21. එකවීසතිමවග්ගො

(207) 8. කම්මකථා

889. සබ්බෙ කම්මා නියතාති? ආමන්තා. මිච්ඡත්තනියතාති? න හෙවං වත්තබ්බෙ…පෙ… සම්මත්තනියතාති? න හෙවං වත්තබ්බෙ…පෙ… නත්ථි අනියතො රාසීති? න හෙවං වත්තබ්බෙ…පෙ… නනු අත්ථි අනියතො රාසීති? ආමන්තා. හඤ්චි අත්ථි අනියතො රාසි, නො ච වත රෙ වත්තබ්බෙ – ‘‘සබ්බෙ කම්මා නියතා’’ති.

සබ්බෙ කම්මා නියතාති? ආමන්තා. නනු තයො රාසී වුත්තා භගවතා – මිච්ඡත්තනියතො රාසි, සම්මත්තනියතො රාසි, අනියතො රාසීති? ආමන්තා. හඤ්චි තයො රාසී වුත්තා භගවතා – මිච්ඡත්තනියතො රාසි, සම්මත්තනියතො රාසි, අනියතො රාසි, නො ච වත රෙ වත්තබ්බෙ – ‘‘සබ්බෙ කම්මා නියතා’’ති.

890. දිට්ඨධම්මවෙදනීයං කම්මං දිට්ඨධම්මවෙදනීයට්ඨෙන නියතන්ති? ආමන්තා. මිච්ඡත්තනියතන්ති? න හෙවං වත්තබ්බෙ…පෙ… සම්මත්තනියතන්ති? න හෙවං වත්තබ්බෙ…පෙ…. උපපජ්ජවෙදනීයං කම්මං…පෙ… අපරාපරියවෙදනීයං කම්මං අපරාපරියවෙදනීයට්ඨෙන නියතන්ති? ආමන්තා. මිච්ඡත්තනියතන්ති? න හෙවං වත්තබ්බෙ…පෙ… සම්මත්තනියතන්ති? න හෙවං වත්තබ්බෙ…පෙ….

891. න වත්තබ්බං – දිට්ඨධම්මවෙදනීයං කම්මං දිට්ඨධම්මවෙදනීයට්ඨෙන නියතං, උපපජ්ජවෙදනීයං කම්මං…පෙ… අපරාපරියවෙදනීයං කම්මං අපරාපරියවෙදනීයට්ඨෙන නියතන්ති? ආමන්තා. දිට්ඨධම්මවෙදනීයං කම්මං උපපජ්ජවෙදනීයං හොති, අපරාපරියවෙදනීයං හොති…පෙ… උපපජ්ජවෙදනීයං කම්මං දිට්ඨධම්මවෙදනීයං හොති, අපරාපරියවෙදනීයං හොති…පෙ… අපරාපරියවෙදනීයං කම්මං දිට්ඨධම්මවෙදනීයං හොති, උපපජ්ජවෙදනීයං හොතීති? න හෙවං වත්තබ්බෙ. තෙන හි දිට්ඨධම්මවෙදනීයං කම්මං දිට්ඨධම්මවෙදනීයට්ඨෙන නියතං, උපපජ්ජවෙදනීයං කම්මං…පෙ… අපරාපරියවෙදනීයං කම්මං අපරාපරියවෙදනීයට්ඨෙන නියතන්ති.

කම්මකථා නිට්ඨිතා.

එකවීසතිමවග්ගො.

තස්සුද්දානං –

සාසනං නවං කතං අත්ථි කොචි තථාගතස්ස සාසනං නවං කරොති ලබ්භා තථාගතස්ස සාසනං පුන නවං කාතුං, පුථුජ්ජනො තෙධාතුකෙහි ධම්මෙහි අවිවිත්තො, අත්ථි කිඤ්චි සංයොජනං අප්පහාය අරහත්තප්පත්ති, අත්ථි අධිප්පායිද්ධි බුද්ධානං වා සාවකානං වා, අත්ථි බුද්ධානං බුද්ධෙහි හීනාතිරෙකතා, සබ්බා දිසා බුද්ධා තිට්ඨන්ති, සබ්බෙ ධම්මා නියතා, සබ්බෙ කම්මා නියතාති.