21. එකවීසතිමවග්ගො

(202) 3. සංයොජනකථා

881. අත්ථි කිඤ්චි සංයොජනං අප්පහාය අරහත්තප්පත්තීති? ආමන්තා. අත්ථි කිඤ්චි සක්කායදිට්ඨිං අප්පහාය…පෙ… විචිකිච්ඡං අප්පහාය…පෙ… සීලබ්බතපරාමාසං අප්පහාය… රාගං අප්පහාය… දොසං අප්පහාය… මොහං අප්පහාය… අනොත්තප්පං අප්පහාය අරහත්තප්පත්තීති? න හෙවං වත්තබ්බෙ…පෙ….

අත්ථි කිඤ්චි සංයොජනං අප්පහාය අරහත්තප්පත්තීති? ආමන්තා. අරහා සරාගො සදොසො සමොහො සමානො සමක්ඛො සපළාසො සඋපායාසො සකිලෙසොති? න හෙවං වත්තබ්බෙ…පෙ… නනු අරහා නිරාගො නිද්දොසො නිම්මොහො නිම්මානො නිම්මක්ඛො නිප්පළාසො නිරුපායාසො නික්කිලෙසොති? ආමන්තා. හඤ්චි අරහා නිරාගො…පෙ… නික්කිලෙසො, නො ච වත රෙ වත්තබ්බෙ – ‘‘අත්ථි කිඤ්චි සංයොජනං අප්පහාය අරහත්තප්පත්තී’’ති.

882. න වත්තබ්බං – ‘‘අත්ථි කිඤ්චි සංයොජනං අප්පහාය අරහත්තප්පත්තී’’ති? ආමන්තා. අරහා සබ්බං බුද්ධවිසයං ජානාතීති? න හෙවං වත්තබ්බෙ. තෙන හි අත්ථි කිඤ්චි සංයොජනං අප්පහාය අරහත්තප්පත්තීති.

සංයොජනකථා නිට්ඨිතා.