1. විභඞ්ගවාරො

නහෙතුපච්චයො

25. නෙවසෙක්ඛනාසෙක්ඛං ධම්මං පච්චයා නෙවසෙක්ඛනාසෙක්ඛො ධම්මො උප්පජ්ජති නහෙතුපච්චයා – අහෙතුකං නෙවසෙක්ඛනාසෙක්ඛං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධා. අහෙතුකපටිසන්ධික්ඛණෙ…පෙ… ඛන්ධෙ පච්චයා වත්ථු, වත්ථුං පච්චයා ඛන්ධා, එකං මහාභූතං පච්චයා…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං…පෙ… චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා නෙවසෙක්ඛනාසෙක්ඛා ඛන්ධා, විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයාදි

26. සෙක්ඛං ධම්මං පච්චයා නෙවසෙක්ඛනාසෙක්ඛො ධම්මො උප්පජ්ජති නආරම්මණපච්චයා…පෙ…. (1)

සෙක්ඛං ධම්මං පච්චයා සෙක්ඛො ධම්මො උප්පජ්ජති නඅධිපතිපච්චයා – සෙක්ඛෙ ඛන්ධෙ පච්චයා සෙක්ඛො අධිපති. (1)

අසෙක්ඛං ධම්මං පච්චයා අසෙක්ඛො ධම්මො උප්පජ්ජති නඅධිපතිපච්චයා – අසෙක්ඛෙ ඛන්ධෙ පච්චයා අසෙක්ඛො අධිපති. (1)

නෙවසෙක්ඛනාසෙක්ඛං ධම්මං පච්චයා නෙවසෙක්ඛනාසෙක්ඛො ධම්මො උප්පජ්ජති නඅධිපතිපච්චයා (පරිපුණ්ණං) අසඤ්ඤසත්තානං…පෙ… චක්ඛායතනං…පෙ… වත්ථුං පච්චයා නෙවසෙක්ඛනාසෙක්ඛා ඛන්ධා. (1)

නෙවසෙක්ඛනාසෙක්ඛං ධම්මං පච්චයා සෙක්ඛො ධම්මො උප්පජ්ජති නඅධිපතිපච්චයා – වත්ථුං පච්චයා සෙක්ඛො අධිපති. (2)

නෙවසෙක්ඛනාසෙක්ඛං ධම්මං පච්චයා අසෙක්ඛො ධම්මො උප්පජ්ජති නඅධිපතිපච්චයා – වත්ථුං පච්චයා අසෙක්ඛො අධිපති. (3)

සෙක්ඛඤ්ච නෙවසෙක්ඛනාසෙක්ඛඤ්ච ධම්මං පච්චයා සෙක්ඛො ධම්මො උප්පජ්ජති නඅධිපතිපච්චයා – සෙක්ඛෙ ඛන්ධෙ ච වත්ථුඤ්ච පච්චයා සෙක්ඛො අධිපති. (1)

අසෙක්ඛඤ්ච නෙවසෙක්ඛනාසෙක්ඛඤ්ච ධම්මං පච්චයා අසෙක්ඛො ධම්මො උප්පජ්ජති නඅධිපතිපච්චයා – අසෙක්ඛෙ ඛන්ධෙ ච වත්ථුඤ්ච පච්චයා අසෙක්ඛො අධිපති. (1)

නඅනන්තරපච්චයාදි

27. සෙක්ඛං ධම්මං පච්චයා නෙවසෙක්ඛනාසෙක්ඛො ධම්මො උප්පජ්ජති නඅනන්තරපච්චයා… නසමනන්තරපච්චයා… නඅඤ්ඤමඤ්ඤපච්චයා… නඋපනිස්සයපච්චයා… නපුරෙජාතපච්චයා… නපච්ඡාජාතපච්චයා (සත්ත)… නආසෙවනපච්චයා… නකම්මපච්චයා – සෙක්ඛෙ ඛන්ධෙ පච්චයා සෙක්ඛා චෙතනා.

නෙවසෙක්ඛනාසෙක්ඛං ධම්මං පච්චයා නෙවසෙක්ඛනාසෙක්ඛො ධම්මො උප්පජ්ජති නකම්මපච්චයා – නෙවසෙක්ඛනාසෙක්ඛෙ ඛන්ධෙ පච්චයා නෙවසෙක්ඛනාසෙක්ඛා චෙතනා. බාහිරං… ආහාරසමුට්ඨානං… උතුසමුට්ඨානං…පෙ… වත්ථුං පච්චයා නෙවසෙක්ඛනාසෙක්ඛා චෙතනා. (1)

නෙවසෙක්ඛනාසෙක්ඛං ධම්මං පච්චයා සෙක්ඛො ධම්මො උප්පජ්ජති නකම්මපච්චයා – වත්ථුං පච්චයා සෙක්ඛා චෙතනා. (2)

සෙක්ඛඤ්ච නෙවසෙක්ඛනාසෙක්ඛඤ්ච ධම්මං පච්චයා සෙක්ඛො ධම්මො උප්පජ්ජති නකම්මපච්චයා – සෙක්ඛෙ ඛන්ධෙ ච වත්ථුඤ්ච පච්චයා සෙක්ඛා චෙතනා. (1)

නවිපාකපච්චයො

28. සෙක්ඛං ධම්මං පච්චයා සෙක්ඛො ධම්මො උප්පජ්ජති නවිපාකපච්චයා (සෙක්ඛමූලකෙ තීණි).

නෙවසෙක්ඛනාසෙක්ඛං ධම්මං පච්චයා නෙවසෙක්ඛනාසෙක්ඛො ධම්මො උප්පජ්ජති නවිපාකපච්චයා (නෙවසෙක්ඛනාසෙක්ඛමූලකෙ තීණි).

සෙක්ඛඤ්ච නෙවසෙක්ඛනාසෙක්ඛඤ්ච ධම්මං පච්චයා සෙක්ඛො ධම්මො උප්පජ්ජති නවිපාකපච්චයා (සෙක්ඛඝටනෙසු තීණි).

නආහාරපච්චයාදි

29. නෙවසෙක්ඛනාසෙක්ඛං ධම්මං පච්චයා නෙවසෙක්ඛනාසෙක්ඛො ධම්මො උප්පජ්ජති නආහාරපච්චයා… නඉන්ද්‍රියපච්චයා… නඣානපච්චයා… නමග්ගපච්චයා… නසම්පයුත්තපච්චයා… නවිප්පයුත්තපච්චයා… නොනත්ථිපච්චයා… නොවිගතපච්චයා…පෙ….