1. විභඞ්ගවාරො

නහෙතුපච්චයො

239. අකුසලං ධම්මං සහජාතො අකුසලො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ සහජාතො විචිකිච්ඡාසහගතො උද්ධච්චසහගතො මොහො. (1)

අබ්‍යාකතං ධම්මං සහජාතො අබ්‍යාකතො ධම්මො උප්පජ්ජති නහෙතුපච්චයා – අහෙතුකං විපාකාබ්‍යාකතං කිරියාබ්‍යාකතං එකං ඛන්ධං සහජාතා තයො ඛන්ධා චිත්තසමුට්ඨානඤ්ච රූපං, තයො ඛන්ධෙ සහජාතො එකො ඛන්ධො චිත්තසමුට්ඨානඤ්ච රූපං, ද්වෙ ඛන්ධෙ සහජාතා ද්වෙ ඛන්ධා චිත්තසමුට්ඨානඤ්ච රූපං; අහෙතුකපටිසන්ධික්ඛණෙ විපාකාබ්‍යාකතං එකං ඛන්ධං සහජාතා තයො ඛන්ධා කටත්තා ච රූපං, තයො ඛන්ධෙ සහජාතො එකො ඛන්ධො කටත්තා ච රූපං, ද්වෙ ඛන්ධෙ සහජාතා ද්වෙ ඛන්ධා කටත්තා ච රූපං, ඛන්ධෙ සහජාතං වත්ථු, වත්ථුං සහජාතා ඛන්ධා; එකං මහාභූතං සහජාතා තයො මහාභූතා, තයො මහාභූතෙ සහජාතං එකං මහාභූතං, ද්වෙ මහාභූතෙ සහජාතා ද්වෙ මහාභූතා, මහාභූතෙ සහජාතං චිත්තසමුට්ඨානං රූපං කටත්තාරූපං උපාදාරූපං; බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං එකං මහාභූතං සහජාතා තයො මහාභූතා…පෙ… මහාභූතෙ සහජාතං කටත්තාරූපං උපාදාරූපං. (1)

(යථා පටිච්චවාරෙ, එවං විත්ථාරෙතබ්බං.)