1. විභඞ්ගවාරො
නහෙතුපච්චයො
396. අකුසලං ධම්මං සම්පයුත්තො අකුසලො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ සම්පයුත්තො විචිකිච්ඡාසහගතො උද්ධච්චසහගතො මොහො. (1)
397. අබ්‍යාකතං ධම්මං සම්පයුත්තො අබ්‍යාකතො ධම්මො උප්පජ්ජති නහෙතුපච්චයා – අහෙතුකං විපාකාබ්‍යාකතං කිරියාබ්‍යාකතං එකං ඛන්ධං සම්පයුත්තා තයො ඛන්ධා, තයො ඛන්ධෙ සම්පයුත්තො එකො ඛන්ධො, ද්වෙ ඛන්ධෙ සම්පයුත්තා ද්වෙ ඛන්ධා; අහෙතුකපටිසන්ධික්ඛණෙ විපාකාබ්‍යාකතං එකං ඛන්ධං සම්පයුත්තා තයො ඛන්ධා, තයො ඛන්ධෙ සම්පයුත්තො එකො ඛන්ධො, ද්වෙ ඛන්ධෙ සම්පයුත්තා ද්වෙ ඛන්ධා. (සංඛිත්තං.) (1)