1. විභඞ්ගවාරො

හෙතුපච්චයො

69. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස හෙතුපච්චයෙන පච්චයො – දස්සනෙන පහාතබ්බා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස හෙතුපච්චයෙන පච්චයො – දස්සනෙන පහාතබ්බා හෙතූ චිත්තසමුට්ඨානානං රූපානං හෙතුපච්චයෙන පච්චයො. (2)

දස්සනෙන පහාතබ්බො ධම්මො දස්සනෙන පහාතබ්බස්ස ච නෙවදස්සනෙන නභාවනාය පහාතබ්බස්ස ච ධම්මස්ස හෙතුපච්චයෙන පච්චයො – දස්සනෙන පහාතබ්බා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

70. භාවනාය පහාතබ්බො ධම්මො…පෙ… ධම්මස්ස හෙතුපච්චයෙන පච්චයො – භාවනාය පහාතබ්බා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස…පෙ… භාවනාය පහාතබ්බා හෙතූ චිත්තසමුට්ඨානානං රූපානං හෙතුපච්චයෙන පච්චයො. (2)

භාවනාය පහාතබ්බො ධම්මො භාවනාය පහාතබ්බස්ස ච නෙවදස්සනෙන නභාවනාය පහාතබ්බස්ස ච ධම්මස්ස…පෙ… භාවනාය පහාතබ්බා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස…පෙ… නෙවදස්සනෙන නභාවනාය පහාතබ්බා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. පටිසන්ධික්ඛණෙ නෙවදස්සනෙන නභාවනාය පහාතබ්බා හෙතූ සම්පයුත්තකානං ඛන්ධානං කටත්තා ච රූපානං හෙතුපච්චයෙන පච්චයො. (1)

ආරම්මණපච්චයො

71. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස ආරම්මණපච්චයෙන පච්චයො – දස්සනෙන පහාතබ්බං රාගං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති. දස්සනෙන පහාතබ්බං දොමනස්සං උප්පජ්ජති, දිට්ඨිං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති. දස්සනෙන පහාතබ්බං දොමනස්සං උප්පජ්ජති, විචිකිච්ඡං ආරබ්භ විචිකිච්ඡා උප්පජ්ජති, දිට්ඨි උප්පජ්ජති, දස්සනෙන පහාතබ්බං දොමනස්සං උප්පජ්ජති. දස්සනෙන පහාතබ්බං දොමනස්සං ආරබ්භ දස්සනෙන පහාතබ්බං දොමනස්සං උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති. (1)

දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස ආරම්මණපච්චයෙන පච්චයො – අරියා දස්සනෙන පහාතබ්බෙ පහීනෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. දස්සනෙන පහාතබ්බෙ ඛන්ධෙ අනිච්චතො දුක්ඛතො අනත්තතො විපස්සන්ති. චෙතොපරියඤාණෙන දස්සනෙන පහාතබ්බචිත්තසමඞ්ගිස්ස චිත්තං ජානන්ති. දස්සනෙන පහාතබ්බා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

72. භාවනාය පහාතබ්බො ධම්මො භාවනාය පහාතබ්බස්ස ධම්මස්ස ආරම්මණපච්චයෙන පච්චයො – භාවනාය පහාතබ්බං රාගං අස්සාදෙති අභිනන්දති, තං ආරබ්භ භාවනාය පහාතබ්බො රාගො උප්පජ්ජති, උද්ධච්චං උප්පජ්ජති. භාවනාය පහාතබ්බං දොමනස්සං උප්පජ්ජති, උද්ධච්චං ආරබ්භ උද්ධච්චං උප්පජ්ජති. භාවනාය පහාතබ්බං දොමනස්සං උප්පජ්ජති, භාවනාය පහාතබ්බං දොමනස්සං ආරබ්භ භාවනාය පහාතබ්බං දොමනස්සං උප්පජ්ජති, උද්ධච්චං උප්පජ්ජති. (1)

භාවනාය පහාතබ්බො ධම්මො දස්සනෙන පහාතබ්බස්ස ධම්මස්ස ආරම්මණපච්චයෙන පච්චයො – භාවනාය පහාතබ්බං රාගං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, දස්සනෙන පහාතබ්බං දොමනස්සං උප්පජ්ජති. උද්ධච්චං ආරබ්භ දිට්ඨි උප්පජ්ජති, විචිකිච්ඡා උප්පජ්ජති, දස්සනෙන පහාතබ්බං දොමනස්සං උප්පජ්ජති. භාවනාය පහාතබ්බං දොමනස්සං ආරබ්භ දස්සනෙන පහාතබ්බං දොමනස්සං උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති. (2)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස ආරම්මණපච්චයෙන පච්චයො – අරියා භාවනාය පහාතබ්බෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. භාවනාය පහාතබ්බෙ ඛන්ධෙ අනිච්චතො දුක්ඛතො අනත්තතො විපස්සන්ති, චෙතොපරියඤාණෙන භාවනාය පහාතබ්බචිත්තසමඞ්ගිස්ස චිත්තං ජානන්ති. භාවනාය පහාතබ්බා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (3)

73. නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස ආරම්මණපච්චයෙන පච්චයො – දානං දත්වා සීලං සමාදියිත්වා උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති, ඣානා වුට්ඨහිත්වා ඣානං පච්චවෙක්ඛති. අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති, නිබ්බානං පච්චවෙක්ඛන්ති; නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො. චක්ඛුං අනිච්චතො දුක්ඛතො අනත්තතො විපස්සති; සොතං… ඝානං… ජිව්හං… කායං… රූපෙ… සද්දෙ… ගන්ධෙ… රසෙ… ඵොට්ඨබ්බෙ… වත්ථුං… නෙවදස්සනෙන නභාවනාය පහාතබ්බෙ ඛන්ධෙ අනිච්චතො දුක්ඛතො අනත්තතො විපස්සති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන නෙවදස්සනෙන නභාවනාය පහාතබ්බචිත්තසමඞ්ගිස්ස චිත්තං ජානන්ති, ආකාසානඤ්චායතනං විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… රූපායතනං චක්ඛුවිඤ්ඤාණස්ස ආරම්මණපච්චයෙන පච්චයො…පෙ… ඵොට්ඨබ්බායතනං කායවිඤ්ඤාණස්ස ආරම්මණපච්චයෙන පච්චයො…පෙ… නෙවදස්සනෙන නභාවනාය පහාතබ්බා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස ආරම්මණපච්චයෙන පච්චයො – දානං දත්වා සීලං සමාදියිත්වා උපොසථකම්මං කත්වා තං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, දස්සනෙන පහාතබ්බං දොමනස්සං උප්පජ්ජති. පුබ්බෙ සුචිණ්ණානි අස්සාදෙති අභිනන්දති…පෙ… ඣානා වුට්ඨහිත්වා ඣානං අස්සාදෙති අභිනන්දති, තං ආරබ්භ දස්සනෙන පහාතබ්බො රාගො…පෙ… දිට්ඨි…පෙ… විචිකිච්ඡා…පෙ… ඣානෙ පරිහීනෙ විප්පටිසාරිස්ස දස්සනෙන පහාතබ්බං දොමනස්සං උප්පජ්ජති. චක්ඛුං අස්සාදෙති අභිනන්දති…පෙ… සොතං… ඝානං… ජිව්හං… කායං… රූපෙ… සද්දෙ… ගන්ධෙ… රසෙ… ඵොට්ඨබ්බෙ… වත්ථුං… නෙවදස්සනෙන නභාවනාය පහාතබ්බෙ ඛන්ධෙ අස්සාදෙති අභිනන්දති, තං ආරබ්භ දස්සනෙන පහාතබ්බො රාගො…පෙ… දිට්ඨි…පෙ… විචිකිච්ඡා…පෙ… දස්සනෙන පහාතබ්බං දොමනස්සං උප්පජ්ජති. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස ආරම්මණපච්චයෙන පච්චයො – දානං දත්වා සීලං සමාදියිත්වා උපොසථකම්මං කත්වා තං අස්සාදෙති අභිනන්දති, තං ආරබ්භ භාවනාය පහාතබ්බො රාගො උප්පජ්ජති, උද්ධච්චං උප්පජ්ජති, භාවනාය පහාතබ්බං දොමනස්සං උප්පජ්ජති. පුබ්බෙ සුචිණ්ණානි…පෙ… ඣානා වුට්ඨහිත්වා…පෙ… චක්ඛුං…පෙ… වත්ථුං… නෙවදස්සනෙන නභාවනාය පහාතබ්බෙ ඛන්ධෙ අස්සාදෙති…පෙ… තං ආරබ්භ භාවනාය පහාතබ්බො රාගො උප්පජ්ජති, උද්ධච්චං උප්පජ්ජති, භාවනාය පහාතබ්බං දොමනස්සං උප්පජ්ජති. (3)

අධිපතිපච්චයො

74. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දස්සනෙන පහාතබ්බං රාගං ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති; දිට්ඨිං ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති. සහජාතාධිපති – දස්සනෙන පහාතබ්බාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අධිපතිපච්චයෙන පච්චයො. සහජාතාධිපති – දස්සනෙන පහාතබ්බාධිපති චිත්තසමුට්ඨානානං රූපානං අධිපතිපච්චයෙන පච්චයො. (2)

දස්සනෙන පහාතබ්බො ධම්මො දස්සනෙන පහාතබ්බස්ස ච නෙවදස්සනෙන නභාවනාය පහාතබ්බස්ස ච ධම්මස්ස අධිපතිපච්චයෙන පච්චයො. සහජාතාධිපති – දස්සනෙන පහාතබ්බාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

75. භාවනාය පහාතබ්බො ධම්මො භාවනාය පහාතබ්බස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – භාවනාය පහාතබ්බං රාගං ගරුං කත්වා අස්සාදෙති අභිනන්දති, තං ගරුං කත්වා භාවනාය පහාතබ්බො රාගො උප්පජ්ජති. සහජාතාධිපති – භාවනාය පහාතබ්බාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

භාවනාය පහාතබ්බො ධම්මො දස්සනෙන පහාතබ්බස්ස ධම්මස්ස අධිපතිපච්චයෙන පච්චයො. ආරම්මණාධිපති – භාවනාය පහාතබ්බං රාගං ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති. (2)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අධිපතිපච්චයෙන පච්චයො. සහජාතාධිපති – භාවනාය පහාතබ්බාධිපති චිත්තසමුට්ඨානානං රූපානං අධිපතිපච්චයෙන පච්චයො. (3)

භාවනාය පහාතබ්බො ධම්මො භාවනාය පහාතබ්බස්ස ච නෙවදස්සනෙන නභාවනාය පහාතබ්බස්ස ච ධම්මස්ස අධිපතිපච්චයෙන පච්චයො. සහජාතාධිපති – භාවනාය පහාතබ්බාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (4)

76. නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං සමාදියිත්වා උපොසථකම්මං කත්වා තං ගරුං කත්වා පච්චවෙක්ඛති, පුබ්බෙ සුචිණ්ණානි…පෙ… ඣානා වුට්ඨහිත්වා ඣානං ගරුං කත්වා පච්චවෙක්ඛති, අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති, ඵලං ගරුං කත්වා පච්චවෙක්ඛන්ති, නිබ්බානං ගරුං කත්වා පච්චවෙක්ඛන්ති; නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස අධිපතිපච්චයෙන පච්චයො. සහජාතාධිපති – නෙවදස්සනෙන නභාවනාය පහාතබ්බාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස අධිපතිපච්චයෙන පච්චයො. ආරම්මණාධිපති – දානං දත්වා සීලං සමාදියිත්වා උපොසථකම්මං කත්වා තං ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති. පුබ්බෙ සුචිණ්ණානි ගරුං කත්වා…පෙ… ඣානා වුට්ඨහිත්වා ඣානං ගරුං කත්වා…පෙ… චක්ඛුං…පෙ… වත්ථුං… නෙවදස්සනෙන නභාවනාය පහාතබ්බෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස අධිපතිපච්චයෙන පච්චයො. ආරම්මණාධිපති – දානං දත්වා සීලං සමාදියිත්වා උපොසථකම්මං කත්වා තං ගරුං කත්වා අස්සාදෙති අභිනන්දති, තං ගරුං කත්වා භාවනාය පහාතබ්බො රාගො උප්පජ්ජති. පුබ්බෙ…පෙ… නෙවදස්සනෙන නභාවනාය පහාතබ්බෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා භාවනාය පහාතබ්බො රාගො උප්පජ්ජති. (3)

අනන්තරපච්චයො

77. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අනන්තරපච්චයෙන පච්චයො – පුරිමා පුරිමා දස්සනෙන පහාතබ්බා ඛන්ධා පච්ඡිමානං පච්ඡිමානං දස්සනෙන පහාතබ්බානං ඛන්ධානං අනන්තරපච්චයෙන පච්චයො.

දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අනන්තරපච්චයෙන පච්චයො – දස්සනෙන පහාතබ්බා ඛන්ධා වුට්ඨානස්ස අනන්තරපච්චයෙන පච්චයො. (2)

භාවනාය පහාතබ්බො ධම්මො භාවනාය පහාතබ්බස්ස ධම්මස්ස අනන්තරපච්චයෙන පච්චයො – පුරිමා පුරිමා භාවනාය පහාතබ්බා ඛන්ධා පච්ඡිමානං පච්ඡිමානං භාවනාය පහාතබ්බානං ඛන්ධානං අනන්තරපච්චයෙන පච්චයො. (1)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අනන්තරපච්චයෙන පච්චයො – භාවනාය පහාතබ්බා ඛන්ධා වුට්ඨානස්ස අනන්තරපච්චයෙන පච්චයො. (2)

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අනන්තරපච්චයෙන පච්චයො – පුරිමා පුරිමා නෙවදස්සනෙන නභාවනාය පහාතබ්බා ඛන්ධා පච්ඡිමානං පච්ඡිමානං නෙවදස්සනෙන නභාවනාය පහාතබ්බානං ඛන්ධානං අනන්තරපච්චයෙන පච්චයො. අනුලොමං ගොත්‍රභුස්ස… අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස… මග්ගො ඵලස්ස… ඵලං ඵලස්ස… අනුලොමං ඵලසමාපත්තියා… නිරොධා වුට්ඨහන්තස්ස නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස…පෙ… ආවජ්ජනා දස්සනෙන පහාතබ්බානං ඛන්ධානං අනන්තරපච්චයෙන පච්චයො. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස අනන්තරපච්චයෙන පච්චයො – ආවජ්ජනා භාවනාය පහාතබ්බානං ඛන්ධානං අනන්තරපච්චයෙන පච්චයො. (3)

සමනන්තරපච්චයො

78. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස සමනන්තරපච්චයෙන පච්චයො (අනන්තරසදිසං).

සහජාතපච්චයො

79. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස සහජාතපච්චයෙන පච්චයො… තීණි.

භාවනාය පහාතබ්බො ධම්මො භාවනාය පහාතබ්බස්ස ධම්මස්ස… තීණි.

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස සහජාතපච්චයෙන පච්චයො – නෙවදස්සනෙන නභාවනාය පහාතබ්බො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං සහජාතපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ… ඛන්ධා වත්ථුස්ස සහජාතපච්චයෙන පච්චයො. වත්ථු ඛන්ධානං…පෙ… එකං මහාභූතං තිණ්ණන්නං මහාභූතානං…පෙ… මහාභූතා චිත්තසමුට්ඨානානං රූපානං…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං…පෙ…. (1)

දස්සනෙන පහාතබ්බො ච නෙවදස්සනෙන නභාවනාය පහාතබ්බො ච ධම්මා නෙවදස්සනෙන නභාවනාය පහාතබ්බස්ස ධම්මස්ස සහජාතපච්චයෙන පච්චයො – දස්සනෙන පහාතබ්බා ඛන්ධා ච මහාභූතා ච චිත්තසමුට්ඨානානං රූපානං සහජාතපච්චයෙන පච්චයො. (1)

භාවනාය පහාතබ්බො ච නෙවදස්සනෙන නභාවනාය පහාතබ්බො ච ධම්මා නෙවදස්සනෙන නභාවනාය පහාතබ්බස්ස ධම්මස්ස සහජාතපච්චයෙන පච්චයො – භාවනාය පහාතබ්බා ඛන්ධා ච මහාභූතා ච චිත්තසමුට්ඨානානං රූපානං සහජාතපච්චයෙන පච්චයො. (1)

අඤ්ඤමඤ්ඤපච්චයො

80. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අඤ්ඤමඤ්ඤපච්චයෙන පච්චයො – දස්සනෙන පහාතබ්බො එකො ඛන්ධො තිණ්ණන්නං ඛන්ධානං…පෙ…. (1)

භාවනාය පහාතබ්බො ධම්මො භාවනාය පහාතබ්බස්ස ධම්මස්ස…පෙ… භාවනාය පහාතබ්බො එකො ඛන්ධො තිණ්ණන්නං ඛන්ධානං…පෙ…. (1)

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස…පෙ… නෙවදස්සනෙන නභාවනාය පහාතබ්බො එකො ඛන්ධො තිණ්ණන්නං ඛන්ධානං අඤ්ඤමඤ්ඤපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ නෙවදස්සනෙන නභාවනාය පහාතබ්බො එකො ඛන්ධො තිණ්ණන්නං ඛන්ධානං වත්ථුස්ස ච අඤ්ඤමඤ්ඤපච්චයෙන පච්චයො…පෙ… ද්වෙ ඛන්ධා…පෙ… ඛන්ධා වත්ථුස්ස…පෙ… වත්ථු ඛන්ධානං…පෙ… එකං මහාභූතං තිණ්ණන්නං මහාභූතානං අඤ්ඤමඤ්ඤපච්චයෙන පච්චයො…පෙ… අසඤ්ඤසත්තානං…පෙ…. (1)

නිස්සයපච්චයො

81. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස නිස්සයපච්චයෙන පච්චයො… තීණි.

භාවනාය පහාතබ්බො ධම්මො භාවනාය පහාතබ්බස්ස ධම්මස්ස… තීණි.

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස නිස්සයපච්චයෙන පච්චයො – නෙවදස්සනෙන නභාවනාය පහාතබ්බො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ… ඛන්ධා වත්ථුස්ස…පෙ… වත්ථු ඛන්ධානං…පෙ… එකං මහාභූතං…පෙ… අසඤ්ඤසත්තානං…පෙ… චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු…පෙ…. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස නිස්සයපච්චයෙන පච්චයො – වත්ථු දස්සනෙන පහාතබ්බානං ඛන්ධානං නිස්සයපච්චයෙන පච්චයො. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස නිස්සයපච්චයෙන පච්චයො – වත්ථු භාවනාය පහාතබ්බානං ඛන්ධානං නිස්සයපච්චයෙන පච්චයො. (3)

82. දස්සනෙන පහාතබ්බො ච නෙවදස්සනෙන නභාවනාය පහාතබ්බො ච ධම්මා දස්සනෙන පහාතබ්බස්ස ධම්මස්ස නිස්සයපච්චයෙන පච්චයො – දස්සනෙන පහාතබ්බො එකො ඛන්ධො ච වත්ථු ච තිණ්ණන්නං ඛන්ධානං නිස්සයපච්චයෙන පච්චයො…පෙ… ද්වෙ ඛන්ධා…පෙ…. (1)

දස්සනෙන පහාතබ්බො ච නෙවදස්සනෙන නභාවනාය පහාතබ්බො ච ධම්මා නෙවදස්සනෙන නභාවනාය පහාතබ්බස්ස ධම්මස්ස නිස්සයපච්චයෙන පච්චයො – දස්සනෙන පහාතබ්බා ඛන්ධා ච මහාභූතා ච චිත්තසමුට්ඨානානං රූපානං නිස්සයපච්චයෙන පච්චයො. (2)

භාවනාය පහාතබ්බො ච නෙවදස්සනෙන නභාවනාය පහාතබ්බො ච ධම්මා භාවනාය පහාතබ්බස්ස ධම්මස්ස නිස්සයපච්චයෙන පච්චයො – භාවනාය පහාතබ්බො එකො ඛන්ධො ච වත්ථු ච තිණ්ණන්නං ඛන්ධානං නිස්සයපච්චයෙන පච්චයො…පෙ… ද්වෙ ඛන්ධා…පෙ…. (1)

භාවනාය පහාතබ්බො ච නෙවදස්සනෙන නභාවනාය පහාතබ්බො ච ධම්මා නෙවදස්සනෙන නභාවනාය පහාතබ්බස්ස ධම්මස්ස නිස්සයපච්චයෙන පච්චයො – භාවනාය පහාතබ්බා ඛන්ධා ච මහාභූතා ච චිත්තසමුට්ඨානානං රූපානං නිස්සයපච්චයෙන පච්චයො. (2)

උපනිස්සයපච්චයො

83. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – දස්සනෙන පහාතබ්බං රාගං උපනිස්සාය පාණං හනති, අදින්නං ආදියති…පෙ… සඞ්ඝං භින්දති. දස්සනෙන පහාතබ්බං දොසං… මොහං… දිට්ඨිං… පත්ථනං උපනිස්සාය පාණං හනති…පෙ… සඞ්ඝං භින්දති. දස්සනෙන පහාතබ්බො රාගො… දොසො… මොහො… දිට්ඨි… පත්ථනා දස්සනෙන පහාතබ්බස්ස රාගස්ස.. දොසස්ස… මොහස්ස… දිට්ඨියා… පත්ථනාය උපනිස්සයපච්චයෙන පච්චයො. (1)

දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – දස්සනෙන පහාතබ්බං රාගං උපනිස්සාය දානං දෙති, සීලං සමාදියති, උපොසථකම්මං කරොති…පෙ… සමාපත්තිං උප්පාදෙති. දස්සනෙන පහාතබ්බං දොසං…පෙ… පත්ථනං උපනිස්සාය දානං දෙති…පෙ… සමාපත්තිං උප්පාදෙති. දස්සනෙන පහාතබ්බො රාගො… දොසො… මොහො… දිට්ඨි… පත්ථනා සද්ධාය…පෙ… පඤ්ඤාය කායිකස්ස සුඛස්ස, කායිකස්ස දුක්ඛස්ස ඵලසමාපත්තියා උපනිස්සයපච්චයෙන පච්චයො. (2)

84. භාවනාය පහාතබ්බො ධම්මො භාවනාය පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – භාවනාය පහාතබ්බො රාගො… දොසො… මොහො… මානො… පත්ථනා භාවනාය පහාතබ්බස්ස රාගස්ස… දොසස්ස… මොහස්ස… මානස්ස… පත්ථනාය උපනිස්සයපච්චයෙන පච්චයො. (1)

භාවනාය පහාතබ්බො ධම්මො දස්සනෙන පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, පකතූපනිස්සයො…පෙ…. පකතූපනිස්සයො – භාවනාය පහාතබ්බං රාගං උපනිස්සාය පාණං හනති…පෙ… සඞ්ඝං භින්දති. භාවනාය පහාතබ්බං දොසං… මොහං… මානං… පත්ථනං උපනිස්සාය පාණං හනති…පෙ… සඞ්ඝං භින්දති. භාවනාය පහාතබ්බො රාගො… දොසො… මොහො… මානො… පත්ථනා දස්සනෙන පහාතබ්බස්ස රාගස්ස… දොසස්ස… මොහස්ස… දිට්ඨියා… පත්ථනාය උපනිස්සයපච්චයෙන පච්චයො. සකභණ්ඩෙ ඡන්දරාගො පරභණ්ඩෙ ඡන්දරාගස්ස උපනිස්සයපච්චයෙන පච්චයො. සකපරිග්ගහෙ ඡන්දරාගො පරපරිග්ගහෙ ඡන්දරාගස්ස උපනිස්සයපච්චයෙන පච්චයො. (2)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – භාවනාය පහාතබ්බං රාගං උපනිස්සාය දානං දෙති…පෙ… සමාපත්තිං උප්පාදෙති. භාවනාය පහාතබ්බං දොසං… මොහං… මානං… පත්ථනං උපනිස්සාය දානං දෙති…පෙ… සමාපත්තිං උප්පාදෙති. භාවනාය පහාතබ්බො රාගො… දොසො… මොහො… මානො… පත්ථනා සද්ධාය…පෙ… ඵලසමාපත්තියා උපනිස්සයපච්චයෙන පච්චයො. (3)

85. නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දානං දෙති…පෙ… සමාපත්තිං උප්පාදෙති. සීලං… සුතං… චාගං… පඤ්ඤං… කායිකං… සුඛං… කායිකං දුක්ඛං… උතුං… භොජනං… සෙනාසනං… උපනිස්සාය දානං දෙති…පෙ… සමාපත්තිං උප්පාදෙති. සද්ධා… සීලං… සුතං… චාගො … පඤ්ඤා… කායිකං සුඛං… කායිකං දුක්ඛං… උතු… භොජනං… සෙනාසනං… සද්ධාය…පෙ… පඤ්ඤාය කායිකස්ස සුඛස්ස, කායිකස්ස දුක්ඛස්ස ඵලසමාපත්තියා උපනිස්සයපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දිට්ඨිං ගණ්හාති. සීලං…පෙ… සෙනාසනං උපනිස්සාය පාණං හනති…පෙ… සඞ්ඝං භින්දති. සද්ධා…පෙ… සෙනාසනං දස්සනෙන පහාතබ්බස්ස රාගස්ස… දොසස්ස… මොහස්ස… දිට්ඨියා… පත්ථනාය උපනිස්සයපච්චයෙන පච්චයො. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය මානං ජප්පෙති. සීලං…පෙ… පඤ්ඤං… කායිකං සුඛං… කායිකං දුක්ඛං… උතුං… භොජනං… සෙනාසනං… උපනිස්සාය මානං ජප්පෙති. සද්ධා…පෙ… පඤ්ඤා… කායිකං සුඛං… කායිකං දුක්ඛං… උතු… භොජනං… සෙනාසනං භාවනාය පහාතබ්බස්ස රාගස්ස… දොසස්ස… මොහස්ස… මානස්ස… පත්ථනාය උපනිස්සයපච්චයෙන පච්චයො. (3)

පුරෙජාතපච්චයො

86. නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං අනිච්චතො දුක්ඛතො අනත්තතො විපස්සති, සොතං… ඝානං… ජිව්හං… කායං… රූපෙ… සද්දෙ… ගන්ධෙ… රසෙ… ඵොට්ඨබ්බෙ… වත්ථුං…පෙ… දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස පුරෙජාතපච්චයෙන පච්චයො. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු නෙවදස්සනෙන නභාවනාය පහාතබ්බානං ඛන්ධානං පුරෙජාතපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං අස්සාදෙති අභිනන්දති; තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, දස්සනෙන පහාතබ්බං දොමනස්සං උප්පජ්ජති…පෙ… වත්ථුං අස්සාදෙති අභිනන්දති; තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, දස්සනෙන පහාතබ්බං දොමනස්සං උප්පජ්ජති. වත්ථුපුරෙජාතං – වත්ථු දස්සනෙන පහාතබ්බානං ඛන්ධානං පුරෙජාතපච්චයෙන පච්චයො. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං අස්සාදෙති අභිනන්දති; තං ආරබ්භ භාවනාය පහාතබ්බො රාගො උප්පජ්ජති… උද්ධච්චං උප්පජ්ජති… භාවනාය පහාතබ්බං දොමනස්සං උප්පජ්ජති, සොතං…පෙ… කායං… රූපෙ…පෙ… ඵොට්ඨබ්බෙ… වත්ථුං අස්සාදෙති අභිනන්දති; තං ආරබ්භ භාවනාය පහාතබ්බො රාගො උප්පජ්ජති, උද්ධච්චං උප්පජ්ජති, භාවනාය පහාතබ්බං දොමනස්සං උප්පජ්ජති. වත්ථුපුරෙජාතං – වත්ථු භාවනාය පහාතබ්බානං ඛන්ධානං පුරෙජාතපච්චයෙන පච්චයො. (3)

පච්ඡාජාතපච්චයො

87. දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස පච්ඡාජාතපච්චයෙන පච්චයො – පච්ඡාජාතා දස්සනෙන පහාතබ්බා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස පච්ඡාජාතපච්චයෙන පච්චයො – පච්ඡාජාතා භාවනාය පහාතබ්බා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස පච්ඡාජාතපච්චයෙන පච්චයො – පච්ඡාජාතා නෙවදස්සනෙන නභාවනාය පහාතබ්බා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

ආසෙවනපච්චයො

88. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස ආසෙවනපච්චයෙන පච්චයො – පුරිමා පුරිමා දස්සනෙන පහාතබ්බා ඛන්ධා පච්ඡිමානං පච්ඡිමානං…පෙ… ආසෙවනපච්චයෙන පච්චයො. (1)

භාවනාය පහාතබ්බො ධම්මො භාවනාය පහාතබ්බස්ස ධම්මස්ස ආසෙවනපච්චයෙන පච්චයො – පුරිමා පුරිමා භාවනාය පහාතබ්බා ඛන්ධා පච්ඡිමානං පච්ඡිමානං…පෙ… ආසෙවනපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස ආසෙවනපච්චයෙන පච්චයො – පුරිමා පුරිමා නෙවදස්සනෙන නභාවනාය පහාතබ්බා ඛන්ධා පච්ඡිමානං පච්ඡිමානං…පෙ… ආසෙවනපච්චයෙන පච්චයො. අනුලොමං ගොත්‍රභුස්ස… අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස ආසෙවනපච්චයෙන පච්චයො. (1)

කම්මපච්චයො

89. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස කම්මපච්චයෙන පච්චයො – දස්සනෙන පහාතබ්බා චෙතනා සම්පයුත්තකානං ඛන්ධානං කම්මපච්චයෙන පච්චයො. (1)

දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – දස්සනෙන පහාතබ්බා චෙතනා චිත්තසමුට්ඨානානං රූපානං කම්මපච්චයෙන පච්චයො. නානාක්ඛණිකා – දස්සනෙන පහාතබ්බා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (2)

දස්සනෙන පහාතබ්බො ධම්මො දස්සනෙන පහාතබ්බස්ස ච නෙවදස්සනෙන නභාවනාය පහාතබ්බස්ස ච ධම්මස්ස කම්මපච්චයෙන පච්චයො – දස්සනෙන පහාතබ්බා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. (3)

භාවනාය පහාතබ්බො ධම්මො භාවනාය පහාතබ්බස්ස ධම්මස්ස කම්මපච්චයෙන පච්චයො – භාවනාය පහාතබ්බා චෙතනා සම්පයුත්තකානං ඛන්ධානං කම්මපච්චයෙන පච්චයො. (1)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස කම්මපච්චයෙන පච්චයො – භාවනාය පහාතබ්බා චෙතනා චිත්තසමුට්ඨානානං රූපානං කම්මපච්චයෙන පච්චයො. (2)

භාවනාය පහාතබ්බො ධම්මො භාවනාය පහාතබ්බස්ස ච නෙවදස්සනෙන නභාවනාය පහාතබ්බස්ස ච ධම්මස්ස කම්මපච්චයෙන පච්චයො – භාවනාය පහාතබ්බා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. (3)

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නෙවදස්සනෙන නභාවනාය පහාතබ්බා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. පටිසන්ධික්ඛණෙ නෙවදස්සනෙන නභාවනාය පහාතබ්බා චෙතනා සම්පයුත්තකානං ඛන්ධානං කටත්තා ච රූපානං…පෙ…. නානාක්ඛණිකා – නෙවදස්සනෙන නභාවනාය පහාතබ්බා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (1)

විපාකපච්චයො

90. නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස විපාකපච්චයෙන පච්චයො – විපාකො නෙවදස්සනෙන නභාවනාය පහාතබ්බො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං විපාකපච්චයෙන පච්චයො…පෙ… පටිසන්ධික්ඛණෙ…පෙ… ඛන්ධා වත්ථුස්ස විපාකපච්චයෙන පච්චයො.

ආහාරපච්චයාදි

91. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස ආහාරපච්චයෙන පච්චයො (සංඛිත්තං) කබළීකාරො… සත්ත පඤ්හා… ඉන්ද්‍රියපච්චයෙන පච්චයො… චක්ඛුන්ද්‍රියඤ්ච…පෙ… රූපජීවිතින්ද්‍රියඤ්ච …පෙ… සත්ත පඤ්හා ඣානපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චයො.

විප්පයුත්තපච්චයො

92. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – දස්සනෙන පහාතබ්බා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො. පච්ඡාජාතා – දස්සනෙන පහාතබ්බා ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

භාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (ඉදම්පි දස්සනෙන සදිසං).

නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං. සහජාතා – නෙවදස්සනෙන නභාවනාය පහාතබ්බා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො. පටිසන්ධික්ඛණෙ නෙවදස්සනෙන නභාවනාය පහාතබ්බා ඛන්ධා කටත්තාරූපානං විප්පයුත්තපච්චයෙන පච්චයො, ඛන්ධා වත්ථුස්ස විප්පයුත්තපච්චයෙන පච්චයො, වත්ථු ඛන්ධානං විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු නෙවදස්සනෙන නභාවනාය පහාතබ්බානං ඛන්ධානං විප්පයුත්තපච්චයෙන පච්චයො. පච්ඡාජාතා – නෙවදස්සනෙන නභාවනාය පහාතබ්බා ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස විප්පයුත්තපච්චයෙන පච්චයො – පුරෙජාතං වත්ථු දස්සනෙන පහාතබ්බානං ඛන්ධානං විප්පයුත්තපච්චයෙන පච්චයො. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස විප්පයුත්තපච්චයෙන පච්චයො – පුරෙජාතං වත්ථු භාවනාය පහාතබ්බානං ඛන්ධානං විප්පයුත්තපච්චයෙන පච්චයො. (3)

අත්ථිපච්චයො

93. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස අත්ථිපච්චයෙන පච්චයො – දස්සනෙන පහාතබ්බො එකො ඛන්ධො තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා…පෙ…. (1)

දස්සනෙන පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං. සහජාතා – දස්සනෙන පහාතබ්බා ඛන්ධා චිත්තසමුට්ඨානානං රූපානං අත්ථිපච්චයෙන පච්චයො. පච්ඡාජාතා – දස්සනෙන පහාතබ්බා ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. (2)

දස්සනෙන පහාතබ්බො ධම්මො දස්සනෙන පහාතබ්බස්ස ච නෙවදස්සනෙන නභාවනාය පහාතබ්බස්ස ච ධම්මස්ස අත්ථිපච්චයෙන පච්චයො – දස්සනෙන පහාතබ්බො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං…පෙ… ද්වෙ ඛන්ධා…පෙ…. (3)

භාවනාය පහාතබ්බො ධම්මො භාවනාය පහාතබ්බස්ස… තීණි (දස්සනෙන සදිසං කාතබ්බං).

94. නෙවදස්සනෙන නභාවනාය පහාතබ්බො ධම්මො නෙවදස්සනෙන නභාවනාය පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතො – නෙවදස්සනෙන නභාවනාය පහාතබ්බො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… පටිසන්ධික්ඛණෙ…පෙ… ඛන්ධා වත්ථුස්ස…පෙ… වත්ථු ඛන්ධානං අත්ථිපච්චයෙන පච්චයො; එකං මහාභූතං…පෙ… අසඤ්ඤසත්තානං එකං මහාභූතං…පෙ…. පුරෙජාතං – චක්ඛුං අනිච්චතො දුක්ඛතො අනත්තතො විපස්සති, සොතං…පෙ… කායං… රූපෙ…පෙ… ඵොට්ඨබ්බෙ… වත්ථුං අනිච්චතො දුක්ඛතො අනත්තතො විපස්සති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ… චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු නෙවදස්සනෙන නභාවනාය පහාතබ්බානං ඛන්ධානං අත්ථිපච්චයෙන පච්චයො. පච්ඡාජාතා – නෙවදස්සනෙන නභාවනාය පහාතබ්බා ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. කබළීකාරො ආහාරො ඉමස්ස කායස්ස…පෙ… රූපජීවිතින්ද්‍රියං කටත්තාරූපානං අත්ථිපච්චයෙන පච්චයො. (1)

නෙවදස්සනෙන නභාවනාය පහාතබ්බො ධම්මො දස්සනෙන පහාතබ්බස්ස ධම්මස්ස අත්ථිපච්චයෙන පච්චයො – පුරෙජාතං චක්ඛුං අස්සාදෙති අභිනන්දති; තං ආරබ්භ දස්සනෙන පහාතබ්බො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, දස්සනෙන පහාතබ්බං දොමනස්සං උප්පජ්ජති, සොතං…පෙ… වත්ථුං අස්සාදෙති…පෙ… වත්ථු දස්සනෙන පහාතබ්බානං ඛන්ධානං අත්ථිපච්චයෙන පච්චයො. (2)

නෙවදස්සනෙන නභාවනාය පහාතබ්බො ධම්මො භාවනාය පහාතබ්බස්ස ධම්මස්ස අත්ථිපච්චයෙන පච්චයො – පුරෙජාතං චක්ඛුං අස්සාදෙති අභිනන්දති; තං ආරබ්භ භාවනාය පහාතබ්බො රාගො උප්පජ්ජති, උද්ධච්චං උප්පජ්ජති, භාවනාය පහාතබ්බං දොමනස්සං උප්පජ්ජති, සොතං…පෙ… වත්ථුං අස්සාදෙති අභිනන්දති…පෙ… වත්ථු භාවනාය පහාතබ්බානං ඛන්ධානං අත්ථිපච්චයෙන පච්චයො. (3)

95. දස්සනෙන පහාතබ්බො ච නෙවදස්සනෙන නභාවනාය පහාතබ්බො ච ධම්මා දස්සනෙන පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – දස්සනෙන පහාතබ්බො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච වත්ථු ච…පෙ…. (1)

දස්සනෙන පහාතබ්බො ච නෙවදස්සනෙන නභාවනාය පහාතබ්බො ච ධම්මා නෙවදස්සනෙන නභාවනාය පහාතබ්බස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතා – දස්සනෙන පහාතබ්බා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. පච්ඡාජාතා – දස්සනෙන පහාතබ්බා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – දස්සනෙන පහාතබ්බා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

භාවනාය පහාතබ්බො ච නෙවදස්සනෙන නභාවනාය පහාතබ්බො ච ධම්මා භාවනාය පහාතබ්බස්ස…පෙ… (ද්වෙ පඤ්හා කාතබ්බා).

නත්ථිවිගතාවිගතපච්චයා

96. දස්සනෙන පහාතබ්බො ධම්මො දස්සනෙන පහාතබ්බස්ස ධම්මස්ස නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.