1. විභඞ්ගවාරො

නහෙතුපච්චයො

7. අනියතං ධම්මං පටිච්ච අනියතො ධම්මො උප්පජ්ජති නහෙතුපච්චයා – අහෙතුකං අනියතං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… එකං මහාභූතං පටිච්ච…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයො

8. මිච්ඡත්තනියතං ධම්මං පටිච්ච අනියතො ධම්මො උප්පජ්ජති නආරම්මණපච්චයා – මිච්ඡත්තනියතෙ ඛන්ධෙ පටිච්ච චිත්තසමුට්ඨානං රූපං (සංඛිත්තං).

නඅධිපතිපච්චයො

9. මිච්ඡත්තනියතං ධම්මං පටිච්ච මිච්ඡත්තනියතො ධම්මො උප්පජ්ජති නඅධිපතිපච්චයා – මිච්ඡත්තනියතෙ ඛන්ධෙ පටිච්ච මිච්ඡත්තනියතාධිපති. (1)

සම්මත්තනියතං ධම්මං පටිච්ච සම්මත්තනියතො ධම්මො උප්පජ්ජති නඅධිපතිපච්චයා – සම්මත්තනියතෙ ඛන්ධෙ පටිච්ච සම්මත්තනියතාධිපති. (1)

අනියතං ධම්මං පටිච්ච අනියතො ධම්මො උප්පජ්ජති නඅධිපතිපච්චයා – අනියතං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා; එකං මහාභූතං…පෙ… අසඤ්ඤසත්තානං…පෙ…. (1)

නඅනන්තරපච්චයො

10. මිච්ඡත්තනියතං ධම්මං පටිච්ච අනියතො ධම්මො උප්පජ්ජති නඅනන්තරපච්චයා (සංඛිත්තං, සබ්බානි පච්චයානි විත්ථාරෙතබ්බානි).