1. විභඞ්ගවාරො

හෙතුපච්චයො

38. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස හෙතුපච්චයෙන පච්චයො – සුඛාය වෙදනාය සම්පයුත්තා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ සුඛාය වෙදනාය සම්පයුත්තා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස හෙතුපච්චයෙන පච්චයො – දුක්ඛාය වෙදනාය සම්පයුත්තා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස හෙතුපච්චයෙන පච්චයො – අදුක්ඛමසුඛාය වෙදනාය සම්පයුත්තා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ අදුක්ඛමසුඛාය වෙදනාය සම්පයුත්තා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

ආරම්මණපච්චයො

39. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – සුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා සුඛාය වෙදනාය සම්පයුත්තෙන චිත්තෙන පච්චවෙක්ඛති. සුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා සුඛාය වෙදනාය සම්පයුත්තෙන චිත්තෙන පච්චවෙක්ඛති. අරියා සුඛාය වෙදනාය සම්පයුත්තෙන චිත්තෙන සුඛාය වෙදනාය සම්පයුත්තෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. සුඛාය වෙදනාය සම්පයුත්තෙ ඛන්ධෙ සුඛාය වෙදනාය සම්පයුත්තෙන චිත්තෙන අනිච්චතො දුක්ඛතො අනත්තතො විපස්සති, අස්සාදෙති අභිනන්දති; තං ආරබ්භ සුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති; සුඛාය වෙදනාය සම්පයුත්තෙ ඛන්ධෙ ආරබ්භ සුඛාය වෙදනාය සම්පයුත්තා ඛන්ධා උප්පජ්ජන්ති. (1)

සුඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – සුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා විප්පටිසාරිස්ස දොමනස්සං උප්පජ්ජති. සුඛාය වෙදනාය සම්පයුත්තෙ ඣානෙ පරිහීනෙ විප්පටිසාරිස්ස දොමනස්සං උප්පජ්ජති. සුඛාය වෙදනාය සම්පයුත්තෙ ඛන්ධෙ ආරබ්භ දුක්ඛාය වෙදනාය සම්පයුත්තා ඛන්ධා උප්පජ්ජන්ති. (2)

සුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – සුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා අදුක්ඛමසුඛාය වෙදනාය සම්පයුත්තෙන චිත්තෙන පච්චවෙක්ඛති. සුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා අදුක්ඛමසුඛාය වෙදනාය සම්පයුත්තෙන චිත්තෙන පච්චවෙක්ඛති. අරියා අදුක්ඛමසුඛාය වෙදනාය සම්පයුත්තෙන චිත්තෙන සුඛාය වෙදනාය සම්පයුත්තෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. සුඛාය වෙදනාය සම්පයුත්තෙ ඛන්ධෙ අදුක්ඛමසුඛාය වෙදනාය සම්පයුත්තෙන චිත්තෙන අනිච්චතො දුක්ඛතො අනත්තතො විපස්සති, අස්සාදෙති අභිනන්දති; තං ආරබ්භ අදුක්ඛමසුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, උද්ධච්චං උප්පජ්ජති, චෙතොපරියඤාණෙන සුඛාය වෙදනාය සම්පයුත්තචිත්තසමඞ්ගිස්ස චිත්තං ජානාති. සුඛාය වෙදනාය සම්පයුත්තා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. සුඛාය වෙදනාය සම්පයුත්තෙ ඛන්ධෙ ආරබ්භ අදුක්ඛමසුඛාය වෙදනාය සම්පයුත්තා ඛන්ධා උප්පජ්ජන්ති. (3)

40. දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – දොසං ආරබ්භ දොසො උප්පජ්ජති, මොහො උප්පජ්ජති; දුක්ඛාය වෙදනාය සම්පයුත්තං මොහං ආරබ්භ මොහො උප්පජ්ජති, දොසො උප්පජ්ජති; දුක්ඛසහගතං කායවිඤ්ඤාණං ආරබ්භ දොසො උප්පජ්ජති, මොහො උප්පජ්ජති; දුක්ඛාය වෙදනාය සම්පයුත්තෙ ඛන්ධෙ ආරබ්භ දුක්ඛාය වෙදනාය සම්පයුත්තා ඛන්ධා උප්පජ්ජන්ති. (1)

දුක්ඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – අරියා සුඛාය වෙදනාය සම්පයුත්තෙන චිත්තෙන දුක්ඛාය වෙදනාය සම්පයුත්තෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. දුක්ඛාය වෙදනාය සම්පයුත්තෙ ඛන්ධෙ සුඛාය වෙදනාය සම්පයුත්තෙන චිත්තෙන අනිච්චතො දුක්ඛතො අනත්තතො විපස්සති; දුක්ඛාය වෙදනාය සම්පයුත්තෙ ඛන්ධෙ ආරබ්භ සුඛාය වෙදනාය සම්පයුත්තා ඛන්ධා උප්පජ්ජන්ති. (2)

දුක්ඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – අරියා අදුක්ඛමසුඛාය වෙදනාය සම්පයුත්තෙන චිත්තෙන දුක්ඛාය වෙදනාය සම්පයුත්තෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. දුක්ඛාය වෙදනාය සම්පයුත්තෙ ඛන්ධෙ අදුක්ඛමසුඛාය වෙදනාය සම්පයුත්තෙන චිත්තෙන අනිච්චතො දුක්ඛතො අනත්තතො විපස්සති; චෙතොපරියඤාණෙන දුක්ඛාය වෙදනාය සම්පයුත්තචිත්තසමඞ්ගිස්ස චිත්තං ජානන්ති. දුක්ඛාය වෙදනාය සම්පයුත්තා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො – දුක්ඛාය වෙදනාය සම්පයුත්තෙ ඛන්ධෙ ආරබ්භ අදුක්ඛමසුඛාය වෙදනාය සම්පයුත්තා ඛන්ධා උප්පජ්ජන්ති. (3)

41. අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – අදුක්ඛමසුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා අදුක්ඛමසුඛාය වෙදනාය සම්පයුත්තෙන චිත්තෙන පච්චවෙක්ඛති. අදුක්ඛමසුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා අදුක්ඛමසුඛාය වෙදනාය සම්පයුත්තෙන චිත්තෙන පච්චවෙක්ඛති; අරියා අදුක්ඛමසුඛාය වෙදනාය සම්පයුත්තෙන චිත්තෙන අදුක්ඛමසුඛාය වෙදනාය සම්පයුත්තෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. අදුක්ඛමසුඛාය වෙදනාය සම්පයුත්තෙ ඛන්ධෙ අදුක්ඛමසුඛාය වෙදනාය සම්පයුත්තෙන චිත්තෙන අනිච්චතො දුක්ඛතො අනත්තතො විපස්සති, අස්සාදෙති අභිනන්දති; තං ආරබ්භ අදුක්ඛමසුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, උද්ධච්චං උප්පජ්ජති; චෙතොපරියඤාණෙන අදුක්ඛමසුඛාය වෙදනාය සම්පයුත්තචිත්තසමඞ්ගිස්ස චිත්තං ජානන්ති. ආකාසානඤ්චායතනං විඤ්ඤාණඤ්චායතනස්ස ආරම්මණපච්චයෙන පච්චයො. ආකිඤ්චඤ්ඤායතනං නෙවසඤ්ඤානාසඤ්ඤායතනස්ස ආරම්මණපච්චයෙන පච්චයො. අදුක්ඛමසුඛාය වෙදනාය සම්පයුත්තා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආවජ්ජනාය ආරම්මණපච්චයෙන පච්චයො. අදුක්ඛමසුඛාය වෙදනාය සම්පයුත්තෙ ඛන්ධෙ ආරබ්භ අදුක්ඛමසුඛාය වෙදනාය සම්පයුත්තා ඛන්ධා උප්පජ්ජන්ති. (1)

අදුක්ඛමසුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – අදුක්ඛමසුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා සුඛාය වෙදනාය සම්පයුත්තෙන චිත්තෙන පච්චවෙක්ඛති. අදුක්ඛමසුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා සුඛාය වෙදනාය සම්පයුත්තෙන චිත්තෙන පච්චවෙක්ඛති. අරියා සුඛාය වෙදනාය සම්පයුත්තෙන චිත්තෙන අදුක්ඛමසුඛාය වෙදනාය සම්පයුත්තෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. අදුක්ඛමසුඛාය වෙදනාය සම්පයුත්තෙ ඛන්ධෙ සුඛාය වෙදනාය සම්පයුත්තෙන චිත්තෙන අනිච්චතො දුක්ඛතො අනත්තතො විපස්සති, අස්සාදෙති අභිනන්දති; තං ආරබ්භ සුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති; අදුක්ඛමසුඛාය වෙදනාය සම්පයුත්තෙ ඛන්ධෙ ආරබ්භ සුඛාය වෙදනාය සම්පයුත්තා ඛන්ධා උප්පජ්ජන්ති. (2)

අදුක්ඛමසුඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො – අදුක්ඛමසුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා විප්පටිසාරිස්ස දොමනස්සං උප්පජ්ජති, අදුක්ඛමසුඛාය වෙදනාය සම්පයුත්තෙ ඣානෙ පරිහීනෙ විප්පටිසාරිස්ස දොමනස්සං උප්පජ්ජති, අදුක්ඛමසුඛාය වෙදනාය සම්පයුත්තෙ ඛන්ධෙ ආරබ්භ දුක්ඛාය වෙදනාය සම්පයුත්තා ඛන්ධා උප්පජ්ජන්ති. (3)

අධිපතිපච්චයො

42. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති.

ආරම්මණාධිපති – සුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා සුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. සුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා සුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. සුඛාය වෙදනාය සම්පයුත්තෙ ඛන්ධෙ සුඛාය වෙදනාය සම්පයුත්තෙන චිත්තෙන ගරුං කත්වා අස්සාදෙති අභිනන්දති; තං ගරුං කත්වා සුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති.

සහජාතාධිපති – සුඛාය වෙදනාය සම්පයුත්තාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

සුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො.

ආරම්මණාධිපති – සුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා අදුක්ඛමසුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. සුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා අදුක්ඛමසුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. සුඛාය වෙදනාය සම්පයුත්තෙ ඛන්ධෙ අදුක්ඛමසුඛාය වෙදනාය සම්පයුත්තෙන චිත්තෙන ගරුං කත්වා අස්සාදෙති අභිනන්දති; තං ගරුං කත්වා අදුක්ඛමසුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති. (2)

43. දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො.

සහජාතාධිපති – දුක්ඛාය වෙදනාය සම්පයුත්තාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

44. අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති.

ආරම්මණාධිපති – අදුක්ඛමසුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා අදුක්ඛමසුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. අදුක්ඛමසුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා අදුක්ඛමසුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. අදුක්ඛමසුඛාය වෙදනාය සම්පයුත්තෙ ඛන්ධෙ අදුක්ඛමසුඛාය වෙදනාය සම්පයුත්තෙන චිත්තෙන ගරුං කත්වා අස්සාදෙති අභිනන්දති; තං ගරුං කත්වා අදුක්ඛමසුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති.

සහජාතාධිපති – අදුක්ඛමසුඛාය වෙදනාය සම්පයුත්තාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

අදුක්ඛමසුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො.

ආරම්මණාධිපති – අදුක්ඛමසුඛාය වෙදනාය සම්පයුත්තෙන චිත්තෙන දානං දත්වා, සීලං සමාදියිත්වා, උපොසථකම්මං කත්වා සුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. අදුක්ඛමසුඛාය වෙදනාය සම්පයුත්තා ඣානා වුට්ඨහිත්වා, මග්ගා වුට්ඨහිත්වා, ඵලා වුට්ඨහිත්වා සුඛාය වෙදනාය සම්පයුත්තෙන චිත්තෙන තං ගරුං කත්වා පච්චවෙක්ඛති. අදුක්ඛමසුඛාය වෙදනාය සම්පයුත්තෙ ඛන්ධෙ සුඛාය වෙදනාය සම්පයුත්තෙන චිත්තෙන ගරුං කත්වා අස්සාදෙති අභිනන්දති; තං ගරුං කත්වා සුඛාය වෙදනාය සම්පයුත්තො රාගො උප්පජ්ජති, දිට්ඨි උප්පජ්ජති. (2)

අනන්තරපච්චයො

45. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස අනන්තරපච්චයෙන පච්චයො – පුරිමා පුරිමා සුඛාය වෙදනාය සම්පයුත්තා ඛන්ධා පච්ඡිමානං පච්ඡිමානං සුඛාය වෙදනාය සම්පයුත්තකානං ඛන්ධානං අනන්තරපච්චයෙන පච්චයො. සුඛාය වෙදනාය සම්පයුත්තං අනුලොමං සුඛාය වෙදනාය සම්පයුත්තස්ස ගොත්‍රභුස්ස අනන්තරපච්චයෙන පච්චයො, අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස… මග්ගො ඵලස්ස… ඵලං ඵලස්ස… අනුලොමං සුඛාය වෙදනාය සම්පයුත්තාය ඵලසමාපත්තියා අනන්තරපච්චයෙන පච්චයො. සුඛාය වෙදනාය සම්පයුත්තා ඛන්ධා සුඛාය වෙදනාය සම්පයුත්තස්ස වුට්ඨානස්ස අනන්තරපච්චයෙන පච්චයො. (1)

සුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස අනන්තරපච්චයෙන පච්චයො – සුඛාය වෙදනාය සම්පයුත්තං චුතිචිත්තං අදුක්ඛමසුඛාය වෙදනාය සම්පයුත්තස්ස උපපත්තිචිත්තස්ස අනන්තරපච්චයෙන පච්චයො. සුඛාය වෙදනාය සම්පයුත්තං භවඞ්ගං ආවජ්ජනාය අනන්තරපච්චයෙන පච්චයො. සුඛසහගතං කායවිඤ්ඤාණං විපාකමනොධාතුයා අනන්තරපච්චයෙන පච්චයො. සුඛාය වෙදනාය සම්පයුත්තා විපාකමනොවිඤ්ඤාණධාතු කිරියමනොවිඤ්ඤාණධාතුයා අනන්තරපච්චයෙන පච්චයො. සුඛාය වෙදනාය සම්පයුත්තං භවඞ්ගං අදුක්ඛමසුඛාය වෙදනාය සම්පයුත්තස්ස භවඞ්ගස්ස අනන්තරපච්චයෙන පච්චයො. සුඛාය වෙදනාය සම්පයුත්තං කුසලාකුසලං අදුක්ඛමසුඛාය වෙදනාය සම්පයුත්තස්ස වුට්ඨානස්ස… කිරියං වුට්ඨානස්ස… ඵලං වුට්ඨානස්ස අනන්තරපච්චයෙන පච්චයො. (2)

46. දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස අනන්තරපච්චයෙන පච්චයො – පුරිමා පුරිමා දුක්ඛාය වෙදනාය සම්පයුත්තා ඛන්ධා පච්ඡිමානං පච්ඡිමානං දුක්ඛාය වෙදනාය සම්පයුත්තකානං ඛන්ධානං අනන්තරපච්චයෙන පච්චයො. (1)

දුක්ඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස අනන්තරපච්චයෙන පච්චයො – දුක්ඛසහගතං කායවිඤ්ඤාණං විපාකමනොධාතුයා අනන්තරපච්චයෙන පච්චයො. දුක්ඛාය වෙදනාය සම්පයුත්තා ඛන්ධා අදුක්ඛමසුඛාය වෙදනාය සම්පයුත්තස්ස වුට්ඨානස්ස අනන්තරපච්චයෙන පච්චයො. (2)

47. අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස අනන්තරපච්චයෙන පච්චයො – පුරිමා පුරිමා අදුක්ඛමසුඛාය වෙදනාය සම්පයුත්තා ඛන්ධා පච්ඡිමානං පච්ඡිමානං අදුක්ඛමසුඛාය වෙදනාය සම්පයුත්තකානං ඛන්ධානං අනන්තරපච්චයෙන පච්චයො. අදුක්ඛමසුඛාය වෙදනාය සම්පයුත්තං අනුලොමං අදුක්ඛමසුඛාය වෙදනාය සම්පයුත්තස්ස ගොත්‍රභුස්ස අනන්තරපච්චයෙන පච්චයො. අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස… මග්ගො ඵලස්ස… ඵලං ඵලස්ස… අනුලොමං ඵලසමාපත්තියා… නිරොධා වුට්ඨහන්තස්ස නෙවසඤ්ඤානාසඤ්ඤායතනං අදුක්ඛමසුඛාය වෙදනාය සම්පයුත්තාය ඵලසමාපත්තියා අනන්තරපච්චයෙන පච්චයො. අදුක්ඛමසුඛාය වෙදනාය සම්පයුත්තා ඛන්ධා අදුක්ඛමසුඛාය වෙදනාය සම්පයුත්තස්ස වුට්ඨානස්ස අනන්තරපච්චයෙන පච්චයො. (1)

අදුක්ඛමසුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස අනන්තරපච්චයෙන පච්චයො – අදුක්ඛමසුඛාය වෙදනාය සම්පයුත්තං චුතිචිත්තං සුඛාය වෙදනාය සම්පයුත්තස්ස උපපත්තිචිත්තස්ස අනන්තරපච්චයෙන පච්චයො. ආවජ්ජනා සුඛාය වෙදනාය සම්පයුත්තකානං ඛන්ධානං අනන්තරපච්චයෙන පච්චයො. විපාකමනොධාතු සුඛාය වෙදනාය සම්පයුත්තාය විපාකමනොවිඤ්ඤාණධාතුයා අනන්තරපච්චයෙන පච්චයො. අදුක්ඛමසුඛාය වෙදනාය සම්පයුත්තං භවඞ්ගං සුඛාය වෙදනාය සම්පයුත්තස්ස භවඞ්ගස්ස අනන්තරපච්චයෙන පච්චයො. අදුක්ඛමසුඛාය වෙදනාය සම්පයුත්තං කුසලාකුසලං සුඛාය වෙදනාය සම්පයුත්තස්ස වුට්ඨානස්ස… කිරියං වුට්ඨානස්ස… ඵලං වුට්ඨානස්ස… නිරොධා වුට්ඨහන්තස්ස නෙවසඤ්ඤානාසඤ්ඤායතනං සුඛාය වෙදනාය සම්පයුත්තාය ඵලසමාපත්තියා අනන්තරපච්චයෙන පච්චයො. (2)

අදුක්ඛමසුඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස අනන්තරපච්චයෙන පච්චයො – ආවජ්ජනා දුක්ඛාය වෙදනාය සම්පයුත්තකානං ඛන්ධානං අනන්තරපච්චයෙන පච්චයො. (3)

සමනන්තරපච්චයො

48. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස සමනන්තරපච්චයෙන පච්චයො (අනන්තරපච්චයසදිසං).

සහජාතපච්චයො

49. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස සහජාතපච්චයෙන පච්චයො – සුඛාය වෙදනාය සම්පයුත්තො එකො ඛන්ධො ද්වින්නං ඛන්ධානං සහජාතපච්චයෙන පච්චයො. ද්වෙ ඛන්ධා එකස්ස ඛන්ධස්ස සහජාතපච්චයෙන පච්චයො. පටිසන්ධික්ඛණෙ සුඛාය වෙදනාය සම්පයුත්තො එකො ඛන්ධො ද්වින්නං ඛන්ධානං සහජාතපච්චයෙන පච්චයො. ද්වෙ ඛන්ධා එකස්ස ඛන්ධස්ස සහජාතපච්චයෙන පච්චයො. (1)

50. දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස සහජාතපච්චයෙන පච්චයො – දුක්ඛාය වෙදනාය සම්පයුත්තො එකො ඛන්ධො ද්වින්නං ඛන්ධානං සහජාතපච්චයෙන පච්චයො. ද්වෙ ඛන්ධා එකස්ස ඛන්ධස්ස සහජාතපච්චයෙන පච්චයො. (දුක්ඛාය වෙදනාය සම්පයුත්තපටිසන්ධි න ලබ්භති.) (1)

51. අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස සහජාතපච්චයෙන පච්චයො – අදුක්ඛමසුඛාය වෙදනාය සම්පයුත්තො එකො ඛන්ධො ද්වින්නං ඛන්ධානං සහජාතපච්චයෙන පච්චයො. ද්වෙ ඛන්ධා එකස්ස ඛන්ධස්ස සහජාතපච්චයෙන පච්චයො. පටිසන්ධික්ඛණෙ අදුක්ඛමසුඛාය වෙදනාය සම්පයුත්තො එකො ඛන්ධො ද්වින්නං ඛන්ධානං සහජාතපච්චයෙන පච්චයො. ද්වෙ ඛන්ධා එකස්ස ඛන්ධස්ස සහජාතපච්චයෙන පච්චයො. (1)

අඤ්ඤමඤ්ඤ-නිස්සයපච්චයා

52. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො (අඤ්ඤමඤ්ඤම්පි නිස්සයම්පි සහජාතපච්චයසදිසං).

උපනිස්සයපච්චයො

53. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ….

පකතූපනිස්සයො – සුඛාය වෙදනාය සම්පයුත්තං සද්ධං උපනිස්සාය සුඛාය වෙදනාය සම්පයුත්තෙන චිත්තෙන දානං දෙති, සීලං සමාදියති, උපොසථකම්මං කරොති, සුඛාය වෙදනාය සම්පයුත්තං ඣානං උප්පාදෙති, විපස්සනං උප්පාදෙති, මග්ගං උප්පාදෙති, සමාපත්තිං උප්පාදෙති, මානං ජප්පෙති, දිට්ඨිං ගණ්හාති. සුඛාය වෙදනාය සම්පයුත්තං සීලං… සුතං… චාගං… පඤ්ඤං… රාගං… මොහං… මානං… දිට්ඨිං… පත්ථනං… සුඛසහගතං කායවිඤ්ඤාණං උපනිස්සාය සුඛාය වෙදනාය සම්පයුත්තෙන චිත්තෙන දානං දෙති…පෙ… සමාපත්තිං උප්පාදෙති (සද්ධාපඤ්චමකෙසු ‘‘මානං ජප්පෙති, දිට්ඨිං ගණ්හාතී’’ති කාතබ්බං, අවසෙසෙසු න කාතබ්බං). සුඛාය වෙදනාය සම්පයුත්තෙන චිත්තෙන අදින්නං ආදියති, මුසා භණති, පිසුණං භණති, සම්ඵං පලපති, සන්ධිං ඡින්දති, නිල්ලොපං හරති, එකාගාරිකං කරොති, පරිපන්ථෙ තිට්ඨති, පරදාරං ගච්ඡති, ගාමඝාතං කරොති, නිගමඝාතං කරොති. සුඛාය වෙදනාය සම්පයුත්තා සද්ධා… සීලං… සුතං… චාගො… පඤ්ඤා… රාගො… මොහො… මානො… දිට්ඨි… පත්ථනා… සුඛසහගතං කායවිඤ්ඤාණං සුඛාය වෙදනාය සම්පයුත්තාය සද්ධාය… සීලස්ස… සුතස්ස… චාගස්ස… පඤ්ඤාය… රාගස්ස… මොහස්ස… මානස්ස… දිට්ඨියා… පත්ථනාය… සුඛසහගතස්ස කායවිඤ්ඤාණස්ස… සුඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (1)

සුඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො.

පකතූපනිස්සයො – සුඛාය වෙදනාය සම්පයුත්තං සද්ධං උපනිස්සාය අත්තානං ආතාපෙති පරිතාපෙති, පරියිට්ඨිමූලකං දුක්ඛං පච්චනුභොති. සුඛාය වෙදනාය සම්පයුත්තං සීලං… සුතං… චාගං… පඤ්ඤං උපනිස්සාය අත්තානං ආතාපෙති පරිතාපෙති, පරියිට්ඨිමූලකං දුක්ඛං පච්චනුභොති. සුඛාය වෙදනාය සම්පයුත්තං රාගං… මොහං… මානං… දිට්ඨිං… පත්ථනං… සුඛසහගතං කායවිඤ්ඤාණං උපනිස්සාය පාණං හනති. දුක්ඛාය වෙදනාය සම්පයුත්තෙන චිත්තෙන අදින්නං ආදියති, මුසා භණති, පිසුණං භණති, ඵරුසං භණති, සම්ඵං පලපති, සන්ධිං ඡින්දති, නිල්ලොපං හරති, එකාගාරිකං කරොති, පරිපන්ථෙ තිට්ඨති, පරදාරං ගච්ඡති, ගාමඝාතං කරොති, නිගමඝාතං කරොති, මාතරං ජීවිතා වොරොපෙති, පිතරං ජීවිතා වොරොපෙති, අරහන්තං ජීවිතා වොරොපෙති, දුට්ඨෙන චිත්තෙන තථාගතස්ස ලොහිතං උප්පාදෙති, සඞ්ඝං භින්දති. සුඛාය වෙදනාය සම්පයුත්තා සද්ධා… සීලං… සුතං… චාගො… පඤ්ඤා… රාගො… මොහො… මානො… දිට්ඨි… පත්ථනා… සුඛසහගතං කායවිඤ්ඤාණං දොසස්ස… මොහස්ස… දුක්ඛසහගතස්ස කායවිඤ්ඤාණස්ස… දුක්ඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (2)

සුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ….

පකතූපනිස්සයො – සුඛාය වෙදනාය සම්පයුත්තං සද්ධං උපනිස්සාය අදුක්ඛමසුඛාය වෙදනාය සම්පයුත්තෙන චිත්තෙන දානං දෙති, සීලං සමාදියති, උපොසථකම්මං කරොති, අදුක්ඛමසුඛාය වෙදනාය සම්පයුත්තං ඣානං උප්පාදෙති, විපස්සනං උප්පාදෙති, මග්ගං උප්පාදෙති, අභිඤ්ඤං උප්පාදෙති, සමාපත්තිං උප්පාදෙති, මානං ජප්පෙති, දිට්ඨිං ගණ්හාති. සුඛාය වෙදනාය සම්පයුත්තං සීලං… සුතං… චාගං… පඤ්ඤං… රාගං… මොහං… මානං… දිට්ඨිං… පත්ථනං… සුඛසහගතං කායවිඤ්ඤාණං උපනිස්සාය අදුක්ඛමසුඛාය වෙදනාය සම්පයුත්තෙන චිත්තෙන දානං දෙති…පෙ… සමාපත්තිං උප්පාදෙති. අදුක්ඛමසුඛාය වෙදනාය සම්පයුත්තෙන චිත්තෙන අදින්නං ආදියති, මුසා භණති, පිසුණං භණති, සම්ඵං පලපති [ඵරුසං භණති, සම්ඵං පලපති (සී. ස්‍යා.)], සන්ධිං ඡින්දති, නිල්ලොපං හරති, එකාගාරිකං කරොති, පරිපන්ථෙ තිට්ඨති, පරදාරං ගච්ඡති, ගාමඝාතං කරොති, නිගමඝාතං කරොති. සුඛාය වෙදනාය සම්පයුත්තා සද්ධා… සීලං… සුතං… චාගො… පඤ්ඤා… රාගො… මොහො… මානො… දිට්ඨි… පත්ථනා… සුඛසහගතං කායවිඤ්ඤාණං අදුක්ඛමසුඛාය වෙදනාය සම්පයුත්තාය සද්ධාය… සීලස්ස… සුතස්ස… චාගස්ස… පඤ්ඤාය… රාගස්ස… මොහස්ස… මානස්ස… දිට්ඨියා… පත්ථනාය… අදුක්ඛමසුඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (3)

54. දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ….

පකතූපනිස්සයො – දොසං උපනිස්සාය පාණං හනති, දුක්ඛාය වෙදනාය සම්පයුත්තෙන චිත්තෙන අදින්නං ආදියති…පෙ… සඞ්ඝං භින්දති. මොහං, දුක්ඛසහගතං කායවිඤ්ඤාණං උපනිස්සාය පාණං හනති, දුක්ඛාය වෙදනාය සම්පයුත්තෙන චිත්තෙන අදින්නං ආදියති…පෙ… සඞ්ඝං භින්දති. දොසො… මොහො… දුක්ඛසහගතං කායවිඤ්ඤාණං දොසස්ස… මොහස්ස… දුක්ඛසහගතස්ස කායවිඤ්ඤාණස්ස… දුක්ඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (1)

දුක්ඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො.

පකතූපනිස්සයො – දොසං උපනිස්සාය සුඛාය වෙදනාය සම්පයුත්තෙන චිත්තෙන දානං දෙති…පෙ… සමාපත්තිං උප්පාදෙති. සුඛාය වෙදනාය සම්පයුත්තෙන චිත්තෙන අදින්නං ආදියති…පෙ… නිගමඝාතං කරොති. මොහං, දුක්ඛසහගතං කායවිඤ්ඤාණං උපනිස්සාය සුඛාය වෙදනාය සම්පයුත්තෙන චිත්තෙන දානං දෙති…පෙ… නිගමඝාතං කරොති. දොසො… මොහො… දුක්ඛසහගතං කායවිඤ්ඤාණං සුඛාය වෙදනාය සම්පයුත්තාය සද්ධාය…පෙ… සුඛසහගතස්ස කායවිඤ්ඤාණස්ස සුඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (2)

දුක්ඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ….

පකතූපනිස්සයො – දොසං උපනිස්සාය අදුක්ඛමසුඛාය වෙදනාය සම්පයුත්තෙන චිත්තෙන දානං දෙති…පෙ… නිගමඝාතං කරොති. මොහං, දුක්ඛසහගතං කායවිඤ්ඤාණං උපනිස්සාය අදුක්ඛමසුඛාය වෙදනාය සම්පයුත්තෙන චිත්තෙන දානං දෙති…පෙ… නිගමඝාතං කරොති. දොසො… මොහො… දුක්ඛසහගතං කායවිඤ්ඤාණං අදුක්ඛමසුඛාය වෙදනාය සම්පයුත්තාය සද්ධාය…පෙ… පත්ථනාය… අදුක්ඛමසුඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (3)

55. අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ….

පකතූපනිස්සයො – අදුක්ඛමසුඛාය වෙදනාය සම්පයුත්තං සද්ධං උපනිස්සාය අදුක්ඛමසුඛාය වෙදනාය සම්පයුත්තෙන චිත්තෙන දානං දෙති…පෙ… දිට්ඨිං ගණ්හාති. අදුක්ඛමසුඛාය වෙදනාය සම්පයුත්තං සීලං… සුතං… චාගං… පඤ්ඤං… රාගං… මොහං… මානං… දිට්ඨිං… පත්ථනං උපනිස්සාය අදුක්ඛමසුඛාය වෙදනාය සම්පයුත්තෙන චිත්තෙන දානං දෙති…පෙ… සමාපත්තිං උප්පාදෙති. අදුක්ඛමසුඛාය වෙදනාය සම්පයුත්තෙන චිත්තෙන අදින්නං ආදියති…පෙ… නිගමඝාතං කරොති. අදුක්ඛමසුඛාය වෙදනාය සම්පයුත්තා සද්ධා… සීලං… සුතං… චාගො… පඤ්ඤා… රාගො… මොහො… මානො… දිට්ඨි… පත්ථනා… අදුක්ඛමසුඛාය වෙදනාය සම්පයුත්තාය සද්ධාය…පෙ… පත්ථනාය අදුක්ඛමසුඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (1)

අදුක්ඛමසුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ….

පකතූපනිස්සයො – අදුක්ඛමසුඛාය වෙදනාය සම්පයුත්තං සද්ධං උපනිස්සාය සුඛාය වෙදනාය සම්පයුත්තෙන චිත්තෙන දානං දෙති…පෙ… දිට්ඨිං ගණ්හාති. අදුක්ඛමසුඛාය වෙදනාය සම්පයුත්තං සීලං…පෙ… පත්ථනං උපනිස්සාය සුඛාය වෙදනාය සම්පයුත්තෙන චිත්තෙන දානං දෙති…පෙ… සමාපත්තිං උප්පාදෙති. සුඛාය වෙදනාය සම්පයුත්තෙන චිත්තෙන අදින්නං ආදියති…පෙ… නිගමඝාතං කරොති. අදුක්ඛමසුඛාය වෙදනාය සම්පයුත්තා සද්ධා…පෙ… පත්ථනා සුඛාය වෙදනාය සම්පයුත්තාය සද්ධාය…පෙ… පත්ථනාය… සුඛසහගතස්ස කායවිඤ්ඤාණස්ස සුඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (2)

අදුක්ඛමසුඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ….

පකතූපනිස්සයො – අදුක්ඛමසුඛාය වෙදනාය සම්පයුත්තං සද්ධං උපනිස්සාය අත්තානං ආතාපෙති පරිතාපෙති, පරියිට්ඨිමූලකං දුක්ඛං පච්චනුභොති. අදුක්ඛමසුඛාය වෙදනාය සම්පයුත්තං සීලං…පෙ… පත්ථනං උපනිස්සාය පාණං හනති. දුක්ඛාය වෙදනාය සම්පයුත්තෙන චිත්තෙන අදින්නං ආදියති…පෙ… සඞ්ඝං භින්දති. අදුක්ඛමසුඛාය වෙදනාය සම්පයුත්තා සද්ධා…පෙ… පත්ථනා… දොසස්ස… මොහස්ස… දුක්ඛසහගතස්ස කායවිඤ්ඤාණස්ස… දුක්ඛාය වෙදනාය සම්පයුත්තකානං ඛන්ධානං උපනිස්සයපච්චයෙන පච්චයො. (3)

ආසෙවනපච්චයො

56. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස ආසෙවනපච්චයෙන පච්චයො – පුරිමා පුරිමා සුඛාය වෙදනාය සම්පයුත්තා ඛන්ධා පච්ඡිමානං පච්ඡිමානං සුඛාය වෙදනාය සම්පයුත්තකානං ඛන්ධානං ආසෙවනපච්චයෙන පච්චයො. සුඛාය වෙදනාය සම්පයුත්තං අනුලොමං ගොත්‍රභුස්ස… අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස ආසෙවනපච්චයෙන පච්චයො. (1)

දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස ආසෙවනපච්චයෙන පච්චයො – පුරිමා පුරිමා දුක්ඛාය වෙදනාය සම්පයුත්තා ඛන්ධා පච්ඡිමානං පච්ඡිමානං දුක්ඛාය වෙදනාය සම්පයුත්තකානං ඛන්ධානං ආසෙවනපච්චයෙන පච්චයො. (1)

අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස ආසෙවනපච්චයෙන පච්චයො – පුරිමා පුරිමා අදුක්ඛමසුඛාය වෙදනාය සම්පයුත්තා ඛන්ධා පච්ඡිමානං පච්ඡිමානං අදුක්ඛමසුඛාය වෙදනාය සම්පයුත්තකානං ඛන්ධානං ආසෙවනපච්චයෙන පච්චයො. අදුක්ඛමසුඛාය වෙදනාය සම්පයුත්තං අනුලොමං ගොත්‍රභුස්ස… අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස ආසෙවනපච්චයෙන පච්චයො. (1)

කම්මපච්චයො

57. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා [නානාඛණිකා (ක.)]. සහජාතා – සුඛාය වෙදනාය සම්පයුත්තා චෙතනා සම්පයුත්තකානං ඛන්ධානං කම්මපච්චයෙන පච්චයො. පටිසන්ධික්ඛණෙ…පෙ…. නානාක්ඛණිකා – සුඛාය වෙදනාය සම්පයුත්තා චෙතනා විපාකානං සුඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (1)

සුඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො. නානාක්ඛණිකා – සුඛාය වෙදනාය සම්පයුත්තා චෙතනා විපාකානං දුක්ඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (2)

සුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො. නානාක්ඛණිකා – සුඛාය වෙදනාය සම්පයුත්තා චෙතනා විපාකානං අදුක්ඛමසුඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (3)

58. දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – දුක්ඛාය වෙදනාය සම්පයුත්තා චෙතනා සම්පයුත්තකානං ඛන්ධානං කම්මපච්චයෙන පච්චයො. නානාක්ඛණිකා – දුක්ඛාය වෙදනාය සම්පයුත්තා චෙතනා විපාකානං දුක්ඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (1)

දුක්ඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො. නානාක්ඛණිකා – දුක්ඛාය වෙදනාය සම්පයුත්තා චෙතනා විපාකානං අදුක්ඛමසුඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (2)

59. අදුක්ඛමසුඛාය වෙදනාය සම්පයුත්තො ධම්මො අදුක්ඛමසුඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – අදුක්ඛමසුඛාය වෙදනාය සම්පයුත්තා චෙතනා සම්පයුත්තකානං ඛන්ධානං කම්මපච්චයෙන පච්චයො. පටිසන්ධික්ඛණෙ…පෙ…. නානාක්ඛණිකා – අදුක්ඛමසුඛාය වෙදනාය සම්පයුත්තා චෙතනා විපාකානං අදුක්ඛමසුඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (1)

අදුක්ඛමසුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො. නානාක්ඛණිකා – අදුක්ඛමසුඛාය වෙදනාය සම්පයුත්තා චෙතනා විපාකානං සුඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (2)

අදුක්ඛමසුඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො. නානාක්ඛණිකා – අදුක්ඛමසුඛාය වෙදනාය සම්පයුත්තා චෙතනා විපාකානං දුක්ඛාය වෙදනාය සම්පයුත්තකානං ඛන්ධානං කම්මපච්චයෙන පච්චයො. (3)

විපාකපච්චයො

60. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස විපාකපච්චයෙන පච්චයො – විපාකො සුඛාය වෙදනාය සම්පයුත්තො එකො ඛන්ධො ද්වින්නං ඛන්ධානං විපාකපච්චයෙන පච්චයො. ද්වෙ ඛන්ධා එකස්ස ඛන්ධස්ස විපාකපච්චයෙන පච්චයො. පටිසන්ධික්ඛණෙ සුඛාය වෙදනාය සම්පයුත්තො එකො ඛන්ධො ද්වින්නං ඛන්ධානං විපාකපච්චයෙන පච්චයො. ද්වෙ ඛන්ධා එකස්ස ඛන්ධස්ස…පෙ…. (1)

දුක්ඛාය වෙදනාය සම්පයුත්තො ධම්මො දුක්ඛාය වෙදනාය සම්පයුත්තස්ස ධම්මස්ස විපාකපච්චයෙන පච්චයො – විපාකො දුක්ඛාය වෙදනාය සම්පයුත්තො එකො ඛන්ධො ද්වින්නං ඛන්ධානං විපාකපච්චයෙන පච්චයො …පෙ…. (1)

අදුක්ඛමසුඛාය වෙදනාය…පෙ… විපාකො අදුක්ඛමසුඛාය වෙදනාය සම්පයුත්තො එකො ඛන්ධො ද්වින්නං ඛන්ධානං…පෙ… පටිසන්ධික්ඛණෙ…පෙ…. (1)

ආහාරපච්චයාදි

61. සුඛාය වෙදනාය සම්පයුත්තො ධම්මො සුඛාය වෙදනාය සම්පයුත්තස්ස ධම්මස්ස ආහාරපච්චයෙන පච්චයො…පෙ… ඉන්ද්‍රියපච්චයෙන පච්චයො…පෙ… ඣානපච්චයෙන පච්චයො…පෙ… මග්ගපච්චයෙන පච්චයො…පෙ… සම්පයුත්තපච්චයෙන පච්චයො…පෙ… අත්ථිපච්චයෙන පච්චයො…පෙ… නත්ථිපච්චයෙන පච්චයො…පෙ… විගතපච්චයෙන පච්චයො…පෙ… අවිගතපච්චයෙන පච්චයො…පෙ….