(195) 2. ඤාණකථා
863. නත්ථි පුථුජ්ජනස්ස ඤාණන්ති? ආමන්තා. නත්ථි පුථුජ්ජනස්ස පඤ්ඤා පජානනා විචයො පවිචයො ධම්මවිචයො සල්ලක්ඛණා උපලක්ඛණා පච්චුපලක්ඛණාති? න හෙවං වත්තබ්බෙ…පෙ… නනු අත්ථි පුථුජ්ජනස්ස පඤ්ඤා පජානනා විචයො…පෙ… පච්චුපලක්ඛණාති? ආමන්තා. හඤ්චි අත්ථි පුථුජ්ජනස්ස පඤ්ඤා පජානනා විචයො…පෙ… පච්චුපලක්ඛණා, නො ච වත රෙ වත්තබ්බෙ – ‘‘නත්ථි පුථුජ්ජනස්ස ඤාණ’’න්ති.
864. නත්ථි පුථුජ්ජනස්ස ඤාණන්ති? ආමන්තා. පුථුජ්ජනො පඨමං ඣානං සමාපජ්ජෙය්‍යාති? ආමන්තා. හඤ්චි පුථුජ්ජනො පඨමං ඣානං සමාපජ්ජෙය්‍ය, නො ච වත රෙ වත්තබ්බෙ – ‘‘නත්ථි පුථුජ්ජනස්ස ඤාණ’’න්ති.
පුථුජ්ජනො දුතියං ඣානං…පෙ… තතියං ඣානං…පෙ… චතුත්ථං ඣානං…පෙ… ආකාසානඤ්චායතනං සමාපජ්ජෙය්‍ය, විඤ්ඤාණඤ්චායතනං ආකිඤ්චඤ්ඤායතනං නෙවසඤ්ඤානාසඤ්ඤායතනං සමාපජ්ජෙය්‍ය, පුථුජ්ජනො දානං දදෙය්‍ය …පෙ… චීවරං දදෙය්‍ය, පිණ්ඩපාතං දදෙය්‍ය, සෙනාසනං දදෙය්‍ය, ගිලානපච්චයභෙසජ්ජපරික්ඛාරං දදෙය්‍යාති? ආමන්තා. හඤ්චි පුථුජ්ජනො ගිලානපච්චයභෙසජ්ජපරික්ඛාරං දදෙය්‍ය, නො ච වත රෙ වත්තබ්බෙ – නත්ථි පුථුජ්ජනස්ස ඤාණ’’න්ති.
865. අත්ථි පුථුජ්ජනස්ස ඤාණන්ති? ආමන්තා. පුථුජ්ජනො තෙන ඤාණෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ…පෙ….
ඤාණකථා නිට්ඨිතා.