21. එකවීසතිමවග්ගො

(205) 6. සබ්බදිසාකථා

886. සබ්බා දිසා බුද්ධා තිට්ඨන්තීති? ආමන්තා. පුරත්ථිමාය දිසාය බුද්ධො තිට්ඨතීති? න හෙවං වත්තබ්බෙ…පෙ… පුරත්ථිමාය දිසාය බුද්ධො තිට්ඨතීති? ආමන්තා. කින්නාමො සො භගවා, කිංජච්චො, කිංගොත්තො, කින්නාමා තස්ස භගවතො මාතාපිතරො, කින්නාමං තස්ස භගවතො සාවකයුගං, කොනාමො තස්ස භගවතො උපට්ඨාකො, කීදිසං චීවරං ධාරෙති, කීදිසං පත්තං ධාරෙති, කතරස්මිං ගාමෙ වා නිගමෙ වා නගරෙ වා රට්ඨෙ වා ජනපදෙ වාති? න හෙවං වත්තබ්බෙ…පෙ….

දක්ඛිණාය දිසාය…පෙ… පච්ඡිමාය දිසාය…පෙ… උත්තරාය දිසාය…පෙ… හෙට්ඨිමාය දිසාය බුද්ධො තිට්ඨතීති? න හෙවං වත්තබ්බෙ…පෙ… හෙට්ඨිමාය දිසාය බුද්ධො තිට්ඨතීති? ආමන්තා. කින්නාමො සො භගවා…පෙ… ජනපදෙ වාති? න හෙවං වත්තබ්බෙ…පෙ….

උපරිමාය දිසාය බුද්ධො තිට්ඨතීති? න හෙවං වත්තබ්බෙ…පෙ…. උපරිමාය දිසාය බුද්ධො තිට්ඨතීති? ආමන්තා. චාතුමහාරාජිකෙ තිට්ඨති…පෙ… තාවතිංසෙ තිට්ඨති…පෙ… යාමෙ තිට්ඨති…පෙ… තුසිතෙ තිට්ඨති…පෙ… නිම්මානරතියා තිට්ඨති…පෙ… පරනිම්මිතවසවත්තියා තිට්ඨති…පෙ… බ්‍රහ්මලොකෙ තිට්ඨතීති? න හෙවං වත්තබ්බෙ…පෙ….

සබ්බදිසාකථා නිට්ඨිතා.