21. එකවීසතිමවග්ගො

(203) 4. ඉද්ධිකථා

883. අත්ථි අධිප්පායඉද්ධි බුද්ධානං වා සාවකානං වාති? ආමන්තා. ‘‘නිච්චපණ්ණා රුක්ඛා හොන්තූ’’ති – අත්ථි අධිප්පායඉද්ධි බුද්ධානං වා සාවකානං වාති? න හෙවං වත්තබ්බෙ…පෙ… නිච්චපුප්ඵා රුක්ඛා හොන්තු…පෙ… නිච්චඵලිකා රුක්ඛා හොන්තු… නිච්චං ජුණ්හං හොතු… නිච්චං ඛෙමං හොතු… නිච්චං සුභික්ඛං හොතු… ‘‘නිච්චං සුවත්ථි [සුවුට්ඨිකං (ස්‍යා.)] හොතූ’’ති – අත්ථි අධිප්පායඉද්ධි බුද්ධානං වා සාවකානං වාති? න හෙවං වත්තබ්බෙ…පෙ….

අත්ථි අධිප්පායඉද්ධි බුද්ධානං වා සාවකානං වාති? ආමන්තා. ‘‘උප්පන්නො ඵස්සො මා නිරුජ්ඣී’’ති – අත්ථි අධිප්පායඉද්ධි බුද්ධානං වා සාවකානං වාති? න හෙවං වත්තබ්බෙ…පෙ….

උප්පන්නා වෙදනා…පෙ… සඤ්ඤා… චෙතනා… චිත්තං… සද්ධා… වීරියං… සති… සමාධි…පෙ… පඤ්ඤා මා නිරුජ්ඣීති – අත්ථි අධිප්පායඉද්ධි බුද්ධානං වා සාවකානං වාති? න හෙවං වත්තබ්බෙ…පෙ….

අත්ථි අධිප්පායඉද්ධි බුද්ධානං වා සාවකානං වාති? ආමන්තා. ‘‘රූපං නිච්චං හොතූ’’ති – අත්ථි අධිප්පායඉද්ධි… වෙදනා…පෙ… සඤ්ඤා…පෙ… සඞ්ඛාරා…පෙ… ‘‘විඤ්ඤාණං නිච්චං හොතූ’’ති – අත්ථි අධිප්පායඉද්ධි බුද්ධානං වා සාවකානං වාති? න හෙවං වත්තබ්බෙ…පෙ….

අත්ථි අධිප්පායඉද්ධි බුද්ධානං වා සාවකානං වාති? ආමන්තා. ‘‘ජාතිධම්මා සත්තා මා ජායිංසූ’’ති අත්ථි…පෙ… ‘‘ජරාධම්මා සත්තා මා ජීරිංසූ’’ති…පෙ… ‘‘බ්‍යාධිධම්මා සත්තා මා බ්‍යාධියිංසූ’’ති…පෙ… ‘‘මරණධම්මා සත්තා මා මීයිංසූ’’ති – අත්ථි අධිප්පායඉද්ධි බුද්ධානං වා සාවකානං වාති? න හෙවං වත්තබ්බෙ…පෙ….

884. න වත්තබ්බං – ‘‘අත්ථි අධිප්පායඉද්ධි බුද්ධානං වා සාවකානං වා’’ති? ආමන්තා. නනු ආයස්මා පිලින්දවච්ඡො රඤ්ඤො මාගධස්ස සෙනියස්ස බිම්බිසාරස්ස පාසාදං ‘‘සුවණ්ණ’’න්ත්වෙව අධිමුච්චි, සුවණ්ණො ච පන ආසීති [පාරා. 621; මහාව. 271]? ආමන්තා. හඤ්චි ආයස්මා පිලින්දවච්ඡො රඤ්ඤො මාගධස්ස සෙනියස්ස බිම්බිසාරස්ස පාසාදං සුවණ්ණන්ත්වෙව අධිමුච්චි, සුවණ්ණො ච පන ආසි, තෙන වත රෙ වත්තබ්බෙ – ‘‘අත්ථි අධිප්පායඉද්ධි බුද්ධානං වා සාවකානං වා’’ති.

ඉද්ධිකථා නිට්ඨිතා.