21. එකවීසතිමවග්ගො

(206) 7. ධම්මකථා

887. සබ්බෙ ධම්මා නියතාති? ආමන්තා. මිච්ඡත්තනියතාති? න හෙවං වත්තබ්බෙ…පෙ… සම්මත්තනියතාති? න හෙවං වත්තබ්බෙ…පෙ… නත්ථි අනියතො රාසීති? න හෙවං වත්තබ්බෙ…පෙ… නනු අත්ථි අනියතො රාසීති? ආමන්තා. හඤ්චි අත්ථි අනියතො රාසි, නො ච වත රෙ වත්තබ්බෙ – ‘‘සබ්බෙ ධම්මා නියතා’’ති.

සබ්බෙ ධම්මා නියතාති? ආමන්තා. නනු තයො රාසී වුත්තා භගවතා – මිච්ඡත්තනියතො රාසි, සම්මත්තනියතො රාසි, අනියතො රාසීති [ධ. ස. තිකමාතිකා 15]? ආමන්තා. හඤ්චි තයො රාසී වුත්තා භගවතා – මිච්ඡත්තනියතො රාසි, සම්මත්තනියතො රාසි, අනියතො රාසි, නො ච වත රෙ වත්තබ්බෙ – ‘‘සබ්බෙ ධම්මා නියතා’’ති.

රූපං රූපට්ඨෙන නියතන්ති? ආමන්තා. මිච්ඡත්තනියතන්ති? න හෙවං වත්තබ්බෙ…පෙ… සම්මත්තනියතන්ති? න හෙවං වත්තබ්බෙ…පෙ… වෙදනා…පෙ… සඤ්ඤා…පෙ… සඞ්ඛාරා…පෙ… විඤ්ඤාණං විඤ්ඤාණට්ඨෙන නියතන්ති? ආමන්තා. මිච්ඡත්තනියතන්ති? න හෙවං වත්තබ්බෙ…පෙ… සම්මත්තනියතන්ති? න හෙවං වත්තබ්බෙ…පෙ….

888. න වත්තබ්බං – රූපං රූපට්ඨෙන නියතං…පෙ… වෙදනා…පෙ… සඤ්ඤා…පෙ… සඞ්ඛාරා…පෙ… විඤ්ඤාණං විඤ්ඤාණට්ඨෙන නියතන්ති? ආමන්තා. රූපං වෙදනා හොති…පෙ… සඤ්ඤා හොති… සඞ්ඛාරා හොන්ති… විඤ්ඤාණං හොති… වෙදනා…පෙ… සඤ්ඤා…පෙ… සඞ්ඛාරා…පෙ… විඤ්ඤාණං රූපං හොති…පෙ… වෙදනා හොති… සඤ්ඤා හොති… සඞ්ඛාරා හොන්තීති? න හෙවං වත්තබ්බෙ. තෙන හි රූපං රූපට්ඨෙන නියතං, වෙදනා…පෙ… සඤ්ඤා…පෙ… සඞ්ඛාරා…පෙ… විඤ්ඤාණං විඤ්ඤාණට්ඨෙන නියතන්ති.

ධම්මකථා නිට්ඨිතා.