18. අට්ඨාරසමවග්ගො

(184) 8. සද්දං සුණාතීතිකථා

823. සමාපන්නො සද්දං සුණාතීති? ආමන්තා. සමාපන්නො චක්ඛුනා රූපං පස්සති…පෙ… සොතෙන…පෙ… ඝානෙන…පෙ… ජිව්හාය…පෙ… කායෙන ඵොට්ඨබ්බං ඵුසතීති? න හෙවං වත්තබ්බෙ…පෙ….

සමාපන්නො සද්දං සුණාතීති? ආමන්තා. සොතවිඤ්ඤාණසමඞ්ගී සමාපන්නොති? න හෙවං වත්තබ්බෙ. නනු සමාධි මනොවිඤ්ඤාණසමඞ්ගිස්සාති? ආමන්තා. හඤ්චි සමාධි මනොවිඤ්ඤාණසමඞ්ගිස්ස, නො ච වත රෙ වත්තබ්බෙ – ‘‘සමාපන්නො සද්දං සුණාතී’’ති.

සමාධි මනොවිඤ්ඤාණසමඞ්ගිස්ස, සොතවිඤ්ඤාණසමඞ්ගී සද්දං සුණාතීති? ආමන්තා. හඤ්චි සමාධි මනොවිඤ්ඤාණසමඞ්ගිස්ස, සොතවිඤ්ඤාණසමඞ්ගී සද්දං සුණාති, නො ච වත රෙ වත්තබ්බෙ – ‘‘සමාපන්නො සද්දං සුණාතී’’ති. සමාධි මනොවිඤ්ඤාණසමඞ්ගිස්ස, සොතවිඤ්ඤාණසමඞ්ගී සද්දං සුණාතීති? ආමන්තා. ද්වින්නං ඵස්සානං…පෙ… ද්වින්නං චිත්තානං සමොධානං හොතීති? න හෙවං වත්තබ්බෙ…පෙ….

824. න වත්තබ්බං – ‘‘සමාපන්නො සද්දං සුණාතී’’ති? ආමන්තා. නනු පඨමස්ස ඣානස්ස සද්දො කණ්ටකො වුත්තො භගවතාති? ආමන්තා. හඤ්චි පඨමස්ස ඣානස්ස සද්දො කණ්ටකො වුත්තො භගවතා, තෙන වත රෙ වත්තබ්බෙ – ‘‘සමාපන්නො සද්දං සුණාතී’’ති.

825. පඨමස්ස ඣානස්ස සද්දො කණ්ටකො වුත්තො භගවතාති, සමාපන්නො සද්දං සුණාතීති? ආමන්තා. දුතියස්ස ඣානස්ස විතක්කො විචාරො කණ්ටකො වුත්තො භගවතා, අත්ථි තස්ස විතක්කවිචාරාති? න හෙවං වත්තබ්බෙ…පෙ….

පඨමස්ස ඣානස්ස සද්දො කණ්ටකො වුත්තො භගවතාති, සමාපන්නො සද්දං සුණාතීති? ආමන්තා. තතියස්ස ඣානස්ස පීති කණ්ටකො…පෙ… චතුත්ථස්ස ඣානස්ස අස්සාසපස්සාසො කණ්ටකො … ආකාසානඤ්චායතනං සමාපන්නස්ස රූපසඤ්ඤා කණ්ටකො… විඤ්ඤාණඤ්චායතනං සමාපන්නස්ස ආකාසානඤ්චායතනසඤ්ඤා කණ්ටකො… ආකිඤ්චඤ්ඤායතනං සමාපන්නස්ස විඤ්ඤාණඤ්චායතනසඤ්ඤා කණ්ටකො… නෙවසඤ්ඤානාසඤ්ඤායතනං සමාපන්නස්ස ආකිඤ්චඤ්ඤායතනසඤ්ඤා කණ්ටකො… සඤ්ඤාවෙදයිතනිරොධං සමාපන්නස්ස සඤ්ඤා ච වෙදනා ච කණ්ටකො වුත්තො භගවතා, අත්ථි තස්ස සඤ්ඤා ච වෙදනා චාති? න හෙවං වත්තබ්බෙ…පෙ….

සද්දං සුණාතීතිකථා නිට්ඨිතා.