21. එකවීසතිමවග්ගො

(201) 2. අවිවිත්තකථා

879. පුථුජ්ජනො තෙධාතුකෙහි ධම්මෙහි අවිවිත්තොති? ආමන්තා. පුථුජ්ජනො තෙධාතුකෙහි ඵස්සෙහි…පෙ… තෙධාතුකාහි වෙදනාහි… සඤ්ඤාහි … චෙතනාහි… චිත්තෙහි… සද්ධාහි… වීරියෙහි… සතීහි… සමාධීහි…පෙ… තෙධාතුකාහි පඤ්ඤාහි අවිවිත්තොති? න හෙවං වත්තබ්බෙ…පෙ….

පුථුජ්ජනො තෙධාතුකෙහි කම්මෙහි අවිවිත්තොති? ආමන්තා. යස්මිං ඛණෙ පුථුජ්ජනො චීවරං දෙති, තස්මිං ඛණෙ පඨමං ඣානං උපසම්පජ්ජ විහරති…පෙ… ආකාසානඤ්චායතනං උපසම්පජ්ජ විහරතීති? න හෙවං වත්තබ්බෙ…පෙ… යස්මිං ඛණෙ පුථුජ්ජනො පිණ්ඩපාතං දෙති…පෙ… සෙනාසනං දෙති…පෙ… ගිලානපච්චයභෙසජ්ජපරික්ඛාරං දෙති, තස්මිං ඛණෙ චතුත්ථං ඣානං උපසම්පජ්ජ විහරති… නෙවසඤ්ඤානාසඤ්ඤායතනං උපසම්පජ්ජ විහරතීති? න හෙවං වත්තබ්බෙ…පෙ….

880. න වත්තබ්බං – ‘‘පුථුජ්ජනො තෙධාතුකෙහි කම්මෙහි අවිවිත්තො’’ති? ආමන්තා. පුථුජ්ජනස්ස රූපධාතුඅරූපධාතූපගං කම්මං පරිඤ්ඤාතන්ති? න හෙවං වත්තබ්බෙ. තෙන හි පුථුජ්ජනො තෙධාතුකෙහි කම්මෙහි අවිවිත්තොති…පෙ….

අවිවිත්තකථා නිට්ඨිතා.