1. විභඞ්ගවාරො

හෙතුපච්චයො

14. මිච්ඡත්තනියතං ධම්මං පච්චයා මිච්ඡත්තනියතො ධම්මො උප්පජ්ජති හෙතුපච්චයා… තීණි.

සම්මත්තනියතං ධම්මං පච්චයා සම්මත්තනියතො ධම්මො උප්පජ්ජති හෙතුපච්චයා… තීණි.

15. අනියතං ධම්මං පච්චයා අනියතො ධම්මො උප්පජ්ජති හෙතුපච්චයා – අනියතං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධෙ පච්චයා වත්ථු, වත්ථුං පච්චයා ඛන්ධා; එකං මහාභූතං පච්චයා…පෙ… වත්ථුං පච්චයා අනියතා ඛන්ධා. (1)

අනියතං ධම්මං පච්චයා මිච්ඡත්තනියතො ධම්මො උප්පජ්ජති හෙතුපච්චයා – වත්ථුං පච්චයා මිච්ඡත්තනියතා ඛන්ධා. (2)

අනියතං ධම්මං පච්චයා සම්මත්තනියතො ධම්මො උප්පජ්ජති හෙතුපච්චයා – වත්ථුං පච්චයා සම්මත්තනියතා ඛන්ධා. (3)

අනියතං ධම්මං පච්චයා මිච්ඡත්තනියතො ච අනියතො ච ධම්මා උප්පජ්ජන්ති හෙතුපච්චයා – වත්ථුං පච්චයා මිච්ඡත්තනියතා ඛන්ධා, මහාභූතෙ පච්චයා චිත්තසමුට්ඨානං රූපං. (4)

අනියතං ධම්මං පච්චයා සම්මත්තනියතො ච අනියතො ච ධම්මා උප්පජ්ජන්ති හෙතුපච්චයා – වත්ථුං පච්චයා සම්මත්තනියතා ඛන්ධා, මහාභූතෙ පච්චයා චිත්තසමුට්ඨානං රූපං. (5)

16. මිච්ඡත්තනියතඤ්ච අනියතඤ්ච ධම්මං පච්චයා මිච්ඡත්තනියතො ධම්මො උප්පජ්ජති හෙතුපච්චයා – මිච්ඡත්තනියතං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ…. (1)

මිච්ඡත්තනියතඤ්ච අනියතඤ්ච ධම්මං පච්චයා අනියතො ධම්මො උප්පජ්ජති හෙතුපච්චයා – මිච්ඡත්තනියතෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. (2)

මිච්ඡත්තනියතඤ්ච අනියතඤ්ච ධම්මං පච්චයා මිච්ඡත්තනියතො ච අනියතො ච ධම්මා උප්පජ්ජන්ති හෙතුපච්චයා – මිච්ඡත්තනියතං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… මිච්ඡත්තනියතෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. (3)

සම්මත්තනියතඤ්ච අනියතඤ්ච ධම්මං පච්චයා සම්මත්තනියතො ධම්මො උප්පජ්ජති හෙතුපච්චයා (තීණි පඤ්හා, මිච්ඡත්තසදිසං).

ආරම්මණපච්චයාදි

17. මිච්ඡත්තනියතං ධම්මං පච්චයා මිච්ඡත්තනියතො ධම්මො උප්පජ්ජති ආරම්මණපච්චයා… (සංඛිත්තං, කුසලත්තිකෙ පච්චයවාරසදිසං විභජිතබ්බං)… අවිගතපච්චයා.