1. විභඞ්ගවාරො

නහෙතුපච්චයො

36. නෙවසෙක්ඛනාසෙක්ඛං ධම්මං සංසට්ඨො නෙවසෙක්ඛනාසෙක්ඛො ධම්මො උප්පජ්ජති නහෙතුපච්චයා – අහෙතුකං නෙවසෙක්ඛනාසෙක්ඛං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ සංසට්ඨො විචිකිච්ඡාසහගතො උද්ධච්චසහගතො මොහො. (1)

නඅධිපතිපච්චයො

37. සෙක්ඛං ධම්මං සංසට්ඨො සෙක්ඛො ධම්මො උප්පජ්ජති නඅධිපතිපච්චයා – සෙක්ඛෙ ඛන්ධෙ සංසට්ඨො සෙක්ඛො අධිපති. (1)

අසෙක්ඛං ධම්මං සංසට්ඨො අසෙක්ඛො ධම්මො උප්පජ්ජති නඅධිපතිපච්චයා – අසෙක්ඛෙ ඛන්ධෙ සංසට්ඨො අසෙක්ඛො අධිපති. (1)

නෙවසෙක්ඛනාසෙක්ඛං ධම්මං සංසට්ඨො නෙවසෙක්ඛනාසෙක්ඛො ධම්මො උප්පජ්ජති නඅධිපතිපච්චයා (පරිපුණ්ණං, එකං).

නපුරෙජාතපච්චයාදි

38. සෙක්ඛං ධම්මං සංසට්ඨො සෙක්ඛො ධම්මො උප්පජ්ජති නපුරෙජාතපච්චයා… නපච්ඡාජාතපච්චයා… නආසෙවනපච්චයා… නකම්මපච්චයා (ද්වෙ කාතබ්බා)… නවිපාකපච්චයා (ද්වෙ කාතබ්බා)… නඣානපච්චයා… නමග්ගපච්චයා… නවිප්පයුත්තපච්චයා…පෙ….