(200) 1. සාසනකථා

878. සාසනං නවං කතන්ති? ආමන්තා. සතිපට්ඨානා නවං කතාති? න හෙවං වත්තබ්බෙ…පෙ… සාසනං නවං කතන්ති? ආමන්තා. සම්මප්පධානා…පෙ… ඉද්ධිපාදා…පෙ… ඉන්ද්‍රියා…පෙ… බලා…පෙ… බොජ්ඣඞ්ගා නවං කතාති? න හෙවං වත්තබ්බෙ…පෙ… පුබ්බෙ අකුසලං පච්ඡා කුසලං කතන්ති? න හෙවං වත්තබ්බෙ…පෙ… පුබ්බෙ සාසවං…පෙ… සංයොජනියං ගන්ථනියං ඔඝනියං යොගනියං නීවරණියං පරාමට්ඨං උපාදානියං…පෙ… සංකිලෙසිකං පච්ඡා අසංකිලෙසිකං කතන්ති? න හෙවං වත්තබ්බෙ…පෙ….

අත්ථි කොචි තථාගතස්ස සාසනං නවං කරොතීති? ආමන්තා. අත්ථි කොචි සතිපට්ඨානෙ නවං කරොතීති? න හෙවං වත්තබ්බෙ…පෙ… අත්ථි කොචි සම්මප්පධානෙ…පෙ… ඉද්ධිපාදෙ…පෙ… ඉන්ද්‍රියෙ…පෙ… බලෙ…පෙ… බොජ්ඣඞ්ගෙ නවං කරොතීති? න හෙවං වත්තබ්බෙ…පෙ… අත්ථි කොචි පුබ්බෙ අකුසලං පච්ඡා කුසලං කරොතීති? න හෙවං වත්තබ්බෙ…පෙ… අත්ථි කොචි පුබ්බෙ සාසවං…පෙ… සංකිලෙසිකං පච්ඡා අසංකිලෙසියං කරොතීති? න හෙවං වත්තබ්බෙ…පෙ….

ලබ්භා තථාගතස්ස සාසනං පුන නවං කාතුන්ති? ආමන්තා. ලබ්භා සතිපට්ඨානා පුන නවං කාතුන්ති? න හෙවං වත්තබ්බෙ…පෙ… ලබ්භා සම්මප්පධානා…පෙ… ඉද්ධිපාදා…පෙ… ඉන්ද්‍රියා…පෙ… බලා…පෙ… බොජ්ඣඞ්ගා පුන නවං කාතුන්ති? න හෙවං වත්තබ්බෙ…පෙ… ලබ්භා පුබ්බෙ අකුසලං පච්ඡා කුසලං කාතුන්ති? න හෙවං වත්තබ්බෙ…පෙ… ලබ්භා පුබ්බෙ සාසවං…පෙ… සංකිලෙසියං පච්ඡා අසංකිලෙසියං කාතුන්ති? න හෙවං වත්තබ්බෙ…පෙ….

සාසනකථා නිට්ඨිතා.