1. විභඞ්ගවාරො

හෙතුපච්චයො

1. මිච්ඡත්තනියතං ධම්මං පටිච්ච මිච්ඡත්තනියතො ධම්මො උප්පජ්ජති හෙතුපච්චයා – මිච්ඡත්තනියතං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධා. (1)

මිච්ඡත්තනියතං ධම්මං පටිච්ච අනියතො ධම්මො උප්පජ්ජති හෙතුපච්චයා – මිච්ඡත්තනියතෙ ඛන්ධෙ පටිච්ච චිත්තසමුට්ඨානං රූපං. (2)

මිච්ඡත්තනියතං ධම්මං පටිච්ච මිච්ඡත්තනියතො ච අනියතො ච ධම්මා උප්පජ්ජන්ති හෙතුපච්චයා – මිච්ඡත්තනියතං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

2. සම්මත්තනියතං ධම්මං පටිච්ච සම්මත්තනියතො ධම්මො උප්පජ්ජති හෙතුපච්චයා… තීණි.

3. අනියතං ධම්මං පටිච්ච අනියතො ධම්මො උප්පජ්ජති හෙතුපච්චයා – අනියතං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ අනියතං එකං ඛන්ධං පටිච්ච තයො ඛන්ධා කටත්තා ච රූපං, ද්වෙ ඛන්ධෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා; එකං මහාභූතං පටිච්ච තයො මහාභූතා…පෙ… ද්වෙ මහාභූතා,. මහාභූතෙ පටිච්ච චිත්තසමුට්ඨානං රූපං කටත්තාරූපං උපාදාරූපං. (1)

4. මිච්ඡත්තනියතඤ්ච අනියතඤ්ච ධම්මං පටිච්ච අනියතො ධම්මො උප්පජ්ජති හෙතුපච්චයා – මිච්ඡත්තනියතෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

සම්මත්තනියතඤ්ච අනියතඤ්ච ධම්මං පටිච්ච අනියතො ධම්මො උප්පජ්ජති හෙතුපච්චයා – සම්මත්තනියතෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

ආරම්මණපච්චයො

5. මිච්ඡත්තනියතං ධම්මං පටිච්ච මිච්ඡත්තනියතො ධම්මො උප්පජ්ජති ආරම්මණපච්චයා – මිච්ඡත්තනියතං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

සම්මත්තනියතං ධම්මං පටිච්ච සම්මත්තනියතො ධම්මො උප්පජ්ජති ආරම්මණපච්චයා – සම්මත්තනියතං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

අනියතං ධම්මං පටිච්ච අනියතො ධම්මො උප්පජ්ජති ආරම්මණපච්චයා – අනියතං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ අනියතං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… වත්ථුං පටිච්ච ඛන්ධා (සබ්බෙ පච්චයා ඉමිනා කාරණෙන විත්ථාරෙතබ්බා. සංඛිත්තං).