1. පච්චයානුලොමං
1. විභඞ්ගවාරො
හෙතුපච්චයො
338. කුසලං ධම්මං සංසට්ඨො කුසලො ධම්මො උප්පජ්ජති හෙතුපච්චයා – කුසලං එකං ඛන්ධං සංසට්ඨා තයො ඛන්ධා, තයො ඛන්ධෙ සංසට්ඨො එකො ඛන්ධො, ද්වෙ ඛන්ධෙ සංසට්ඨා ද්වෙ ඛන්ධා. (1)
අකුසලං ධම්මං සංසට්ඨො අකුසලො ධම්මො උප්පජ්ජති හෙතුපච්චයා – අකුසලං එකං ඛන්ධං සංසට්ඨා තයො ඛන්ධා, තයො ඛන්ධෙ සංසට්ඨො එකො ඛන්ධො, ද්වෙ ඛන්ධෙ සංසට්ඨා ද්වෙ ඛන්ධා. (1)
අබ්‍යාකතං ධම්මං සංසට්ඨො අබ්‍යාකතො ධම්මො උප්පජ්ජති හෙතුපච්චයා – විපාකාබ්‍යාකතං කිරියාබ්‍යාකතං එකං ඛන්ධං සංසට්ඨා තයො ඛන්ධා, තයො ඛන්ධෙ සංසට්ඨො එකො ඛන්ධො, ද්වෙ ඛන්ධෙ සංසට්ඨා ද්වෙ ඛන්ධා; පටිසන්ධික්ඛණෙ විපාකාබ්‍යාකතං එකං ඛන්ධං සංසට්ඨා තයො ඛන්ධා, තයො ඛන්ධෙ සංසට්ඨො එකො ඛන්ධො, ද්වෙ ඛන්ධෙ සංසට්ඨා ද්වෙ ඛන්ධා. (1)
ආරම්මණාදිපච්චයා
339. කුසලං ධම්මං සංසට්ඨො කුසලො ධම්මො උප්පජ්ජති ආරම්මණපච්චයා… අධිපතිපච්චයා… (අධිපති පටිසන්ධික්ඛණෙ නත්ථි.) අනන්තරපච්චයා… සමනන්තරපච්චයා… සහජාතපච්චයා… අඤ්ඤමඤ්ඤපච්චයා… නිස්සයපච්චයා… උපනිස්සයපච්චයා. (සබ්බානි පදානි හෙතුමූලකසදිසානි).
පුරෙජාතපච්චයො
340. කුසලං ධම්මං සංසට්ඨො කුසලො ධම්මො උප්පජ්ජති පුරෙජාතපච්චයා – කුසලං එකං ඛන්ධං සංසට්ඨා තයො ඛන්ධා, තයො ඛන්ධෙ සංසට්ඨො එකො ඛන්ධො, ද්වෙ ඛන්ධෙ සංසට්ඨා ද්වෙ ඛන්ධා, වත්ථුං පුරෙජාතපච්චයා. (1)
අකුසලං ධම්මං සංසට්ඨො අකුසලො ධම්මො උප්පජ්ජති පුරෙජාතපච්චයා – අකුසලං එකං ඛන්ධං සංසට්ඨා තයො ඛන්ධා, තයො ඛන්ධෙ සංසට්ඨො එකො ඛන්ධො, ද්වෙ ඛන්ධෙ සංසට්ඨා ද්වෙ ඛන්ධා; වත්ථුං පුරෙජාතපච්චයා. (1)
අබ්‍යාකතං ධම්මං සංසට්ඨො අබ්‍යාකතො ධම්මො උප්පජ්ජති පුරෙජාතපච්චයා – විපාකාබ්‍යාකතං කිරියාබ්‍යාකතං එකං ඛන්ධං සංසට්ඨා තයො ඛන්ධා, තයො ඛන්ධෙ සංසට්ඨො එකො ඛන්ධො, ද්වෙ ඛන්ධෙ සංසට්ඨා ද්වෙ ඛන්ධා; වත්ථුං පුරෙජාතපච්චයා. (1)
ආසෙවනපච්චයො
341. කුසලං ධම්මං සංසට්ඨො…පෙ… අකුසලං ධම්මං…පෙ… අබ්‍යාකතං ධම්මං සංසට්ඨො අබ්‍යාකතො ධම්මො උප්පජ්ජති ආසෙවනපච්චයා – කිරියාබ්‍යාකතං එකං ඛන්ධං සංසට්ඨා…පෙ….
කම්මපච්චයො
342. කුසලං ධම්මං සංසට්ඨො කුසලො ධම්මො උප්පජ්ජති කම්මපච්චයා…පෙ… අකුසලං ධම්මං සංසට්ඨො…පෙ… අබ්‍යාකතං ධම්මං සංසට්ඨො…පෙ….
විපාකපච්චයො
343. අබ්‍යාකතං ධම්මං සංසට්ඨො අබ්‍යාකතො ධම්මො උප්පජ්ජති විපාකපච්චයා – විපාකාබ්‍යාකතං…පෙ….
ආහාරාදිපච්චයා
344. කුසලං ධම්මං සංසට්ඨො කුසලො ධම්මො උප්පජ්ජති ආහාරපච්චයා… ඉන්ද්‍රියපච්චයා … ඣානපච්චයා… මග්ගපච්චයා… සම්පයුත්තපච්චයා. (ඉමානි පදානි හෙතුපච්චයසදිසානි.)
විප්පයුත්තපච්චයො
345. කුසලං ධම්මං සංසට්ඨො කුසලො ධම්මො උප්පජ්ජති විප්පයුත්තපච්චයා – කුසලං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ සංසට්ඨා ද්වෙ ඛන්ධා; වත්ථුං විප්පයුත්තපච්චයා.
අකුසලං ධම්මං…පෙ… වත්ථුං විප්පයුත්තපච්චයා.
අබ්‍යාකතං ධම්මං…පෙ… වත්ථුං විප්පයුත්තපච්චයා.
අත්ථිආදිපච්චයා
346. කුසලං ධම්මං සංසට්ඨො කුසලො ධම්මො උප්පජ්ජති අත්ථිපච්චයා… නත්ථිපච්චයා… විගතපච්චයා… අවිගතපච්චයා (හෙතුපච්චයසදිසං).