1. විභඞ්ගවාරො
නහෙතුපච්චයො
334. අකුසලං ධම්මං නිස්සාය අකුසලො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ නිස්සාය විචිකිච්ඡාසහගතො උද්ධච්චසහගතො මොහො. (1)
අබ්‍යාකතං ධම්මං නිස්සාය අබ්‍යාකතො ධම්මො උප්පජ්ජති නහෙතුපච්චයා – අහෙතුකං විපාකාබ්‍යාකතං කිරියාබ්‍යාකතං එකං ඛන්ධං නිස්සාය තයො ඛන්ධා චිත්තසමුට්ඨානඤ්ච රූපං, තයො ඛන්ධෙ නිස්සාය එකො ඛන්ධො චිත්තසමුට්ඨානඤ්ච රූපං, ද්වෙ ඛන්ධ නිස්සාය ද්වෙ ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ විපාකාබ්‍යාකතං එකං ඛන්ධං නිස්සාය තයො ඛන්ධා කටත්තා ච රූපං…පෙ… ද්වෙ ඛන්ධෙ නිස්සාය ද්වෙ ඛන්ධා කටත්තා ච රූපං; ඛන්ධෙ නිස්සාය වත්ථු, වත්ථුං නිස්සාය ඛන්ධා; එකං මහාභූතං නිස්සාය තයො මහාභූතා…පෙ… මහාභූතෙ නිස්සාය චිත්තසමුට්ඨානං රූපං කටත්තාරූපං උපාදාරූපං; බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං එකං මහාභූතං නිස්සාය තයො මහාභූතා…පෙ… මහාභූතෙ නිස්සාය කටත්තාරූපං උපාදාරූපං; චක්ඛායතනං නිස්සාය චක්ඛුවිඤ්ඤාණං…පෙ… කායායතනං නිස්සාය කායවිඤ්ඤාණං; වත්ථුං නිස්සාය අහෙතුකා විපාකාබ්‍යාකතා කිරියාබ්‍යාකතා ඛන්ධා. (1)
අබ්‍යාකතං ධම්මං නිස්සාය අකුසලො ධම්මො උප්පජ්ජති නහෙතුපච්චයා – වත්ථුං නිස්සාය විචිකිච්ඡාසහගතො උද්ධච්චසහගතො මොහො. (2)
අකුසලඤ්ච අබ්‍යාකතඤ්ච ධම්මං නිස්සාය අකුසලො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච නිස්සාය විචිකිච්ඡාසහගතො උද්ධච්චසහගතො මොහො. (1)
(යථා පච්චයවාරෙ, එවං විත්ථාරෙතබ්බං.)