවිප්පයුත්තලොභසහගතෙ ඛන්ධෙ ච ලොභඤ්ච ගරුං කත්වා ගන්ථසම්පයුත්තකා ඛන්ධා උප්පජ්ජන්ති. (මූලා පුච්ඡිතබ්බා) දිට්ඨිගතවිප්පයුත්තලොභසහගතෙ ඛන්ධෙ ච ලොභඤ්ච ගරුං කත්වා දිට්ඨිගතවිප්පයුත්තො ලොභො උප්පජ්ජති. (මූලා පුච්ඡිතබ්බා) දිට්ඨිගතවිප්පයුත්තලොභසහගතෙ ඛන්ධෙ ච ලොභඤ්ච ගරුං කත්වා දිට්ඨිගතවිප්පයුත්තලොභසහගතා ඛන්ධා ච ලොභො ච උප්පජ්ජන්ති. (3)

අනන්තරපච්චයො

78. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස අනන්තරපච්චයෙන පච්චයො – පුරිමා පුරිමා ගන්ථසම්පයුත්තා ඛන්ධා පච්ඡිමානං පච්ඡිමානං ගන්ථසම්පයුත්තකානං ඛන්ධානං අනන්තරපච්චයෙන පච්චයො. (මූලා පුච්ඡිතබ්බා) පුරිමා පුරිමා දිට්ඨිගතවිප්පයුත්තලොභසහගතා ඛන්ධා පච්ඡිමස්ස පච්ඡිමස්ස දිට්ඨිගතවිප්පයුත්තස්ස ලොභස්ස අනන්තරපච්චයෙන පච්චයො; පුරිමා පුරිමා දොමනස්සසහගතා ඛන්ධා පච්ඡිමස්ස පච්ඡිමස්ස පටිඝස්ස අනන්තරපච්චයෙන පච්චයො; ගන්ථසම්පයුත්තා ඛන්ධා වුට්ඨානස්ස අනන්තරපච්චයෙන පච්චයො. (මූලා පුච්ඡිතබ්බා) පුරිමා පුරිමා දිට්ඨිගතවිප්පයුත්තලොභසහගතා ඛන්ධා පච්ඡිමානං පච්ඡිමානං දිට්ඨිගතවිප්පයුත්තලොභසහගතානං ඛන්ධානං ලොභස්ස ච අනන්තරපච්චයෙන පච්චයො; පුරිමා පුරිමා දොමනස්සසහගතා ඛන්ධා පච්ඡිමානං පච්ඡිමානං දොමනස්සසහගතානං ඛන්ධානං පටිඝස්ස ච අනන්තරපච්චයෙන පච්චයො. (3)

79. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස අනන්තරපච්චයෙන පච්චයො – පුරිමො පුරිමො දිට්ඨිගතවිප්පයුත්තො ලොභො පච්ඡිමස්ස පච්ඡිමස්ස දිට්ඨිගතවිප්පයුත්තස්ස ලොභස්ස අනන්තරපච්චයෙන පච්චයො; පුරිමං පුරිමං පටිඝං පච්ඡිමස්ස පච්ඡිමස්ස පටිඝස්ස අනන්තරපච්චයෙන පච්චයො; පුරිමා පුරිමා ගන්ථවිප්පයුත්තා ඛන්ධා පච්ඡිමානං පච්ඡිමානං ගන්ථවිප්පයුත්තානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස…පෙ… ඵලසමාපත්තියා අනන්තරපච්චයෙන පච්චයො. (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස අනන්තරපච්චයෙන පච්චයො – පුරිමො පුරිමො දිට්ඨිගතවිප්පයුත්තො ලොභො පච්ඡිමානං පච්ඡිමානං දිට්ඨිගතවිප්පයුත්තලොභසහගතානං ඛන්ධානං අනන්තරපච්චයෙන පච්චයො; පුරිමං පුරිමං පටිඝං පච්ඡිමානං පච්ඡිමානං දොමනස්සසහගතානං ඛන්ධානං අනන්තරපච්චයෙන පච්චයො; ආවජ්ජනා ගන්ථසම්පයුත්තකානං ඛන්ධානං අනන්තරපච්චයෙන පච්චයො. (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස අනන්තරපච්චයෙන පච්චයො – පුරිමො පුරිමො දිට්ඨිගතවිප්පයුත්තො ලොභො පච්ඡිමානං පච්ඡිමානං දිට්ඨිගතවිප්පයුත්තලොභසහගතානං ඛන්ධානං ලොභස්ස ච අනන්තරපච්චයෙන පච්චයො; පුරිමං පුරිමං පටිඝං පච්ඡිමානං පච්ඡිමානං දොමනස්සසහගතානං ඛන්ධානං පටිඝස්ස ච අනන්තරපච්චයෙන පච්චයො; ආවජ්ජනා දිට්ඨිගතවිප්පයුත්තලොභසහගතානං ඛන්ධානං ලොභස්ස ච දොමනස්සසහගතානං ඛන්ධානං පටිඝස්ස ච අනන්තරපච්චයෙන පච්චයො. (3)

80. ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ධම්මස්ස අනන්තරපච්චයෙන පච්චයො – පුරිමා පුරිමා දිට්ඨිගතවිප්පයුත්තලොභසහගතා ඛන්ධා ච ලොභො ච පච්ඡිමානං පච්ඡිමානං දිට්ඨිගතවිප්පයුත්තලොභසහගතානං ඛන්ධානං අනන්තරපච්චයෙන පච්චයො; පුරිමා පුරිමා දොමනස්සසහගතා ඛන්ධා ච පටිඝඤ්ච පච්ඡිමානං පච්ඡිමානං දොමනස්සසහගතානං ඛන්ධානං අනන්තරපච්චයෙන පච්චයො. (මූලා පුච්ඡිතබ්බා) පුරිමා පුරිමා දිට්ඨිගතවිප්පයුත්තලොභසහගතා ඛන්ධා ච ලොභො ච පච්ඡිමස්ස පච්ඡිමස්ස දිට්ඨිගතවිප්පයුත්තස්ස ලොභස්ස අනන්තරපච්චයෙන පච්චයො; පුරිමා පුරිමා දොමනස්සසහගතා ඛන්ධා ච පටිඝඤ්ච පච්ඡිමස්ස පච්ඡිමස්ස පටිඝස්ස අනන්තරපච්චයෙන පච්චයො; දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච වුට්ඨානස්ස අනන්තරපච්චයෙන පච්චයො. (මූලා පුච්ඡිතබ්බා) පුරිමා පුරිමා දිට්ඨිගතවිප්පයුත්තලොභසහගතා ඛන්ධා ච ලොභො ච පච්ඡිමානං පච්ඡිමානං දිට්ඨිගතවිප්පයුත්තලොභසහගතානං ඛන්ධානං ලොභස්ස ච අනන්තරපච්චයෙන පච්චයො; පුරිමා පුරිමා දොමනස්සසහගතා ඛන්ධා ච පටිඝඤ්ච පච්ඡිමානං පච්ඡිමානං දොමනස්සසහගතානං ඛන්ධානං පටිඝස්ස ච අනන්තරපච්චයෙන පච්චයො. (3)

සමනන්තරපච්චයාදි

81. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස සමනන්තරපච්චයෙන පච්චයො… සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො.

උපනිස්සයපච්චයො

82. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – ගන්ථසම්පයුත්තා ඛන්ධා ගන්ථසම්පයුත්තකානං ඛන්ධානං උපනිස්සයපච්චයෙන පච්චයො. (මූලං පුච්ඡිතබ්බං, තීණිපි උපනිස්සයා) ගන්ථසම්පයුත්තා ඛන්ධා ගන්ථවිප්පයුත්තානං ඛන්ධානං උපනිස්සයපච්චයෙන පච්චයො. (මූලං, තීණිපි උපනිස්සයා) ගන්ථසම්පයුත්තා ඛන්ධා දිට්ඨිගතවිප්පයුත්තලොභසහගතානං ඛන්ධානං ලොභස්ස ච උපනිස්සයපච්චයෙන පච්චයො; දොමනස්සසහගතානං ඛන්ධානං පටිඝස්ස ච උපනිස්සයපච්චයෙන පච්චයො. (3)

83. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දානං දෙති…පෙ… සමාපත්තිං උප්පාදෙති… මානං ජප්පෙති… සීලං…පෙ… පඤ්ඤං … රාගං… දොසං… මොහං… මානං… පත්ථනං… කායිකං සුඛං… කායිකං දුක්ඛං… උතුං… භොජනං… සෙනාසනං උපනිස්සාය දානං දෙති…පෙ… සමාපත්තිං උප්පාදෙති… පාණං හනති…පෙ… සඞ්ඝං භින්දති; සද්ධා…පෙ… පඤ්ඤා, රාගො…පෙ… පත්ථනා…පෙ… සෙනාසනං සද්ධාය…පෙ… පඤ්ඤාය… රාගස්ස… දොසස්ස… මොහස්ස… මානස්ස… පත්ථනාය…පෙ… ඵලසමාපත්තියා උපනිස්සයපච්චයෙන පච්චයො. (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය මානං ජප්පෙති, දිට්ඨිං ගණ්හාති; සීලං…පෙ… පඤ්ඤං… රාගං…පෙ… මානං… පත්ථනං…පෙ… සෙනාසනං උපනිස්සාය පාණං හනති…පෙ… සඞ්ඝං භින්දති; සද්ධා…පෙ… සෙනාසනං රාගස්ස… දොසස්ස … මොහස්ස… මානස්ස… දිට්ඨියා… පත්ථනාය උපනිස්සයපච්චයෙන පච්චයො. (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස උපනිස්සයපච්චයෙන පච්චයො (තීණි උපනිස්සයා); සද්ධං උපනිස්සාය මානං ජප්පෙති; සීලං…පෙ… පඤ්ඤං… රාගං… දොසං… මොහං… මානං… පත්ථනං… කායිකං සුඛං…පෙ… සෙනාසනං උපනිස්සාය පාණං හනති…පෙ… සඞ්ඝං භින්දති; සද්ධා…පෙ… පඤ්ඤා… රාගො… දොසො… මොහො… මානො… පත්ථනා…පෙ… සෙනාසනං දිට්ඨිගතවිප්පයුත්තලොභසහගතානං ඛන්ධානං ලොභස්ස ච දොමනස්සසහගතානං ඛන්ධානං පටිඝස්ස ච උපනිස්සයපච්චයෙන පච්චයො. (3)

84. ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො …පෙ…. පකතූපනිස්සයො – දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච ගන්ථසම්පයුත්තකානං ඛන්ධානං උපනිස්සයපච්චයෙන පච්චයො. (මූලං කාතබ්බං) දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච ගන්ථවිප්පයුත්තානං ඛන්ධානං දිට්ඨිගතවිප්පයුත්තලොභස්ස ච පටිඝස්ස ච උපනිස්සයපච්චයෙන පච්චයො. (මූලං පුච්ඡිතබ්බං) දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච දිට්ඨිගතවිප්පයුත්තලොභසහගතානං ඛන්ධානං ලොභස්ස ච දොමනස්සසහගතානං ඛන්ධානං පටිඝස්ස ච උපනිස්සයපච්චයෙන පච්චයො. (3)

පුරෙජාතපච්චයො

85. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො විපස්සති, අස්සාදෙති අභිනන්දති, තං ආරබ්භ ගන්ථවිප්පයුත්තො රාගො උප්පජ්ජති, විචිකිච්ඡා…පෙ… උද්ධච්චං…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු ගන්ථවිප්පයුත්තානං ඛන්ධානං දිට්ඨිගතවිප්පයුත්තස්ස ලොභස්ස ච පටිඝස්ස ච පුරෙජාතපච්චයෙන පච්චයො. (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අස්සාදෙති අභිනන්දති, තං ආරබ්භ ගන්ථසම්පයුත්තො රාගො උප්පජ්ජති, දිට්ඨි…පෙ… දොමනස්සං උප්පජ්ජති. වත්ථුපුරෙජාතං – වත්ථු ගන්ථසම්පයුත්තකානං ඛන්ධානං පුරෙජාතපච්චයෙන පච්චයො. (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං ආරබ්භ දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච උප්පජ්ජන්ති. වත්ථුපුරෙජාතං – වත්ථු දිට්ඨිගතවිප්පයුත්තලොභසහගතානං ඛන්ධානං ලොභස්ස ච දොමනස්සසහගතානං ඛන්ධානං පටිඝස්ස ච පුරෙජාතපච්චයෙන පච්චයො. (3)

පච්ඡාජාතපච්චයො

86. ගන්ථසම්පයුත්තො ධම්මො ගන්ථවිප්පයුත්තස්ස ධම්මස්ස පච්ඡාජාතපච්චයෙන පච්චයො… එකං.

ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස පච්ඡාජාතපච්චයෙන පච්චයො… එකං.

ගන්ථසම්පයුත්තො ච ගන්ථවිප්පයුත්තො ච ධම්මා ගන්ථවිප්පයුත්තස්ස ධම්මස්ස පච්ඡාජාතපච්චයෙන පච්චයො – පච්ඡාජාතා දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

ආසෙවනපච්චයො

87. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස ආසෙවනපච්චයෙන පච්චයො (අනන්තරසදිසං, ආවජ්ජනාපි වුට්ඨානම්පි නත්ථි).

කම්මපච්චයො

88. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස කම්මපච්චයෙන පච්චයො – ගන්ථසම්පයුත්තා චෙතනා සම්පයුත්තකානං ඛන්ධානං කම්මපච්චයෙන පච්චයො. (1)

ගන්ථසම්පයුත්තො ධම්මො ගන්ථවිප්පයුත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – ගන්ථසම්පයුත්තා චෙතනා චිත්තසමුට්ඨානානං රූපානං කම්මපච්චයෙන පච්චයො; දිට්ඨිගතවිප්පයුත්තලොභසහගතා චෙතනා ලොභස්ස ච චිත්තසමුට්ඨානානඤ්ච රූපානං කම්මපච්චයෙන පච්චයො; දොමනස්සසහගතා චෙතනා පටිඝස්ස ච චිත්තසමුට්ඨානානඤ්ච රූපානං කම්මපච්චයෙන පච්චයො. නානාක්ඛණිකා – ගන්ථසම්පයුත්තා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (2)

ගන්ථසම්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස කම්මපච්චයෙන පච්චයො – ගන්ථසම්පයුත්තා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; දිට්ඨිගතවිප්පයුත්තලොභසහගතා චෙතනා සම්පයුත්තකානං ඛන්ධානං ලොභස්ස ච චිත්තසමුට්ඨානානඤ්ච රූපානං කම්මපච්චයෙන පච්චයො; දොමනස්සසහගතා චෙතනා සම්පයුත්තකානං ඛන්ධානං පටිඝස්ස ච චිත්තසමුට්ඨානානඤ්ච රූපානං කම්මපච්චයෙන පච්චයො. (3)

89. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – ගන්ථවිප්පයුත්තා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – ගන්ථවිප්පයුත්තා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (1)

විපාකපච්චයාදි

90. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස විපාකපච්චයෙන පච්චයො… එකං.

ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස ආහාරපච්චයෙන පච්චයො… චත්තාරි… ඉන්ද්‍රියපච්චයෙන පච්චයො… චත්තාරි… ඣානපච්චයෙන පච්චයො… චත්තාරි… මග්ගපච්චයෙන පච්චයො … චත්තාරි… සම්පයුත්තපච්චයෙන පච්චයො… ඡ.

විප්පයුත්තපච්චයො

91. ගන්ථසම්පයුත්තො ධම්මො ගන්ථවිප්පයුත්තස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං, විභජිතබ්බං). (1)

ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස විප්පයුත්තපච්චයෙන පච්චයො. පුරෙජාතං – වත්ථු ගන්ථසම්පයුත්තකානං ඛන්ධානං විප්පයුත්තපච්චයෙන පච්චයො. (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස විප්පයුත්තපච්චයෙන පච්චයො. පුරෙජාතං – වත්ථු දිට්ඨිගතවිප්පයුත්තලොභසහගතානං ඛන්ධානං ලොභස්ස ච දොමනස්සසහගතානං ඛන්ධානං පටිඝස්ස ච විප්පයුත්තපච්චයෙන පච්චයො. (3)

92. ගන්ථසම්පයුත්තො ච ගන්ථවිප්පයුත්තො ච ධම්මා ගන්ථවිප්පයුත්තස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – දිට්ඨිගතවිප්පයුත්තලොභසහගතා ඛන්ධා ච ලොභො ච චිත්තසමුට්ඨානානං රූපානං විප්පයුත්තපච්චයෙන පච්චයො; දොමනස්සසහගතා ඛන්ධා ච පටිඝඤ්ච චිත්තසමුට්ඨානානං රූපානං විප්පයුත්තපච්චයෙන පච්චයො. පච්ඡාජාතා – දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අත්ථිපච්චයො

93. ගන්ථසම්පයුත්තො ධම්මො ගන්ථසම්පයුත්තස්ස ධම්මස්ස අත්ථිපච්චයෙන පච්චයො… එකං (පටිච්චසදිසං). (1)

ගන්ථසම්පයුත්තො ධම්මො ගන්ථවිප්පයුත්තස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං (සංඛිත්තං, විභජිතබ්බං). (2)

ගන්ථසම්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස අත්ථිපච්චයෙන පච්චයො… එකං (පටිච්චසදිසං). (3)

94. ගන්ථවිප්පයුත්තො ධම්මො ගන්ථවිප්පයුත්තස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං, විභජිතබ්බං). (1)

ගන්ථවිප්පයුත්තො ධම්මො ගන්ථසම්පයුත්තස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – දිට්ඨිගතවිප්පයුත්තො ලොභො සම්පයුත්තකානං ඛන්ධානං අත්ථිපච්චයෙන පච්චයො; දොමනස්සසහගතං පටිඝං සම්පයුත්තකානං ඛන්ධානං අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං අස්සාදෙති අභිනන්දති, තං ආරබ්භ ගන්ථසම්පයුත්තො රාගො…පෙ… දිට්ඨි…පෙ… දොමනස්සං උප්පජ්ජති, වත්ථු ගන්ථසම්පයුත්තකානං ඛන්ධානං අත්ථිපච්චයෙන පච්චයො. (2)

ගන්ථවිප්පයුත්තො ධම්මො ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – දිට්ඨිගතවිප්පයුත්තො ලොභො සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො; පටිඝං සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං ආරබ්භ දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච උප්පජ්ජන්ති, වත්ථු දිට්ඨිගතවිප්පයුත්තලොභසහගතානං ඛන්ධානං ලොභස්ස ච දොමනස්සසහගතානං ඛන්ධානං පටිඝස්ස ච අත්ථිපච්චයෙන පච්චයො. (3)

95. ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – ගන්ථසම්පයුත්තො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. සහජාතො – දිට්ඨිගතවිප්පයුත්තලොභසහගතො එකො ඛන්ධො ච ලොභො ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ… දොමනස්සසහගතො එකො ඛන්ධො ච පටිඝඤ්ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. (1)

ගන්ථසම්පයුත්තො ච ගන්ථවිප්පයුත්තො ච ධම්මා ගන්ථවිප්පයුත්තස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතා – ගන්ථසම්පයුත්තා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. සහජාතා – දිට්ඨිගතවිප්පයුත්තලොභසහගතා ඛන්ධා ච ලොභො ච චිත්තසමුට්ඨානානං රූපානං අත්ථිපච්චයෙන පච්චයො. සහජාතා – දොමනස්සසහගතා ඛන්ධා ච පටිඝඤ්ච චිත්තසමුට්ඨානානං රූපානං අත්ථිපච්චයෙන පච්චයො; දිට්ඨිගතවිප්පයුත්තලොභසහගතා ඛන්ධා ච වත්ථු ච ලොභස්ස අත්ථිපච්චයෙන පච්චයො; දොමනස්සසහගතා ඛන්ධා ච වත්ථු ච පටිඝස්ස අත්ථිපච්චයෙන පච්චයො. පච්ඡාජාතා – දිට්ඨිගතවිප්පයුත්තලොභසහගතා ඛන්ධා ච ලොභො ච දොමනස්සසහගතා ඛන්ධා ච පටිඝඤ්ච පුරෙජාතස්ස ඉමස්ස කායස්ස අත්ථිපච්චයෙන පච්චයො. පච්ඡාජාතා – ගන්ථසම්පයුත්තා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – ගන්ථසම්පයුත්තා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

ගන්ථසම්පයුත්තො ච ගන්ථවිප්පයුත්තො ච ධම්මා ගන්ථසම්පයුත්තස්ස ච ගන්ථවිප්පයුත්තස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – දිට්ඨිගතවිප්පයුත්තලොභසහගතො එකො ඛන්ධො ච ලොභො ච තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. සහජාතො – දොමනස්සසහගතො එකො ඛන්ධො ච පටිඝඤ්ච තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. සහජාතො – දිට්ඨිගතවිප්පයුත්තලොභසහගතො එකො ඛන්ධො ච වත්ථු ච තිණ්ණන්නං ඛන්ධානං ලොභස්ස ච අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. සහජාතො – දොමනස්සසහගතො එකො ඛන්ධො ච වත්ථු ච තිණ්ණන්නං ඛන්ධානං පටිඝස්ස ච අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. (3)