1. විභඞ්ගවාරො
නහෙතුපච්චයො
277. අකුසලං ධම්මං පච්චයා අකුසලො ධම්මො උප්පජ්ජති න හෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පච්චයා විචිකිච්ඡාසහගතො උද්ධච්චසහගතො මොහො. (1)
අබ්‍යාකතං ධම්මං පච්චයා අබ්‍යාකතො ධම්මො උප්පජ්ජති නහෙතුපච්චයා – අහෙතුකං විපාකාබ්‍යාකතං කිරියාබ්‍යාකතං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ පච්චයා ද්වෙ ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ විපාකාබ්‍යාකතං එකං ඛන්ධං පච්චයා තයො ඛන්ධා කටත්තා ච රූපං…පෙ… ද්වෙ ඛන්ධෙ පච්චයා ද්වෙ ඛන්ධා කටත්තා ච රූපං; ඛන්ධෙ පච්චයා වත්ථු, වත්ථුං පච්චයා ඛන්ධා; එකං මහාභූතං පච්චයා තයො මහාභූතා…පෙ… මහාභූතෙ පච්චයා චිත්තසමුට්ඨානං රූපං කටත්තාරූපං උපාදාරූපං; බාහිරං … ආහාරසමුට්ඨානං… උතුසමුට්ඨානං … අසඤ්ඤසත්තානං එකං මහාභූතං පච්චයා තයො මහාභූතා…පෙ… මහාභූතෙ පච්චයා කටත්තාරූපං උපාදාරූපං. චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං; වත්ථුං පච්චයා අහෙතුකා විපාකාබ්‍යාකතා කිරියාබ්‍යාකතා ඛන්ධා. (1)
අබ්‍යාකතං ධම්මං පච්චයා අකුසලො ධම්මො උප්පජ්ජති නහෙතුපච්චයා – වත්ථුං පච්චයා විචිකිච්ඡාසහගතො උද්ධච්චසහගතො මොහො. (2)
අකුසලඤ්ච අබ්‍යාකතඤ්ච ධම්මං පච්චයා අකුසලො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)
නආරම්මණපච්චයො
278. කුසලං ධම්මං පච්චයා අබ්‍යාකතො ධම්මො උප්පජ්ජති නආරම්මණපච්චයා – කුසලෙ ඛන්ධෙ පච්චයා චිත්තසමුට්ඨානං රූපං.
(යථා පටිච්චවාරෙ නආරම්මණපච්චයා, එවං විත්ථාරෙතබ්බං.)
නඅධිපතිපච්චයො
279. කුසලං ධම්මං පච්චයා කුසලො ධම්මො උප්පජ්ජති නඅධිපතිපච්චයා – කුසලං එකං ඛන්ධං පච්චයා… තීණි.
අකුසලං ධම්මං පච්චයා… තීණි.
අබ්‍යාකතං ධම්මං පච්චයා…පෙ… පටිසන්ධික්ඛණෙ…පෙ… (අබ්‍යාකතං පරිපුණ්ණං කාතබ්බං). බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං එකං මහාභූතං පච්චයා…පෙ… චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා විපාකාබ්‍යාකතා කිරියාබ්‍යාකතා ඛන්ධා.
අබ්‍යාකතං ධම්මං පච්චයා කුසලො ධම්මො උප්පජ්ජති නඅධිපතිපච්චයා, වත්ථුං පච්චයා කුසලා ඛන්ධා…පෙ….
(යථා අනුලොමෙ සහජාතපච්චයං, එවං ගණෙතබ්බං.)
නඅනන්තරාදිපච්චයා
280. කුසලං ධම්මං පච්චයා අබ්‍යාකතො ධම්මො උප්පජ්ජති නඅනන්තරපච්චයා… නසමනන්තරපච්චයා… නඅඤ්ඤමඤ්ඤපච්චයා… නඋපනිස්සයපච්චයා… නපුරෙජාතපච්චයා.
(යථා පටිච්චවාරෙ, එවං විත්ථාරෙතබ්බං.)
නපච්ඡාජාතාදිපච්චයා
281. කුසලං ධම්මං පච්චයා කුසලො ධම්මො උප්පජ්ජති නපච්ඡාජාතපච්චයා… නආසෙවනපච්චයා…පෙ… චක්ඛායතනං පච්චයා…පෙ… (නපච්ඡාජාතපච්චයම්පි නආසෙවනපච්චයම්පි පරිපුණ්ණං, සත්තරස.)
(යථා අනුලොමෙ සහජාතපච්චයං, එවං විත්ථාරෙතබ්බං.)
නකම්මපච්චයො
282. කුසලං ධම්මං පච්චයා කුසලො ධම්මො උප්පජ්ජති නකම්මපච්චයා – කුසලෙ ඛන්ධෙ පච්චයා කුසලා චෙතනා. (1)
අකුසලං ධම්මං පච්චයා අකුසලො ධම්මො උප්පජ්ජති නකම්මපච්චයා – අකුසලෙ ඛන්ධෙ පච්චයා අකුසලා චෙතනා. (1)
අබ්‍යාකතං ධම්මං පච්චයා අබ්‍යාකතො ධම්මො උප්පජ්ජති නකම්මපච්චයා, කිරියාබ්‍යාකතෙ ඛන්ධෙ පච්චයා කිරියාබ්‍යාකතා චෙතනා; බාහිරං… ආහාරසමුට්ඨානං… උතුසමුට්ඨානං එකං මහාභූතං පච්චයා…පෙ… උපාදාරූපං, වත්ථුං පච්චයා කිරියාබ්‍යාකතා චෙතනා. (1)
අබ්‍යාකතං ධම්මං පච්චයා කුසලො ධම්මො උප්පජ්ජති නකම්මපච්චයා – වත්ථුං පච්චයා කුසලා චෙතනා. (2)
අබ්‍යාකතං ධම්මං පච්චයා අකුසලො ධම්මො උප්පජ්ජති නකම්මපච්චයා – වත්ථුං පච්චයා අකුසලා චෙතනා. (3)
කුසලඤ්ච අබ්‍යාකතඤ්ච ධම්මං පච්චයා කුසලො ධම්මො උප්පජ්ජති නකම්මපච්චයා – කුසලෙ ඛන්ධෙ ච වත්ථුඤ්ච පච්චයා කුසලා චෙතනා. (1)
අකුසලඤ්ච අබ්‍යාකතඤ්ච ධම්මං පච්චයා අකුසලො ධම්මො උප්පජ්ජති නකම්මපච්චයා – අකුසලෙ ඛන්ධෙ ච වත්ථුඤ්ච පච්චයා අකුසලා චෙතනා. (1)
නවිපාකපච්චයො
283. කුසලං ධම්මං පච්චයා කුසලො ධම්මො උප්පජ්ජති නවිපාකපච්චයා – කුසලං එකං ඛන්ධං පච්චයා… තීණි.
අකුසලං ධම්මං පච්චයා… තීණි.
අබ්‍යාකතං ධම්මං පච්චයා අබ්‍යාකතො ධම්මො උප්පජ්ජති නවිපාකපච්චයා – කිරියාබ්‍යාකතං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ පච්චයා ද්වෙ ඛන්ධා චිත්තසමුට්ඨානඤ්ච රූපං, එකං මහාභූතං පච්චයා තයො මහාභූතා…පෙ… මහාභූතෙ පච්චයා චිත්තසමුට්ඨානං රූපං උපාදාරූපං; බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං එකං මහාභූතං පච්චයා තයො මහාභූතා…පෙ… මහාභූතෙ පච්චයා කටත්තාරූපං උපාදාරූපං, වත්ථුං පච්චයා කිරියාබ්‍යාකතා ඛන්ධා.
අබ්‍යාකතං ධම්මං පච්චයා කුසලො ධම්මො උප්පජ්ජති නවිපාකපච්චයා – වත්ථුං පච්චයා කුසලා ඛන්ධා.
(විපාකං ඨපෙත්වා සබ්බත්ථ විත්ථාරෙතබ්බං.)
නආහාරාදිපච්චයා
284. අබ්‍යාකතං ධම්මං පච්චයා අබ්‍යාකතො ධම්මො උප්පජ්ජති නආහාරපච්චයා… නඉන්ද්‍රියපච්චයා… නඣානපච්චයා…පෙ… චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං. (න ඣානෙ ඉදං නානාකරණං.) නමග්ගපච්චයා… චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං. වත්ථුං පච්චයා අහෙතුකවිපාකාබ්‍යාකතා කිරියාබ්‍යාකතා ඛන්ධා. (නමග්ගෙ ඉදං නානාකරණං.)
(අවසෙසං යථා පටිච්චවාරෙ පච්චනීයං, එවං විත්ථාරෙතබ්බං.)
නසම්පයුත්තාදිපච්චයා
285. නසම්පයුත්තපච්චයා … නවිප්පයුත්තපච්චයා… නොනත්ථිපච්චයා… කුසලං ධම්මං පච්චයා අබ්‍යාකතො ධම්මො උප්පජ්ජති නොවිගතපච්චයා – කුසලෙ ඛන්ධෙ පච්චයා චිත්තසමුට්ඨානං රූපං.
(යථා පටිච්චවාරෙ, එවං විත්ථාරෙතබ්බං.)